Read MAASAI REVISED PROTESTANT Matayo 16 Bible Online

Matayo 16 - MAASAI REVISED PROTESTANT bible

Matayo 16

¹Nepuonu Ilfarisayo o Sadukayo enetii Yesu aatem eyieu neitodol olmonekie ooing'uaa keper.

²Newaliki ajoki, “Ore te nteipa nijojo, ‘Mesha ade taata amu kenyokie shumata.’

³Nijojo tadekenya, ‘Keidis ade taata amu kenyokie shumata netunukua.’ Indimidimi intae aatumusu ilmonek le shumata kake mindimidimi aaibalie ilmonek le kuna katitin.

⁴Keing'oru kulo tung'ana torrok lena kata olmonekie kake meishori likae leme olapa le Yona.” Nelo aing'uaa ninche.

⁵Ore pee epuo lkipaareta lido kekun, nerikino eitu eya imukateni.

⁶Nejoki Yesu ninche, “Entorrip ate te nkisuisho oo Lfarisayo o Sadukayo.”

⁷Nejokino maate, “Te nkaraki neitu kiyau mukateni.”

⁸Neyiolou Yesu ilo rorei nejo, “Oi intae ilooti enkirukoto, kainyoo pee ijokinono maate mukateni miaatata?

⁹Keitu ejing'aa intae? Aimidamumu mukateni imiet naainosa iltung'ana nkalifuni imiet, kaja nkikapuni ninturrurrutuo?

¹⁰Aashu mukateni naapishana naainosa inkalifuni ong'uan oo ltung'ana, kaja nkikapuni ninturrurrutuo?

¹¹Kainyoo pee mejing'aa intae nchere mme mukateni aimaka? Kake entorrip ate te nkisuisho oo Lfarisayo o Sadukayo.”

¹²Nejing'aa teina kata inchere, mme enkisuisho oo mukateni eimaka kake inenkiteng'enare oo Lfarisayo o Sadukayo.

¹³Ore pee elo Yesu enkalo e Kaisari e Filipi neikilikuan lkipaareta lenyena aajoki, “Kejo iltung'ana ae ng'ae Enkerai e Tung'ani?”

¹⁴Nejoki, “Kejo kulikae Yohana Olaibatisani; nejo kulikae Eliya; nejo kulikae Yeremia, anaa obo loo loibonok le Nkai.”

¹⁵Nejoki, “Paa aijojo intae kara nanu ng'ae?”

¹⁶Newaliki Simon Petero ajoki, “Ira Iyie Kristo, Enkerai e Nkai naishu.”

¹⁷Newaliki Yesu ajoki, “Imayiana Simon ara Yona, amu eitu kiboloki ena entoki naata osesen o sarge, kake Papa lai otii keper.

¹⁸Naajoki nanu iyie, ira Petero naa te nchumata ele soit ashet enkanisa ai; nemegilu aekata ltimito le nemeneng'a.

¹⁹Naa kaaisho iyie ilboleta le nkitoria e keper ore eniyiooki aen te nkop, neaku eidipaki aateen te keper; ore enilak te nkop eidipaki aatalak te keper.”

²⁰Neitanap lkipaareta lenyena pee meliki oltung'ani nchere ninye Kristo.

²¹Neiteru Yesu teina kata aibalakinye lkipaareta lenyena inchere meeta kata nemelo Yerusalem meisilisili too mbaa kumok ilpayiani o lapolosak kituaak, o laiteng'enak loo nkitanapat neari metua, neitopiuni te nkolong e uni.

²²Nerik Petero Yesu enkilepata nekurraki ajoki, “Mikintapaasha Enkai, Lo Kitok, mikitalama nena.”

²³Neibelekenyakino Petero ajoki, “Shomo te siadi nanu Sheitani, amu aikirror; amu mme imbaa e Nkai idamu kake noo ltung'ana.”

²⁴Nejoki Yesu teina kata lkipaareta lenyena, “Ore pooki tung'ani oyieu naasuj inchoo eany kewan nenap osalaba lenye naasuj.

²⁵Amu ore pooki tung'ani ojo aitajeu enkishui enye neiminie, ore pooki oiturraa enkishui enye te nkaraki nanu, neitoki atum.

²⁶Amu kaa dupoto etum oltung'ani te netum enkop pooki, neiturraa enkishui enye?

²⁷Amu kelotu Enkerai e Tung'ani te nkitoo e Menye te nebo o lmalaika lenyena; nelaaki pooki tung'ani teina kata aitorisioki inaataasa.

²⁸Kesipa ajoki intae, Ketii kulikae ooitashe te ne, lemeishamisham keeya katukul ometaba anaa nedol Enkerai e Tung'ani elotu te nkitoria enye.”