Read MAASAI REVISED PROTESTANT Matayo 18 Bible Online

Matayo 18 - MAASAI REVISED PROTESTANT bible

Matayo 18

¹Nepuonu ina kata lkipaareta enetii Yesu nejoki, “Kaing'ae olkitok te nkitoria e keper?”

²Neipot enkerai neitasheyie te mpolos enye.

³Nejo, “Kesipa ajoki intae, te neitu imbelekenyanya aatiu anaa inkera kutiti, nimijing'ijing'i katukul enkitoria e keper.

⁴Ore pooki oitadou kewan anaa ena kerai, ninye olkitok aisul te nkitoria e keper.

⁵Ore pooki ng'ae ong'amu enkerai naba anaa ena te nkarna ai, naa nanu etang'amua.

⁶“Kake ore oloitapong'oo nabo kiti te kuna naairuk nanu metaasa ing'ok, keishiaakino neenikini osoit oituutishoreki emurt nenang'akini olmegut le naiposha.

⁷Oi enkop te nkaraki mbaa naayau empong'oroto, amu meeta nchere pee mepuonu mbaa e nkitapong'oroto. Kake ee kake ayia te ilo laa ninye eimu empong'oroto.

⁸“Ti nikintapong'oo enkaina ino aashu enkeju ino, tudung'oi nturrai amu enaikash te nijing enkishui miata enkaina aashu enkeju alang ti niata inkaik are o nkejek are, nikinang'akini enkima oo ntarasi.

⁹Naa ti nikintapong'oo enkong'u ino, tukurtu nturrai amu enaikash ti nijing enkishui iata enkong'u nabo alang ti nikinang'akini enkima e Yehanam iata nkonyek pokira are.

¹⁰ “Eng'ura emimenaa nabo e kuna kutiti; amu ajoki intae ore te keper, eing'orita oshi ake ilmalaika lenye enkomom e Papa lai otii keper.

¹¹[Amu eewuo Enkerai e Tung'ani pee eitajeu inaaimina].

¹²“Aijojo aa intae? Amaa te neeta oltung'ani nkerra iip nabo, aimeing'uaa kunda ntomoni naaudo o naaudo too ldoinyo nelo aing'oru ina naimina?

¹³Ore pee etum, Kesipa ajoki intae, keshipakino oleng ina alang nena ntomoni naaudo o naaudo neitu eimin.

¹⁴Neijia sii etiu mme eyieunoto e Papa linyi otii Keper, pee eimin nabo e kuna kutiti.

¹⁵“Ti nikinyal olalashe lino, shomo toliki enikinyalie aa intae ake pokira aare; naa ti nikining, itoning'ote o olalashe lino.

¹⁶Naa te neitu kining, torikoki likae tung'ani obo aashu aare, pee esipuni pooki bae too nkutukie oo lchakenini oaare aashu okuni.

¹⁷Naa te neany ening ninche toliki kanisa; naa te neitu ening sii kanisa, inchoo etiu te iyie anaa oloo loreren lemeiruk, anaa olosotu kodi.

¹⁸“Kesipa ajoki intae, ore pooki niyeniyene te nkop, neeni te keper; ore pooki nitalaa te nkop, nelaki sii te keper.

¹⁹“Kesipa aitoki ajoki intae, te nining'okinono oaare linyi embae ake pooki te nkop niomonunu, naa keitaas intae Papa lai otii keper

²⁰Amu ore enetumore oaare anaa okuni te nkarna ai, natii nanu ine atua ninche.”

²¹Nelotu Petero teina kata nejoki Yesu, “Lo Kitok, ae katitin aja aainyal olalashe lai, napalaki? Kemetabaiki katitin naapishana?”

²²Nejoki Yesu, “Maajoki metabaiki katitin naapishana, kake metabaiki ntomoni naapishana katitin naapishana.

²³Ore te nkaraki ina, etiu enkitoria e keper anaa olaiguanani otayiewua neikenisho te nebo isinkan lenyena.

²⁴Ore pee eiteru aikenisho nerikokini oltung'ani obo oata esile enye intalantani nkalifuni tomon.

²⁵Ore pee elau entoki nalakie, neitanapisho olkitok lenye metimiri ninye o enkitok enye o nkera enyena o ntokitin pooki naata, aalakie ina sile.

²⁶Nebatata ilo sinka too nkejek enyena nesai nejoki, ‘Lo Kitok, ting'iriakaki ometaba anaa naalaaki pooki.’

²⁷Neing'urrie olkitok ilo sinka nelaku nepalaki ina sile pooki.

²⁸“Ore pee eipung ilo sinka nedol likae sinka oboita te siaai oata esile enye dinari iip nabo; neibung olgos agor nejoki, ‘Talaakaki esile ai pooki.’

²⁹Nebatata ilo sinka oboita te siaai too nkejek enyena nesai ejo, ‘Ting'iriakaki ometaba anaa naalaaki pooki.’

³⁰Neany nerik apik jila ometaba anaa nelak esile pooki.

³¹Ore pee edol ilkulikae ooboitare te siaai ena bae, neisinanuo oleng nepuo aaliki olkitok lenye inaataasate pooki.

³²Neipot olkitok ilo sinka nejoki, ‘Lo sinka arruoni, kaatapalaka idia sile pooki te nkaraki nikitasayia:

³³paa aimeishiaakino sii iyie ning'urrie osinka liboitare te siaai anaa enaaing'urrie nanu iyie?’

³⁴Negoro olkitok nepik inkaik oo looitameisho ometaba anaa nelak esile enye pooki.

³⁵“Neijia sii eiko intae Papa lai otii keper ti nimipalakiki too ltauja pooki tung'ani olalashe lenye.”