Read MAASAI REVISED PROTESTANT Matayo 2 Bible Online

Matayo 2 - MAASAI REVISED PROTESTANT bible

Matayo 2

¹Ore pee eini Yesu te Betlehem e Yudea te nkata o laiguanani Herode nepuonu ilang'eni ooing'uaa oloosaen, nebau Yerusalem,

²neikilikuanu, aajo “Kaji etii Olarikoni loo Lyahudi otoiwuoki? Amu kitoduaa olakira lenye eilepu to loosaen, nikietuo iyiook aaserem ninye.”

³Ore pee ening Herode ina, neing'aeng'ai ninye o Yerusalem pooki.

⁴Ore pee eiturrur Herode ilapolosak kituak o ilaiteng'enak loo nkitanapat leilo orere, neikilikuan ajoki, “Kaji etoiunyeki Kristo?”

⁵Nejokini, “Te Betlehem e Yudea; amu inji eigeroki aajo to loiboni le Nkai:

⁶‘Ore iyie Betlehem te nkop e Yuda, mira hoo kini tiatua ilaitoriak le Yuda; amu iyie epukunye olarikoni oyooki aitore iltung'ana laainei loo Siraeli.’ ”

⁷Ina pee eipotu Herode ilang'eni too nkurrat, netem asipunye oleng enkata apa nataliee ilo akira.

⁸Neirriwaa ninche Betlehem nejoki, “Enchom, enkilikuanu imbaa eina kerai, ore pee itumutumu ninye nikiyakiki olomoni pee alotu sii nanu aserem ninye.”

⁹Ore pee eidip ilang'eni aatoning olaiguanani nepuo; ore ilo akira apa otoduaa ninche to loosaen nerikoo ninche o metaba anaa neitashe te shumata ewueji netii enkerai.

¹⁰Ore pee edol ninche ilo akira neng'ida te ng'ida kitok oleng.

¹¹Ore pee ejing aji, nedol ina kerai o Mariamu ng'otonye, negil kung aaserem ninye; nebol ilbenia lenye neitaiki ninye inkishoorot: saabu o enkorropil o emanoo.

¹²Ore pee eikok Enkai ninche te nkidetidet pee meshukokino Herode nerrinyo ti ae oitoi aapuo enkop enye.

¹³Ore pee errinyo ilang'eni, neipang'aki olmalaika lo Laitoriani Yosef te nkidetidet nejoki, “Inyo, tudumu enkerai o ng'otonye, isikaki Misiri, niton teine o metaba anaa naaliki, amu eing'oru Herode ina kerai pee ear metua.”

¹⁴Neinyototo nedumu enkerai o ng'otonye arik Misiri kewarie;

¹⁵neton teine o metua Herode; pee ebaya enapa natejo Olaitoriani to loiboni le Nkai pee ejo, “Aipotuo enkerai ai aitung'uaa Misiri.”

¹⁶Ore pee edol Herode ajo etipika lelo ang'eni olosek negoro metiminisa, neirriwaa iltung'ana metaara metuata inkayiok pooki naatii Betlehem o neemanita pooki naaitabaitie ilarin aare nedou aishiaakinye ina kata natisipunye lelo ang'eni.

¹⁷Nebaya ina kata ororei oiroro oloiboni le Nkai oji Yeremia otejo,

¹⁸“Etoning'oki oltoilo te Rama, olkiyioi o enkishirata sapuk, eishiraki Raheli inkera enyena, nemeitigirayu amu meekure eetae.”

¹⁹Ore pee eye Herode, neipang'aki olmalaika lo Laitoriani Yosef te nkidetidet te Misiri.

²⁰Nejoki, “Inyo tudumu enkerai o ng'otonye, shomo enkop oo Siraeli amu etuata lelo apa ooing'oru enkishui eina kerai.”

²¹Neinyototo arik enkerai o ng'otonye nepuo enkop oo Siraeli.

²²Kake ore pee ening inchere etaa Arkelaus olaiguanani le Yudea, te rishata e papaai lenye Herode neureyu errinyo ina alo; neikoki te nkidetidet nebo ina alo olkerenket le Galilaya.

²³Nelo aton te nkang naji Nasaret, pee ebaya enatejo oloiboni le Nkai nchere: “Keaku keji Olnasarayoi.”