Read MAASAI REVISED PROTESTANT Matayo 20 Bible Online

Matayo 20 - MAASAI REVISED PROTESTANT bible

Matayo 20

¹“Amu etiu enkitoria e keper anaa oltung'ani liopeny enkang otayoo enasirie alo aing'oru iltung'ana ootur enkurma enye oo Ing'anayio.

²Ore pee eidip atoning'ore ilaisiaayiak pee elaaki dinari te nkolong, nerik enkurma enye oo sabibu.

³Neitoki alo saa uni, netum kulikae eitashoo te nemirishoreki meeta esiaai,

⁴nejoki sii lelo, ‘Enchom sii intae enkurma oo sabibu naisho intae entoki nairirikino.’ Nepuo.

⁵Neitoki ake alo etaa saa ile, o saa naaudo, neiko ake neijia.

⁶Ore saa tomon o obo, nelo netum kulikae ooitashoo nejoki, ‘Kainyoo pee intasheshe intae te ne endama pooki, miatata esiaai?’

⁷Nejoki ninche ninye, ‘Amu eitu kitum oltung'ani oishoo iyiook esiaai.’ Nejoki, ‘Enchom sii intae enkurma oo sabibu.’

⁸“Ore pee eaku teipa nejoki olopeny enkurma oo lng'anayio olaitasheikinoni lenye, ‘Impoto laisiaayiak, inchoo olekoisiayio, tang'asu to lobayie o mpung'ie to loiturukuo.’

⁹Ore pee epuonu laduoo ooiterutua saa tomon oo obo netum ake pooki tung'ani dinari[11].

¹⁰Nepuonu ile dukuya ejo ketum ninche nkumok, netum sii ninche pooki tung'ani dinari.

¹¹Ore pee eidip ninche aatang'amu neing'unyung'unyaki ilo openy enkang.

¹²Nejo, ‘Ore kulo ooisiadutua esaa nabo ake etaasishote, nintorisioko iyiook ooting'iria te esiaai nagol enkolong pooki.’

¹³“Newaliki obo lenye ajoki, ‘Olchore eitu nanu aainyal. Keitu duoo kining'okino o iyie dinari?

¹⁴Imbung'a enino shomo. Amu atonyorrayie aisho ele oisiadua anaa enaaisho iyie.

¹⁵Aimaaishiaakino te naas anaa enayieu too naainei? Ana keiba enkong'u ino te nkaraki naleng nanu?’

¹⁶“Neijia etiu, keaku ile siadi ile dukuya, neaku ile dukuya ile siadi.”

¹⁷Ore pee eaku keilep Yesu alo Yerusalem nerik lelo ooiteng'eni lenyena tomon o aare enkilepata te nkoitoi, nejoki,

¹⁸“Kilepita aapuo Yerusalem, naa kepiki Enkerai e Tung'ani nkaik oo lapolosak o laiteng'enak loo nkitanapat neiguanare ninye enkiguana e keeya.

¹⁹Neisho iloreren metusurdaanya,, near too nkeenta, neshei neitopiuni te nkolong e uni.”

²⁰Nelotu ng'otonye layiok le Sebedayo enetii Yesu eboitare ilayiok lenyena pokira aare neserem eeta enaomonu.

²¹Neikilikuan Yesu ajoki, “Kainyoo iyieuu?” Nejoki, “Intanapisho metotona kulo ayiok laainei pokira aare obo te nkaina ino e tatene, neton olikae te nkaina e kedianye te nkitoria ino.”

²²Newaliki Yesu ajoki, “Miyiololo eniomonunu, aa ndimidimi aatook enkikompe naok nanu?” Nejoki, “Ee kindim.”

²³Nejoki ninye ninche, “Ee kesipa iokioko enkikombe ai kake ore entonata te nkaina ai e tatene ana te ne kedianye, mme nanu oishoru, kake eaku ene lelo ooitobiraka Papa lai.”

²⁴Ore pee ening kuldo tomon ina, negorokino lelo alashera pokira aare.

²⁵Neipot Yesu ajoki, “Iyiololo aajo, ore Ilaitoriak loo Loreren eitaa ate kituaak, neitoreisho te ngolon.

²⁶Ore te intae metiu neijia; kake ore pooki tung'ani te intae oyieu neaku kitok; inchoo eaku olaisiaayiani linyi,

²⁷ore oloyieu neaku ole dukuya te intae neaku osinka linyi;

²⁸anaa eneitu elotu Enkerai e Tung'ani meisiaai kake eewuo aisiaaisho neitayu enkishui enye metaa elakunoto oo lkumok.”

²⁹Ore epuo aaing'uaa Yeriko nesuj olorora kitok.

³⁰Naa ng'ura, Netii ltung'ana aare modook ootoni te mbata e nkoitoi, ore pee ening inchere Yesu ilo oimita ine nebuak aajo, “Lo Kitok ara Daudi, ing'urrie iyiook!”

³¹Neisikong olorere ninche aaitigir, kake enyaakita aaitulusoo aabuak aajo, “Lo Kitok ara Daudi, ing'urrie iyiook!”

³²Neitashe Yesu neipot ninche nejoki, “Kaa iyieuu naitaas intae?”

³³Nejoki ninche ninye, “Lo Kitok, pee eboli iyiook inkonyek.”

³⁴Neing'urrie Yesu ninche neiseyie inkonyek enye; nedolishoyu ninche teina kata nesuj ninye.