Read MAASAI REVISED PROTESTANT Matayo 21 Bible Online

Matayo 21 - MAASAI REVISED PROTESTANT bible

Matayo 21

¹Ore pee enyikaki Yerusalem nebaiki Betfage to Ldoinyo loo Loirienito neirriwaa Yesu lkipaareta oaare, nejoki ninche,

²“Enchom enkang natii dukuya intae na idolidolo nabo kata teine esikiria naena o lkurrarru, entalaku enterewakaki.

³Naa te neng'amaa intae oltung'ani entiaaki, ‘Olkitok oatayie enkolat’; nerewakini teina kata.”

⁴Netaasate nena pee ebaya enatejo oloiboni le Nkai,

⁵“Entiaki Yerusalem, kelotu enitii iyie olaiguanani lino, nebor nekedito esikiria, akedito olkurrarru le sikiria.”

⁶Nepuo lkipaareta neas anaa inaitanapa Yesu,

⁷nereu ina sikiria o enkurrarru neirotoki inkilani enye neked Yesu atonie.

⁸Neisalaash ilkumok lo lorora ilkilani lenye te nkoitoi nedung'u kulikae ilng'osil loo lkeek neisalaashaki enkoitoi.

⁹Ore olorere oituruko o losujita, nebuak aajo, “Hosana, Enkerai e Daudi; metamayiani ilo olotu te nkarna o Laitoriani; Hosana te shumata naisul pooki.”

¹⁰Ore pee ejing ninye Yerusalem, neiriiro enkang pooki, aajo, “Ai ng'ai ele?”

¹¹Nejo esiamo, “Yesu ele, oloiboni le Nkai le Nasaret e Galilaya.”

¹²Nejing Yesu enkaji e Nkai nearaa lelo pooki oomirisho o looinyiang'isho aitupuku te nkaji e Nkai neibeloo misai oo ilooibelekeny mpisai o lorikan loo loomir inturkuluoni.

¹³Nejoki Yesu ninche, “Etisiraki inchere, ore enkaji ai keji enkaji e nkomono kake intaa intae enkapune oo laisimak.”

¹⁴Nepuonu enetii Yesu tiatua enkaji e Nkai ilmodook o lng'ojiniaa; neishiunye ninye.

¹⁵Kake ore pee edol ilapolosak kituaak o laiteng'enak loo nkitanapat imbaa e nking'sia naataasa ninye o nkera eilepie iltoiloishi lenye te nkaji e Nkai ejo, “Hosana, Enkerai e Daudi.” Negoro ninche,

¹⁶nejoki ninye, “Aa ining'ito enajoito kuna?” Nejoki Yesu ninche, “Ee, keitu isumusumu ai kata nchere, ‘Intabayie enkisisa too nkutukie oo nkera kutiti naanakita’?”

¹⁷Neing'uaa ninche, neipang teina anasa nelo Betania neirrag ine.

¹⁸Ore tadekenya eloito Yesu arrinyokino ina anasa netir esumash.

¹⁹Nedol olng'aboli te mbata e nkoitoi neiwuang'aki, neitu etumie toki, imbenek ake; nejoki ilo shani, “Tala Ing'anayio ntarasi.” Netoyu nabo kata olng'aboli.

²⁰Ore pee edol lkipaareta ina bae, neing'asia nejo, “Kaji eikuna pee etoyio olng'aboli nabo kata?”

²¹Newaliki Yesu, ajoki, “Kesipa ajoki intae, te naa iatata enkirukoto ming'ashing'asha, neme ena ake naitaasaki olng'aboli iasiasa kake ti nijokiki oldoinyo, ‘Tadotunye tanang'akinoyu enaiposha,’ neaku ina.

²²Ore pooki toki ninkilikuanunu te nkomono te nkirukoto nitumutumu.”

²³Ore pee ejing Yesu enkaji e Nkai nepuonu ilapolosak kituaak o lpayiani kituaak enetii, eiteng'enisho nejoki, “Ai ti aa kidimata ias iyie kuna baa? Naa ai ng'ae likinchoo ena kidimata?”

²⁴Newaliki Yesu nejoki, “Kaikilikuan sii nanu intae embae nabo, naa tinikiwalikiki, naliki sii nanu intae enkidimata naasie kuna baa.

²⁵Amaa, enkibatisa e Yohana, kaji eing'uaa? Ke keper eing'uaa ana ke ltung'ana?” Nejokino maate, “Te nikijo, ‘keper eing'uaa;’ naa kejoki iyiook, ‘Oo naa pee eitu irukuruku?’

²⁶Naa ti nikijo, ‘Iltung'ana eing'uaa’ nikiure olorere, amu kejo ltung'ana pooki oloiboni le Nkai Yohana.”

²⁷Newaliki ninche Yesu aajoki, “Mikiyiolo.” Nejoki sii ninye, “Maliki sii nanu intae enkidimata naasie kuna baa.

²⁸“Ijojo aa? Eeta apa oltung'ani ilayiok aare; nelo enetii obo nejoki, ‘Enkerai ai, shomo taata ntayu esiaai te nkurma oo sabibu.’

²⁹Neng'amaa ajoki, ‘Malo’ ore te siadi neirridu nelo.

³⁰Neitoki alo enetii olikae nejoki neijia. Neng'amaa ilo ajoki, ‘Kalo Papa’, kake eitu elo.

³¹Kalo te lelo pokira aare otaasa enanyor menye?” Nejoki, “Lido le dukuya.” Nejoki Yesu, “Kesipa ajoki intae, iloosotu kodi o loololoito oong'as aajing enkitoria e Nkai te dukuya intae.

³²Amu eewuo Yohana enitii, te nkoitoi e supatisho, neitu irukuruku; kake eiruko iloosotu kodi o loololoito; kake ore pee idolidolo intae ina, neitu irridudu te siadi, aairuk ninye.

³³“Enining'o sii ae kitanyaanyukoto: Etii apa oltung'ani oata enkang, neun enkurma oo lng'anayio neitaman enkikarrata netur ewueji neironyie lng'anayio, neshetaki oltalet, neing'ueiki ilaturok, nelo ninye paran ae kop.

³⁴Ore pee eaku enkata naku lng'anayio, neirriwaki isinkan lenyena lelo aturok, meishoo lng'anayio lenyena.

³⁵Neibung ilaturok isinkan lenyena, neidong obo, near likai metua, near likai too soito.

³⁶Neitoki airriwaki kulikae sinkan kumok oolang lelo le dukuya, neiko sii ninche neijia.

³⁷Ore te siadi neirriwaki enkerai enye ejo, ‘Keyanyit ninche enkerai ai.’

³⁸“Kake ore ake pee edol ilaturok enkerai, nejokino maate, ‘Ele olajung'oni, mataar pee kitum enjung'ore enye.’

³⁹Neibung ninye nearaa aaipung'ie oriong enkurma oo lng'anayio near metua.

⁴⁰Amaa kenya te nelotu olopeny ina kurma oo lng'anayio, kaa eitaas lelo aturok?”

⁴¹Nejoki, “Kear oleng lelo tung'ana torrok metuata neisho enkurma oo lng'anayio kulikae aturok ooitabaiki ninye ilng'anayio too rishat enye.”

⁴²Nejoki Yesu ninche, “Keitu aekata isumusumu too lkigerot, ‘Ore ilo soit otanyaita ilashetak ninye otaa osoit kitok lo lmairroto[12]. Ore ilo rorei naa Olaitoriani eing'uaa, naa ole nking'asia too nkonyek ang.’

⁴³Te nkaraki ina pee ajoki intae, keoruni intae enkitoria e Nkai aaisho olorere oiki lng'anayio, [

⁴⁴naa ore olosulakino ilo soit, negiligil. Ore olosulakino ilo soit neidong aitaa emposio.]”

⁴⁵Ore pee ening ilapolosak kituaak o Lfarisayo kuna kitanyaanyukot, neyiolou aajo ninche eipirta.

⁴⁶Ore eing'oru eneiko pee eibung, neureyu olorere amu ejo ninche, oloiboni le Nkai Yesu.