Read MAASAI REVISED PROTESTANT Matayo 26 Bible Online

Matayo 26 - MAASAI REVISED PROTESTANT bible

Matayo 26

¹Ore pee eidip Yesu lelo rorei pooki, nejoki lkipaareta lenyena,

²“Iyiololo aajo inkolong'i are naatiooyo pee eaku Pasaka[13], naa keishoori Enkerai e Tung'ani metashei.”

³Neiturrurro lapolosak kituaak o lpayiani te wueji olapolosani kitok oji Kaiafas;

⁴neiguana maate te nebo pee etum aaibung'a Yesu to losek aataar metua.

⁵Neitoki aajo, “Neme to sirua pee mejing olong'oling'oli atua ltung'ana.”

⁶Ore etii Yesu Betania enkaji e Simon le nkeeya oo lbolot,

⁷nelotu enetii ninye enkitok naata oltulet lo soit oji alabasta le ilata narropil nagol enkinyang'a nebukoki elukunya enye teine einosita endaa.

⁸Ore pee edol lkipaareta lenyena ina negoro naleng nejo, “Ijo meima ena ilata siu?

⁹Amu anaata etimiraki aainosie mpisai kumok pee eishori ilaisinak.”

¹⁰Kake etayiolo Yesu ina nejoki, “Kainyoo pee intanyamalala ena kitok? Naa esidai aaitaasa.

¹¹Amu iatata ilaisinak anaake kake mikiaata nanu anaa ake.

¹²“Amu ore ina ilata narropil naatubukoko, osesen lai eitobiraki enukaroto.

¹³Esipa ajoki intae, ore pooki wueji nelikiorieki ele rorei supat te nkop pooki, naa keimakini ena naaitaasa ena kitok metaa enadamunyeki ninye.”

¹⁴Nelo ina kata obo le lelo tomon o aare oji Yudas Iskariot enetii ilapolosak kituaak,

¹⁵nejoki, “Kainyoo kinchosho te naitarasaki intae Yesu?” Nelaaki ninche impisai tomoni uni e nkosholai.

¹⁶Ore ebaiki ina kata neing'oru erishata nakaldarie ninye.

¹⁷Ore te nkolong e dukuya o sirua loo Mukateni Nemeisuishieki, nepuonu lkipaareta enetii Yesu nejoki, “Kaji kintobiraki iyie pee inyayie osirua le Pasaka?”

¹⁸Nejoki, “Entijing enkanasa enchom enetii oltung'ani oje entiaki, ‘Eji Olaiteng'enani, etinyikua enkiririkinoto e nkata ai; te nkaji ino aitobir Pasaka te nebo o lkipaareta laainei.’ ”

¹⁹Neas lkipaareta ina natiaka Yesu, neitobiraki Yesu Pasaka.

²⁰Ore pee eaku tara, neton Yesu te misa tenebo lkipaareta lenyena tomon aare.

²¹Ore einosita endaa nejoki, “Kesipa ajoki intae, kaakaldaa obo linyi.”

²²Neisinanuo oleng neikilikuana moo obo, “Ainanu sa Lo Kitok?”

²³Newaliki ajoki, “Elde oitadoikio enkaina enye esaani te nebo nanu, ninye laakaldaa nanu.

²⁴Kelo Enkerai e Tung'ani anaa enatisiraki, kake, ee kake ayia elde la ninye oitarasaa Enkerai e Tung'ani. Enaikash apa te neitu eini.”

²⁵Neng'amaa Yudas laa ninye otakaldaiyie ajoki, “Aijo, sa ainanu, Olaiteng'enani?” Nejoki Yesu, “Iyie otejo.”

²⁶Ore einosita endaa nedumu Yesu emukate nemayian negiligil; neisho lkipaareta lenyena nejo, “Enkoito enosa; osesen lai ele.”

²⁷Nedumu enkikompe, neisho Enkai enashe, neitarasaki ninche nejoki, “Entook pooki;

²⁸amu osarge lai ele lo sotua oibukori te nkaraki oo lkumok te mpalakinoto oo ng'ok.

²⁹Ajoki intae, ore ebaiki taata, maitoki aekata aok enaisho oo lng'anayio loo sabibu o metabau enkolong naok eokoto ng'ejuk te nebo intae te Nkitoria e Papa.”

³⁰Ore pee erany osinkolio neipang aapuo Oldoinyo loo Loirienito.

³¹Nejoki Yesu ninche, “Ore tena kewarie, naa aikisikisiki pooki aaing'uaa nanu amu etisiraki aajo, ‘Kaosh olchekut neidapasha eluaata oo nkerra.’

³²Kake ore pee aaitopiuni naituruk alo Galilaya.”

³³Newaliki Petero ajoki, “Te naa aiking'uaa pooki, maaing'uaa aekata nanu.”

³⁴Nejoki Yesu, “Kesipa aajoki iyie, ore te na kewarie, eitu eru olchogoo, nikimiki iyie katitin uni.”

³⁵Nejoki Petero, “Te naa kaye te nebo iyie maamiki nanu iyie.” Nejo sii neijia lkipaareta pooki.

³⁶Nelotu Yesu o ninche ewueji neji Getsemane nejoki lkipaareta lenyena, “Entotoni te ne mashomo ende aomon.”

³⁷Nerik Petero o layiok pokira aare le Sebedayo. Neiteru aisinanuo nenyamalu oltau.

³⁸Nejoki, “Keeta oltau lai osina kitok o metaa kaye; entotoni te ne entashololoto te nebo nanu.”

³⁹Neigut penyo neirrabalakino enkop neomon nejo, “Papa lai, te naa keidimayu intapaashaki ena kikompe, kake mme anaa enayieu nanu kake anaa eniyieu iyie.”

⁴⁰Nelotu enetii lkipaareta neinepu eirurate, nejoki Yesu Petero, “Amaa ai mindimidimi hoo aatashololoto te nebo nanu esaa nabo?

⁴¹Entashololoto niomonono pee mijing'ijing'i atua intemat; kesipa keyieu oltau, kake keshal osesen.”

⁴²Neitoki alo enkata e are neomon nejo, “Papa lai, te nemeidimayu pee aapaash ena kikompe eitu aok, inchoo metotiwuo anaa eniyieu.”

⁴³Neitoki alotu, neinepu ninche eirurate, amu eiroshiutuo inkonyek enye.

⁴⁴Neitoki aing'uaa ninche nelo aomon enkata e uni te lelo ake rorei.

⁴⁵Neitoki ashukokino lkipaareta lenyena nejoki, “Keton doi ake irurara aayeng'iyeng'a! Eng'ura Etinyikua esaa napikieki Enkerai e Tung'ani inkaik oo laing'okok.

⁴⁶Enyeoto emaape; nelde olaakaldaa otabawua.”

⁴⁷Ore eirorita, ng'ura, nelotu Yudas laa obo le lelo tomon o aare, eboitare empikas sapuk naata lalema o siaren ooing'uaa enetii lapolosak o lpayiani lo lorere.

⁴⁸Naa ore ilo oitarasayie eidipa aishoo ninche olmonekie ejoki, “Ore elde lang'utut, ninye ilo embung'a.”

⁴⁹Nelo ina kata enetii Yesu nejoki, “Supa Olaiteng'enani;” neng'utut.

⁵⁰Nejoki Yesu, “Olchore, kainyoo pee itii ene? Tasioki taasa ina nikiyawua.” Nepuonu taa enetii neibung aakurraki.

⁵¹Neshutu obo le lelo ooboitare Yesu olalem, neosh osinka lo lapolosani nedung'u enkiok.

⁵²Nejoki Yesu, “Tushukoki olalem lino enchashur amu ore pooki oibung olalem nemuta to lalem.

⁵³Aijo iyie eimaidim atasayia Papa maairriwaki nabo kata mpuot tomon o aare oo lmalaika?

⁵⁴Paa kaji naa eiko pee eitabari ilkigerot nemeeta nchere pee eitu ebaya?”

⁵⁵Ore ina kata nejoki Yesu ina siamo, “Aikipuonunu aaibung iatata ilalema o siaren anaa ilo oibung olaisimani? Natii oshi ake enkaji e Nkai aiteng'enisho neitu kimbung'ubung'u?”

⁵⁶Kake etaasate kuna pooki pee ebaya ilkigerot loo loibonok le Nkai. Neilanyisho ina kata lkipaareta pooki aaing'uaa.

⁵⁷Ore lelo ooibung'a Yesu nerikoki olapolosani kitok, oji Kaiafas, enotote teine laiteng'enak loo nkitanapat o lpayiani.

⁵⁸Kake esujita Petero ninye te nelakua, o metabaiki olgoriet lo lapolosani kitok. Ore pee ejing atua, neton ninye te nebo ilarripok adol enaasayu.

⁵⁹Neing'oru ilapolosak kituaak o enkiguana pooki shakenisho e lejare naiteeniki Yesu pee eari metua.

⁶⁰Kake eitu etum hoo pito hoo neetuo lchakenini kumok le lejare.

⁶¹Ore te siadi nepuonu aare ootejo, “Etejo ele tung'ani kaidim atigila enkaji e Nkai naitoki ashet too nkolong'i uni.”

⁶²Neitashe olapolosani kitok ajoki ninye. “Aimeeta eniwalu? Kakua baa kuna nikinteeniki kulo tung'ana?”

⁶³Kake etigire Yesu. Nejoki taa olapolosani kitok, “Aainosie olmumai te Nkai naishu, toliki iyiook te naa ira iyie Kristo, Enkerai e Nkai.”

⁶⁴Nejoki Yesu, “Iyie otejo; kake ajoki intae, ore ebaiki taata idolidolo Enkerai e Tung'ani eton te nkaina e tatene naata engolon edou too nkatampo e shumata!”

⁶⁵Nepolos olapolosani kitok ilkilani lenyena nejo, “Etamorishe ele, kainyoo shakenisho neton kiyieu? Itoning'o emorore enye.

⁶⁶Ijojo aa?” Newaliki aajoki, “Keiririkino ele tung'ani keeya.”

⁶⁷Ore teina kata nenotaki enkomom neikum, nedam, neosh kulikae te ndap.

⁶⁸Ejoki, “Kristo, imbonoki yiook, ai ng'ae likitoosho?”

⁶⁹Neton Petero te boo to olkoriet. Nelo enkaisiaayiani enetii nejoki, “Ira sii iyie obo loo loboitare Yesu le Galilaya.”

⁷⁰Nemiki ninye te dukuya ninche pooki ejo, “Maiyiolo enijoito.”

⁷¹Ore pee eipung alo entaloishi e kishomi nedol ae tito ninye nejoki ilootii ine, “Eiriamariyie sii oshi ele tung'ani Yesu le Nasaret.”

⁷²Neitoki anya olmumai amiki ajo, “Maiyiolo ilo tung'ani.”

⁷³Ore te nkiti kata nepuonu lelo ooitashoo teine nejoki Petero, “Kesipa ira sii iyie obo le lelo; amu aikilikioo nkirorot inono.”

⁷⁴Neiteru, adek kewan nenya olmumai nejo, “Maiyiolo ilo tung'ani.” Neru nabo kata olchogoo.

⁷⁵Nedamu Petero olapa rorei otiaaka Yesu inchere, “Ore eitu eru olchogoo, aikimiki katitin uni.” Neipang alo aishir te mion.