Read MAASAI REVISED PROTESTANT Matayo 27 Bible Online

Matayo 27 - MAASAI REVISED PROTESTANT bible

Matayo 27

¹Ore pee ekenyu, netumo ilapolosak pooki o lpayiani lo lorere neiguanare pee ear Yesu metua.

²Neen ninye nerik aaitarasaki olgafanai oji Pilato.

³Ore Yudas ilo otakaldayie Yesu pee edol ajo eidipaki aaiguanare, neitoki ainosu neshuku nena pisai tomoni uni e nkosholai ashukoki ilapolosak kituaak o lpayiani,

⁴nejo, “Aitarruoyie atakaldayie oltung'ani lemeeta entiyoto metari.” Kake etiaakita ninche, “Kainyoo natii ninche iyiook? Iyie ine.”

⁵Nenang'aki nena pisai e nkosholai atua enkaji e Nkai neipung; nelo agor kewan.

⁶Nedumu ilapolosak nena pisai e nkosholai nejo, “Mebara ti nikipik olbene le Nkai amu osarge einosieki.”

⁷Neiguana te nebo neinyiang'unye enkurma o laitobirani loo motioo pee enukarieki iltung'ana leeiking'a.

⁸Te nkaraki e ina pee eji ina kurma, enkurma o sarge o taata.

⁹Ina kata eitabayioki ina natejo oloiboni le Nkai oji Yeremia pee ejo, “Neya ninche impisai tomoni uni e nkosholai nainosieki ilo otudung'oki enkinyiang'a, otudung'okito enkinyiang'a lkulikae ayiok loo Siraeli.

¹⁰Neishooyo aainosie enkurma o laitobirani loo motioo anaa enaaitanapa nanu Olaitoriani.”

¹¹Neitasheyieki Yesu te dukuya olgafanai neikilikuan olgafanai ninye ajoki, “Aa ira iyie olaiguanani loo Lyahudi?” Nejoki Yesu, “Iyie ojo.”

¹²Ore pee eitang'or ilapolosak kituaak o lpayiani, neitu hoo ewaliki.

¹³Nejoki Pilato, “Ai mining eneba imbaa nikinteenikini?”

¹⁴Kake eitu ewaliki te mbae hoo nabo, o meing'asiayu olgafanai oleng.

¹⁵Naa ore apa ake to sirua le Pasaka, naa kelaaki olgafanai esiamo oltung'ani obo oena anaa oloyieu ninche.

¹⁶Netii ina kata oltung'ani obo yioloti te nkarruoisho oena oji Barabas.

¹⁷Ore pee etumo, nejoki Pilato ninche, “Kalo iyieuu nalaaki intae? Ai Barabas anaa Yesu oji Kristo?”

¹⁸Amu keyiolo ajo to lom eishooitie ninye.

¹⁹Ore pee eton Pilato to lorika le nkiguana neirriwaki enkitok enye olkilikuai ajoki, “Toduaa miaas ae te ilo tung'ani lemeeta entiyoto amu atanyamala duoo too mbaa kumok te nkidetidet te nkaraki ninye.”

²⁰Kake etukurrakita ilapolosak kituaak o lpayiani lo lorere metoomonu Barabas, neishooyo Yesu metaari.

²¹Neitoki ake olgafanai ajoki ninche, “Kaing'ae te kulo pokira aare iyieuu nalaaki intae?” Nejo, “Barabas.”

²²Nejoki Pilato, “Kaa naa aitaas Yesu oji Kristo?” Nejoki pooki, “Inchooi metashei.”

²³Nejo, “Aainyo, kaa torroni etaasa ninye?” Neitoki aaitulusoo aabuak aajo, “Inchoo metashei!”

²⁴Ore pee edol Pilato ajo meeta ae naidim ataasa, kake keponari ake oloilole nedumu enkare, neisuj inkaik te dukuya olorere nejo, “Maata taa nanu entiyoto to sarge lele tung'ani eng'urai maate ena bae.”

²⁵Newaliki iltung'ana pooki aajoki, “Inchoo osarge lenye meeu shumata iyiook o nkera ang.”

²⁶Nelaaki teina kata Barabas; neari Yesu too nkeenta, neishori metashei.

²⁷Nerik isikarini lo lbalusui Yesu atua enkaji o lbalusui naji Praitorio neiturrurrokinote oltim pooki.

²⁸Neoru nkilani enyena neishopoki olkila onyokie.

²⁹Neshetu olmarisian loo lkiku nepik elukunya enye, nepik entiyani enkaina enye e tatene, negilaki kung aakueniyie nejoki, “Supa olaiguanani loo Lyahudi!”

³⁰Nenotaki ninye neoru ina tiyani naibung'ita, neoshioshie endukuya enye.

³¹Ore pee eidip aatakueniyie, neoru olkila onyokie neishopoki nkilani enyena, nerik ninye aapuo aashe.

³²Ore epuku aapuo neinepu oltung'ani le Kirene oji Simon nearaki ninye pee enap osalaba.

³³Ore pee ebaiki ewueji neji Golgata, (aa keji ewueji e mborbor),

³⁴neisho ninche Yesu enaisho oo sabibu naitushulakaki olodua metooko. Ore pee eishamisham neany eok.

³⁵Ore pee eidip aatasho ninye, neor nkilani enyena aaoshie enkukuo.

³⁶Netoni ninche aarrip ninye teine.

³⁷Nepik ele sirata shumata elukunya enye aajo “YESU ELE OLAIGUANANI LOO LYAHUDI.”

³⁸Neshei ninye teina kata te nebo o lapurrok aare, obo te nkaina e tatene, o likae te nkaina e kedianye.

³⁹Nemor iloogiroo eipirripir ilukuny, aajo,

⁴⁰“Eiyie doi ogil enkaji e Nkai nishet too nkolong'i uni, intajeu kewan; te naa iyie Enkerai e Nkai, tadou to salaba.”

⁴¹Neiko sii ninche neijia lapolosak o lasirak te nebo lpaiyiani ejo,

⁴²“Kulikae ake eitajeu nemeidim aitejeu kewan, olaa ninye olaiguanani loo Siraeli. Inchoo taata edou to salaba pee kiruk ninye.”

⁴³Ore amu Enkai etipika osiligi lenye inchoo naa eitajeu Enkai ninye tenaa keetayie tipat; amu etejo naa, “Kara Enkerai e Nkai!”

⁴⁴Nemor sii lelo apurrok ootashoki te nebo o ninye.

⁴⁵Ore pee ebaiki saa ile, nerip enaimin enkop o metabaiki saa naaudo.

⁴⁶Ore pee ebaya saa naaudo, neishir Yesu to ltoilo sapuk ajo, “Eli, Eli, lama sabaktani?” Naa inchere, “Enkai ai, Enkai ai, kaainyo pee kitung'uayie?”

⁴⁷Ore pee ening kulikae te lelo ooitashe teine nejo, “Eliya eipoto.”

⁴⁸Nekuet nabo kata obo le lelo nepik osuguroi enaisho naisuisho oo sabibu neremoki eng'udi naado neisho metooko.

⁴⁹Nejoki ilkulikae, “Tapala maing'urai te naa kelotu Eliya aitajeu.”

⁵⁰Neitoki Yesu aishir to ltoilo sapuk, nedung'o tau.

⁵¹Neiperra nabo kata olkarasha le nkaji e Nkai aaku are, aiteru te shumata o metabaiki abori, neikirikira enkop nedanya ndapidapo;

⁵²nebolo inkuraren neitopiuni seseni kumok loo sinyat ooirurate;

⁵³ore pee epuku too nkuraren eidipa Yesu atopiu, nejing ina ang sinyati neipang'aki ltung'ana kumok.

⁵⁴Ore ilo kitok loo sikarini oorripito Yesu o lelo ootii te nebo ninye, pee edol eikirikire enkop o kulie baa naataasate, neureishoyu oleng ejo, “Kesipa Enkerai e Nkai ele tung'ani.”

⁵⁵Netii ine wueji inkituaak kumok naaing'orita te nelakua naatusujutua Yesu eing'uaa Galilaya eisiaaita ninye.

⁵⁶Ore te nebo ninche etii Mariamu Magdalene o Mariamu ng'otonye Yakobo o Yosef o ng'otonye layiok le Sebedayo.

⁵⁷Ore pee eaku teipa nelotu oltung'ani karsis oing'uaa Arimatea oji Yosef, otaa apa olointeng'eni le Yesu.

⁵⁸Nelo sii apa ninye enetii Pilato neomonu osesen le Yesu. Neitanapisho Pilato pee eishori.

⁵⁹Neitayu Yosef osesen, neirin te nkarasha sidai e kitani,

⁶⁰neirragie te nkurare enye ng'ejuk nataguetua to soit, neibeleleng'oki osoit sapuk enkutuk e ngumoto, nelo.

⁶¹Netii ine Mariamu Magdalene o enkae Mariamu etoni aaipirare enkurare.

⁶²Ore taaisere aa enkolong nasujita ene Nkitobirare, neiturrurrokino lapolosak kituaak o Lfarisayo Pilato,

⁶³aajoki, “Lo kitok, kitadamutua aajo etejo, apa ilo kalamas eton eishu, ‘Ore pee elusoo nkolong'i uni, napiu.’

⁶⁴Intanapisho naa metorripi enkurare o metabaiki enkolong e uni, pee mepuonu lkipaareta lenyena aapurroo nejoki olorere, ‘Etopiwuo’; neaku elejare torrono oleng alang ene dukuya.”

⁶⁵Nejoki Pilato, “Iatata larripok loo sikarini, enchom entorrip anaa enindimidimi.”

⁶⁶Nepuo aaitagol erripoto e nkurare, nepik olmishire osoit te nebo ilarripok.