Read MAASAI REVISED PROTESTANT Matayo 28 Bible Online

Matayo 28 - MAASAI REVISED PROTESTANT bible

Matayo 28

¹Ore pee eidipayu enkolong e nkiyeng'iyeng naji Sabato ekenyu aa enkolong e dukuya e wiki, nelotu Mariamu Magdalene oo enkae Mariamu aaing'uraa enkurare.

²Na ng'ura ajo etijing'a olokirikiri kitok enkop, amu etadowuo olmalaika lo Laitoriani oing'uaa keper, nelotu neibeleleng'oo osoit netonie enchumata.

³Netiu enkomom enye anaa enkiwuang'ata, neibor inkilani enyena anaa empaso.

⁴Neikirikira ilarripok te nkaraki ninye, netiu anaa ilootuata.

⁵Nejoki ilo malaika inkituaak, “Emiureishoyu intae; amu kayiolo ajo Yesu ing'oruru otashoki.

⁶Metii ene amu etopiwuo anaa enatejo ninye. Wootu eng'urai ewueji apa neirragieki.

⁷Naa enchom entasiooi entoliki lkipaareta lenyena entiaaki, ‘Etopiwuo aing'uaa lootuata; neituruko alo Galilaya, naa teine idolidolo.’ Entadamu enaidipa atoliki intae.”

⁸Nepuo nabo kata aaing'uaa enkurare te nkuretisho o te ng'ida sapuk, nekuet aaliki lkipaareta.

⁹Nenang'are Yesu ninche nejoki, “Entakuenya.” Nenyikaki ninche aaibung inkejek enyena aaserem.

¹⁰Nejoki Yesu, “Emiureishoyu; enchom entoliki ilalashera laainei meshomo Galilaya naa kaadol teine.”

¹¹Ore epuo te nkoitoi, nejing kulikae loo larripok atua enkanasa neliki ilapolosak kituaak imbaa pooki naataasate.

¹²Netumo ilpayiani te nebo, ore pee eidip aaiguanata, neisho isikarini impisai kumok aajoki,

¹³“Entiaaki olorere, lkipaareta lenyena ooetuo kewarie aapurroo kirura.

¹⁴Naa te nebaiki ele rorei nkiyiaa o lbalusui, nikirorie iyiook pee kintung'uaa intae enyamali.”

¹⁵Neya ninche impisai neas anaa enatiaakaki. Neibulunyeki ele rorei Ilyahudi o metabaiki taata.

¹⁶Nepuo lelo ooiteng'eni tomon o obo Galilaya o metabaiki oldoinyo otiaaka Yesu enchom.

¹⁷Ore pee edol neserem ninye; kake eing'asha kulikae.

¹⁸Nelotu Yesu enetii neirorie ajoki, “Aaishooki enkidimata pooki te keper o te nkop.

¹⁹Enchom entaa iloreren pooki lkipaareta laainei, nimbatisasa te nkarna e Papa o ene Nkerai o ene Nkiyang'et Sinyati:

²⁰ninteng'ening'ene meibung'a inaaitanapa intae pooki; amu atii te nebo intae nkolong'i pooki o metabau enkiting'oto e nkop.”