Read MAASAI REVISED PROTESTANT Matayo 6 Bible Online

Matayo 6 - MAASAI REVISED PROTESTANT bible

Matayo 6

¹“Eng'ura pee miasiasa isupati inyi te dukuya inkonyek oo ltung'ana ijojo pee edol ninche intae; amu ti ninkoko neijia nimitumutumu shunet te Papa linyi otii keper.

²“Ore ti nintayu iyie enkishooroto ino o lng'ur nimiosh emowuo, anaa enaiko isunkuro too nkajijik e ntumo o too nkoitoi, pee errep iltung'ana. Esipa ajoki intae, eidipa ninche aanoto enchunet enye.

³Kake ti nintayu iyie enkishooroto ino o lng'ur nimincho enkaina ino e kedianye metayiolo enaas ene tatene;

⁴pee eaku intokitin ninchooyo, inoo nkisudorot; naa ore Papa lino odol too nkisudorot, nikincho ninye olerrinyore.”

⁵“Naa ti niomonono nimitiuu anaa isunkuro, amu kenyor ninche aatoomon eitashoo too nkajijik e ntumo o too lojat oo nkoitoi naalala e nkanasa, pee etum aatodol iltung'ana. Esipa ajoki intae, eidipa ninche aanoto shunet enye.

⁶Kake ti niomon iyie, tijing'a olgilata lino, ore pee indip aikeno kutuk aji niomon Papa lino too nkisudorot, ore Papa lino odol too nkisudorot naa aikilaaki iyie.

⁷“Naa tiniomonono, emintaa irorei kumok anaa enaas iloreren, amu kedamu ninche aajo kening'i ninche te nkumoi oo rorei lenye.

⁸Emitiuu anaa ninche, amu keyiolo Papa linyi iniyieuu eton eitu iomonunu intae.

⁹Naa inji entejo: ‘Papa lang otii keper meitisinyi enkarna ino

¹⁰meeu enkitoria ino, metaasi eniyieu te nkop anaa enatiu te keper.

¹¹Inchoo iyiook ena olong endaa ang e anaake.

¹²Nipalaki iyiook inkitarruorrot ang, anaa eninikipalaki iyiook ilooinyal iyiook.

¹³Nimirikoki iyiook atua intemat, kake intajeu iyiook tialo ilo torrono.’

¹⁴ “Amu tinipalakiki intae iltung'ana inkitarruorrot enye, naa kepalaki sii ninye intae Papa linyi otii keper.

¹⁵Kake ti nimipalakiki intae iltung'ana inkitarruorrot enye, nemepalaki sii intae Papa linyi inkitarruorrot inyi.

¹⁶“Naa ti nieniene ate aapukoo, emitiu anaa isunkuro oosot inkomomi, amu keidisie ninche inkomomi enye, pee edol iltung'ana aajo etupukoitie. Esipa ajoki intae, eidipa aanoto shunet enye.

¹⁷Kake ore ti nipukoo iyie, iela endukuya ino nisuj enkomon ino;

¹⁸mikidol iltung'ana inchere itupukoiyie, kake kedol Papa lino otii inkisudorot; ore Papa lino odol too nkisudorot nikimputaki.

¹⁹“Emishumaki ate te nkop imasaa kiroteti, eneinosie oriri o olasai[1], negil ilapurrok, nepurroo,

²⁰Kake entushumaki ate te keper imasaa inyi kiroteti, enemeinosie oriri, anaa olasai, nemegil ilapurrok nemepurroo;

²¹amu ore enetii masaa inono kiroteti, naa ine eyooki atii oltau lino.

²²“Ore oltaa lo sesen naa enkong'u, metaa te neikishiaan enkong'u ino, neiput osesen lino pooki ewang'an.

²³Kake te naa torrono enkong'u ino neiput osesen lino pooki enaimin. Amaa te neaku ore ewang'an nikitii iyie naa enaimin: kebaa esapuko e ina aimin?

²⁴“Metii oltung'ani oidim aaisiaayia ilkituaak oaare amu keibayu obo nenyorru olikae; aashu eibung'are obo nemenu olikae. Mindimidimi aaisiaayia Enkai o Masaa, Enkai oo mpisai.

²⁵“Neaku ina pee ajoki intae, eminyamaliki enkishui inyi, aajo ainyoo inyanya, anaa ainyoo iokioko, anaa too seseni linyi aajo ainyoo inchopishopo. Ai melusoo enkishui alang endaa, nelusoo osesen alang nkilani?

²⁶Eng'ura imotonyi o loing'ang'e ajo meunisho nemeikesisho, nemeiturrurroki ilkompen neitoti ninche Papa linyi otii Keper. Aimirara intae kiroteti aalang ninche?

²⁷Ai ng'ae te intae oidim te neitanyamaluo atoponai enkadori enye entemata nabo?

²⁸“Kainyoo naa pee inyamalakiki inkilani? Entadamu intapuka e ong'ata enaikununye te nebulu; amu measisho ninche nemepiyaisho;

²⁹kake ajoki nanu intae eitu eishopi ninye Solomon te sikar enye pooki anaa nabo e kuna tapuka.

³⁰Amaa te neishop Enkai inkujit e ong'ata aiko neijia, naatai taata neyookini aanang'aki enkima taaisere, ai meitulusoo oleng aishop intae, lo tung'ana ooti enkirukoto?

³¹“Eminyamalu ijojo, ‘Kainyoo kinya?’ Anaa, ‘Kainyoo kiok?’ Anaa ‘Kainyoo kinchop?’

³²Amu nena pooki eing'oru iloreren lemeyiolo Enkai; amu eyiolo Papa linyi le keper ajo iyieuu nena pooki.

³³Kake entang'as eng'oru enkitoria enye o sipat enyena; naa keponikini intae nena pooki.

³⁴Metaa eminyamalaki ine ntaaisere amu enyamalaki e ntaaisere kewan. Eidip enkolong intorrok enyena.