Read MAASAI REVISED PROTESTANT Matayo 9 Bible Online

Matayo 9 - MAASAI REVISED PROTESTANT bible

Matayo 9

¹Neked Yesu empeut nelang alo enkanasa enye.

²Neyakini oltung'ani maima, eirrag te rruat; ore pee edol Yesu enkirukoto e lelo tung'ana, nejoki ilo maima, “Nakerai, ntagoluoyu to ltau amu kitapalakaki ng'ok inono.”

³Nejo kulikae aiteng'enak loo nkitanapat maate, “Enkai emor ele tung'ani.”

⁴Neyiolou Yesu ndamunot enye nejoki, “Aainyo pee mbirribirrirri ntorrok too ltauja linyi?

⁵Kaa nalelek, te neji ‘Kitapalakaki ng'ok inono,’ ana te neji, ‘Inyo shomo?’

⁶Kake ore pee itumutumu aatayiolo aajo, keeta Enkerai e Tung'ani engolon te nkop napalakinye iltung'ana ng'ok,” nejoki ilo maima, “Inyo, tudumu erruat ino, shomo ang.”

⁷Neinyototo ilo tung'ani, nelo ang.

⁸Kake ore pee edol iltung'ana kumok, neureishoyu neisho Enkai enkitoo naishoo ltung'ana engolon naaijo ina.

⁹Ore eimita Yesu ine nedol oltung'ani oji Matayo, eton te nelakieki kodi nejoki, “Tusujuaki,” neinyototo asuj.

¹⁰Eaku ore eton Yesu teina aji e Matayo anya endaa, nepuonu ilasotok le kodi o laing'okok kumok netoni te nebo Yesu o lkipaareta lenyena.

¹¹Ore pee edol Ilfarisayo ina, nejoki lkipaareta lenyena, “Aainyo pee eng'arie Olaiteng'enani linyi endaa ilasotok le kodi olaing'okok?”

¹²Kake ore pee ening Yesu, nejo, “Meyieu ilememuoi olabaani, kake iloomuoi ooyieu.

¹³Enchom enteng'ena ate eneikununo ele rorei, ojo, ‘Olng'ur ayieu mme olasar;’ amu eitu alotu aipot isupati kake ilaing'okok.”

¹⁴Nepuonu ina kata lkipaareta le Yohana enetii Yesu nejoki, “Aainyo pee kipukoo oleng iyiook o Lfarisayo, nemepukoo lkipaareta linono?”

¹⁵Nejoki Yesu ninche, “Keidim ilchoreta lo loyamishe aaishira eton eboitare oloyamishe? Kake kepuonu nkolong'i naayae olayamishe aaitung'uaa ninche, ina kata kenya epukoo.

¹⁶“Meetae oltung'ani oripaki enkarasha ng'ejuk enkila musana; amu ore ina natipikaki nepolos enkila, neponari apolosa.

¹⁷Nemepik sii iltung'ana enaisho ng'ejuk oo sabibu ilbenia musan; naa te nepik nepolosa ilbenia, neibukori enaisho oo sabibu nepolosa sii Lbenia; kake ilbenia ng'ejuko epiki pee erripi pokira are.”

¹⁸Ore eton eliki Yesu ninche kuna baa, nelotu oltung'ani oitore enkaji e ntumo negilaki Yesu kung nejoki, “Etua te na kata entito ai, kake wou inteleiki enkaina ino pee epiu ninye.”

¹⁹Neinyototo Yesu o lkipaareta lenyena nesuj ninye.

²⁰Nelotu enkitok te siadi ninye, naturuke osarge larin tomon o are, neiseyie olcholoi lo lkila lenye; amu etejo to ltau lenye,

²¹“Te naiseyie ake olcholoi lo lkila lenye naishiu.”

²²Neibelekenya Yesu nedol ninye, nejoki, “Naito, intagoluoyu amu kinchiunye enkirukoto ino.” Neishiu ina kitok aiteru teina kata ake.

²³Ore pee elotu Yesu enkaji eilo oitore enkaji e ntumo nedol ilookut indulen o lorere eilepilep oleng,

²⁴nejoki, “Ewuang'a amu eitu eye entito, keirura.” Nekueniyie ninche aayiet.

²⁵Ore pee eidipi aaipung'ie olorere, nejing neibung enkaina enye, neinyototo entito.

²⁶Neibulu kulo omon ilo kerenket pooki.

²⁷Ore pee egiroo Yesu ine nesuj iltung'ana aare modook ooishiraki aajoki, “Ing'urrie iyiook enkerai e Daudi.”

²⁸Ore pee ebaiki aji, nepuonu ilmodook enetii, nejoki Yesu ninche, “Irukuruku aajo kaidim ataasa ena?” Nejoki, “Ee lo kitok.”

²⁹Neiseyie nkonyek enye nejo, “Inchoo etiu anaa enkirukoto inyi.”

³⁰Nebolo inkonyek enye. Neitanap Yesu nereiki ajoki ninche, “Entodol emincho hoo oltung'ani obo eyiolou.”

³¹Kake eipung'o nepuo aaibulunye ilomon lenyena ilo kerenket pooki.

³²Ore pee eipang lelo, neyakini Yesu oltung'ani lemeiro otijing'a oloirirua.

³³Ore pee earaa oloirirua, neiro ilo lemeiro apa, neing'asia iltung'ana kumok nejo, “Eitu ae kata edoli ena tiatua enkop oo Siraeli.”

³⁴Kake etejo Lfarisayo, “Engolon oo loiriruani eararie Yesu iloiriruani.”

³⁵Neman Yesu inkang'itie pooki sapuki o nkutiti, neiteng'enisho too nkajijik enye e ntumo, nelikioo ilomon supati le nkitoria e keper, neishiunye pooki keeya o pooki pukunoto e muoyian.

³⁶Ore pee edol ninye olorere netum olng'ur te ninche amu eteekate ninche, nelepori neidapashari netiu anaa ntare nemeeta olchekut.

³⁷Nejoki Yesu lkipaareta lenyena, “Esipa aisapuk enkikesare kake kuti ilaisiaayiak.

³⁸Kaae, entoomon naa Olaitoriani liopeny enkikesare meirriu ilaisiaayiak atua enkikesare enye.”