Read MAASAI REVISED PROTESTANT Marko 1 Bible Online

Marko 1 - MAASAI REVISED PROTESTANT bible

Marko 1

¹Nji eikununo enkiterunoto oo lomon supati le Yesu Kristo Enkerai e Nkai.

²Anaa enaigero oloiboni le Nkai oji Isaya pee ejo, “Kairriwaa olkipaaret lai dukuya iyie, oitobir enkoitoi ino.

³Etii oltoilo obuaku ti ong'ata, ‘Entobiraki Olaitoriani enkoitoi, entobiraki irrekiei ooitoriori.’”

⁴Neipang'u ti ong'ata Yohana Olaibatisani, nelimu enkibatisa nayau enkirridunoto neyau empalakinoto oo ng'ok.

⁵Nepuo enetii ninye iltung'ana le nkop pooki e Yudea, o le Yerusalem, neibatisa Yohana ninche to lkeju le Yordan eirridu ing'ok enye.

⁶Naa enkila oo lpapit e ntames eishopito Yohana neeta enkeene e mpolos, naa lmaat o naishi e ong'ata enya.

⁷Nelikioo ninye ejo, “Kelotu te siadi nanu ologol laalang nanu olaa kaamakua te nairrugokino alak enkeene e namuke enye.

⁸Aidipa nanu aibatisa intae te nkare kake te Nkiyang'et Sinyati eibatisa ninye intae.”

⁹Nelotu Yesu te nena olong'i eing'uaa enkanasa e Nasaret te Galilaya, neibatisa Yohana ninye to olkeju le Yordan.

¹⁰Ore nabo kata pee eilepu Yesu te nkare, nedol pee ebolo keper nedou Enkiyang'et Sinyati eikununo anaa enturkuluo adoiki ninye;

¹¹nelotu oltoilo oing'uaa keper ojo, “Ira iyie Oinoti lai lanyor; atishipe te iyie.”

¹²Ore nabo kata nerik Enkiyang'et e Nkai Yesu ong'ata.

¹³Nebik ti ong'ata nkolong'i artam, etemita Sheitani; neboitare ng'uesi e ong'ata; neisiaai ilmalaika ninye.

¹⁴Ore eidipaki aateen Yohana, nelotu Yesu Galilaya, alikioo lomon Supati le Nkai;

¹⁵ejo, “Etabaua enkata, netinyikua enkitoria e Nkai; erridutu, naa eruko ele rorei supat.”

¹⁶Ore eshepita Yesu enaiposha e Galilaya, nedol Simon o Andrea olalashe le Simon enang'aki orreshet atua enaiposha; amu ilarreshok loo sinkir apa ninche.

¹⁷Nejoki Yesu ninche, “Entusujuaki pee aitaa intae ilarreshok loo ltung'ana.”

¹⁸Neing'uaa nabo kata irresheta lenye nesuj Yesu.

¹⁹Ore pee enyikaa peno, nedol Yakobo o Yohana ilayiok le Sebedayo etii atua empeut eripita irresheta.

²⁰Neipot nabo kata; neing'uaa Sebedayo menye lenye te mpeut eboitare ilaisiaayiak nesuj Yesu.

²¹Nepuo Yesu o lkipaareta lenyena aabaya Kapernaum. Ore ake pee eaku enkolong e Sabato nejing enkaji e ntumo neiteng'enisho.

²²Neing'asiae te nkiteng'enare enye, amu eiteng'ena ninche anaa oloitore enajo, nemetiu anaa ilaigerok.

²³Netii teina kata ake te nkaji enye e ntumo oltung'ani oata oloirirua oiduruk;

²⁴nebuaku ajo, “Kainyoo iatayie iyie iyiook, Yesu le Nasaret? Iewuo aidaikie iyiook? Kaayiolo ajo ira ng'ae, ira iyie ilo Sinyati le Nkai.”

²⁵Kake eisikong'a Yesu ninye ajoki, “Tigirayu, tupuku tung'uai ninye!”

²⁶Nediding'unye oloirirua aiterreyie, nebuaku to ltoilo sapuk, nepuku aing'uaa.

²⁷Neing'asia pooki, o meikilikuanata aajo, “Kainyoo ena? Enkiteng'enare ng'ejuk! Eji keitore te ngolon iloiriruani ooiduruk, nening ninche ninye.”

²⁸Ore ina kata ake, neibulu olning'o lenye pooki wueji te nene neemanita Galilaya.

²⁹Nepuku Yesu te nkaji e ntumo, nejing enkaji e Simon o Andrea, eboitare Yakobo o Yohana.

³⁰Neirrag enkaputani e Simon emuoi oloirobi, neinosakini ninye teina kata.

³¹Nelotu neibung enkaina nedumu, neing'ueiki oloirobi, neinyototo aisiaai ninche.

³²Ore pee eaku teipa, etadoyie enkolong, nerikokini Yesu iltamuoyia pooki o lelo ooata loiriruani.

³³Nesotokino enkanasa pooki enkalo e kutuk aji.

³⁴Neishiunye ilkumok ooata muoyiaritin oo mpukunot kumok, nearaa iloiriruani kumok; neitu eisho iloiriruani meiroro amu keyiolo ninche ninye.

³⁵Ore enasirie, neinyototo Yesu ayok alo ewueji neliyio neomon teine.

³⁶Neing'oru Simon o lelo ooboitare.

³⁷Ore pee etum nejoki, “King'oru ltung'ana pooki.”

³⁸Nejoki Yesu ninche, “Emaape kunda kulie ang'itie, pee aliki sii ninche, amu ina doi pee aewuo enkop.”

³⁹Neman Yesu Galilaya pooki, alikioo ilo rorei too nkajijik enye e ntumo, nearaa loiriruani.

⁴⁰Nelotu oltung'ani oata enkeeya oo lbolot asai Yesu, negilaki kung nejoki, “Tiniyieu eikindim aishiunye matisikayu.”

⁴¹Neing'urrie Yesu, neitorioo enkaina aiseyie, nejoki, “Ekayieu, tisikayu.”

⁴²Neing'uaa enkeeya oo lbolot nabo kata ilo tunga'ani, nesika.

⁴³Neing'ode Yesu oleng nereu nabo kata,

⁴⁴nejoki, “Toduaa ake miliki likae tung'ani; kake shomo intoduaai kewan to lapolosani; ninchooyo entoki apa naitanapishe Musa te nkisujata, pee intadedeyie to lorere.”

⁴⁵Kake etupukuo ake ilo tung'ani neiteru ainosaa, aibalie ilo omoni, neaku eitu eitoki Yesu aidim atijing'a enkang eduaakini, neaku ti ong'ata eton; nepuonu ltung'ana aayiaya eing'uaa nkaloli pooki.