Read MAASAI REVISED PROTESTANT Marko 10 Bible Online

Marko 10 - MAASAI REVISED PROTESTANT bible

Marko 10

¹Nedumunye Yesu teina alo, nelotu olkerenket le Yudea te lido kekun le Yordan, neiturrurrokino ninye aaitoki iltung'ana kumok enetii ninye; neitoki ake aiteng'en ninche anaa enatamoo apake.

²Nepuonu Ilfarisayo enetii ninye neikilikuan, ejo pee etem aajoki, “Keishiaakino te neiturraa oltung'ani enkitok enye?”

³Newaliki Yesu ajoki, “Kaa eitanapa intae Musa?”

⁴Nejoki, “Eishorua Musa meigeroki oltung'ani enkitok enye empalai naiturrarie, nearaa.”

⁵Kake etiaaka Yesu ninche, “Te nkaraki engolon oo ltauja linyi pee etisiraka intae ina kitanapata.

⁶Kake ore ebaiki enkiterunoto e nkop, eitobira Enkai olee o eng'oruoi.

⁷Te nkaraki ena pee eing'uaa olee menye o ng'otonye, neibung'are enkitok enye,

⁸neaku ninche pokira are osesen obo, Metaa meekure era are kake etaa osesen obo.

⁹Ore naa inaaitutumo Enkai mincho ake erish oltung'ani.”

¹⁰Ore ti aji neitoki ake lkipaareta lenyena aaikilikuan ena bae.

¹¹Nejoki ninye ninche, “Ore ake oloiturraa enkitok enye neyam ae, keloloito.

¹²Naa te neiturraa enkitok olmoruo lenye, nelo meyama likae, keloloito.”

¹³Neyakini Yesu nkera kutiti pee etum aiteleiki nkaik, nebuaaki lkipaareta lenyena lelo tung'ana ooriku.

¹⁴Ore pee edol Yesu ina, negoro, nejoki lkipaareta lenyena, “Enchoo nkera epuonu enatii emimitiki; amu enoo nkera naatiu anaa kuna enkitoria e Nkai.

¹⁵Kesipa ajoki intae, ore olemeng'amu enkitoria e Nkai anaa enang'amu enkerai kiti, nemejing katukul.”

¹⁶Nemuataki inkera inkaik amayian, neiteleiki nkaik nemayian ninche.

¹⁷Ore te nkoitoi epuku Yesu alo, nekuetiki oltung'ani negilaki kung, neikilikuan ajoki, “Olaiteng'enani supat, kaji aiko pee ajung enkishui nemeish?”

¹⁸Nejoki Yesu, “Kaji etiu pee kijo nanu supat? Meetae hoo obo supat, Enkai ake esupat.

¹⁹Iyiolo iyie nkitanapat, inchere, ‘Miar metua, miloloito, mipurrisho, minteeniki likae elejare, minkonyisho to losek, iyanyita minyi o ng'utunyi.’ ”

²⁰Nejoki ninye, “Olaiteng'enani, aibung'a kuna pooki ebaiki apa ara enkerai.”

²¹Neing'or Yesu ninye akurraki nkonyek nenyorru, nejoki, “Nabo ake nikitong'orikia; shomo, timira iniata pooki nincho laisinak, naa itum olchumati te keper; nikilotu taa asuj.”

²²Neidisie enkomom enye teina bae, nelo eisinanuo; amu keeta imasaa kumok.

²³Neing'or Yesu nkaloli pooki, nejoki lkipaareta lenyena, “Kegol atiu aja to lkarsis pee ejing enkitoria e Nkai!”

²⁴Neing'asia lkipaareta too rorei lenyena. Kake eigilie Yesu ajoki, “Nakera, kegol atiu aja pee ejing oltung'ani enkitoria e Nkai!

²⁵Entames nalelek te neim enaudoto o ltidu alang olkarsis ejing enkitoria e Nkai.”

²⁶Neing'asia lkipaareta lenyena oleng, nejoki ninche ninye, “Ae ng'ae naa kenya oidim atajeu?”

²⁷Neing'or Yesu ninche nejoki, “Meidimayu too ltung'ana, kake mme neijia etiu te Nkai; amu keidimayu mbaa pooki te Nkai.”

²⁸Neiteru Petero ajoki ninye, “Kitung'uaitie iyiook pooki toki aasuj iyie.”

²⁹Nejo Yesu, “Esipa ajoki intae, meetae hoo obo otung'uayie enkaji anaa lalashera anaa nkanashera anaa ng'otonye anaa menye anaa nkera anaa nkurman, te nkaraki nanu o te nkaraki kulo omon supati,

³⁰lemetum inkatitin iip taata te na kata, aa nkajijik o lalashera o nkanashera o noo ng'otonye o nkera o nkurman te nebo oloisilisili, naa ore te ina kata nalotu netum enkishui nemeish.

³¹Kake etii ilkumok ooiturukutuo ooyooki aaku ile siadi, neaku ilooisiadutua ile dukuya.”

³²Ore etii Yesu o lkipaareta lenyena enkoitoi, eilep aapuo Yerusalem eiturukito Yesu te dukuya ninche; neing'asia ninche, ore iloosujita netureishote. Neitoki ake arik lelo tomon o aare neiteru aliki nena naapuo aatum ninye.

³³Nejoki, “Yerusalem kilep aapuo; naa keitarasakini Enkerai e Tung'ani ilapolosak kituaak o laiteng'enak loo nkitanapat, nedung'oki ninche ninye enkiguana e keeya, neitarasaki Iloreren;

³⁴nesukeny ninche ninye, nenotaki, neosh aaitame near metua ore pee eishari nkolong'i uni nepiu.”

³⁵Neisho Yakobo o Yohana, ilayiok le Sebedayo, nepuonu enetii Yesu, nejoki, “Olaiteng'enani, kiyieu nintaas iyiook embae ake pooki nikiomon iyie.”

³⁶Nejoki ninye ninche, “Kainyoo iyieuu naitaas intae?”

³⁷Nejoki ninche, ninye, “Inchoo iyiook metotona obo lang te nkaina ino e tatene neton olikae te ne kedianye, te nkitoo ino.”

³⁸Kake etiaaka Yesu ninche, “Miyiololo intae ina niomonunu. Indimidimi sa aatook enkikompe naok nanu, aashu meibatisai intae te nkibatisa naaibatisai nanu?”

³⁹Nejoki, “Ee kindim.” Nejoki Yesu ninche, “Iokioko taa ninye enkikompe naok nanu, neibatisae intae te nkibatisa naaibatisai nanu;

⁴⁰kake ore entonata te nkaina ai e tatene aashu te ne kedianye, mme nanu oishoru, kake ene lelo laa ninche eitobirakaki.”

⁴¹Ore pee ening lelo pokira tomon ina, neiteru aagorokino Yakobo o Yohana.

⁴²Neipotu Yesu ninche enetii nejoki, “Iyiololo aajo ore lelo ooitaa ate ilaitoriak loo Loreren neitoreisho te ng'olon, negilu iltung'ana lenye kituaak ninche.

⁴³Kake mme neijia etiu te intae, kake ore olinyi oyieu neaku kitok neaku olaisiaayiani linyi,

⁴⁴ore oloyieu neituruk neaku osinka le pooki.

⁴⁵Amu eitu elotu Enkerai e Tung'ani meisiaai kake keewuo aisiaaisho, neishoru enkishui enye metaa elakunoto oo lkumok.”

⁴⁶Nepuonu Yeriko; ore epuo aaing'uaa Yeriko eiriamariyie Yesu lkipaareta lenyena o lorora kitok, netii olmodooni oomonisho oji Bartimayo ole Timayo, oton te mbata e nkoitoi.

⁴⁷Ore pee ening eji Yesu le Nasaret ilo neiteru abuak eishiraki ajo, “Yesu, olayioni le Daudi, ing'urrieki!”

⁴⁸Nebuaaki ilkumok aajoki metigirayu; kake etabuaa oleng ajo, “Olayioni le Daudi, ing'urrieki nanu!”

⁴⁹Neitashe Yesu nejo, “Empoto.” Neipoti ilo tung'ani modooni aajoki, “Intagoluoyu; inyo amu kimpot ninye.”

⁵⁰Nenang'aa olkila lenye, neipid nelo enetii Yesu.

⁵¹Neng'amaa Yesu ajoki, “Kaa iyieu naaitaas?” Nejoki ilo modooni, “Lo kitok kayieu nadolishoyu.”

⁵²Nejoki Yesu, “Shomo, kinchiunye enkirukoto ino.” Nedolishoyu ina kata ake neirukurukore Yesu te nkoitoi.