Read MAASAI REVISED PROTESTANT Marko 11 Bible Online

Marko 11 - MAASAI REVISED PROTESTANT bible

Marko 11

¹Ore pee etaaniki ninche embata e Yerusalem, aabaiki Betfage o Betania, to Ldoinyo loo Loirienito, neirriwaa Yesu lkipaareta aare lenyena,

²nejoki, “Enchom enda ang naipirare intae, ore ake pee ijing'ijing'i nitumutumu olkurrarru oena, leitu ae kata eked likae tung'ani. Entalaku entereu ene.

³Ore te nejoki intae oltung'ani, ‘Kainyoo pee inkoko inji?’ Entejo, ‘Olkitok oatayie enkolat naa keshuku nabo kata.’ ”

⁴Nepuo ninche, neinepu olkurrarru eena te kishomi ti auluo enkoitoi nalala e nkanasa, nelaku ninche.

⁵Nejoki lelo ooitashe teine, “Kainyoo pee igirara aalaku olkurrarru?”

⁶Neliki ina natiaaka Yesu, neisho ninche meshomo.

⁷Nerewaki Yesu ilo kurrarru, neirotoki lkilani lenye, neked atonie.

⁸Neisalaash ilkumok lenye lkilani te nkoitoi nalala, neisalaash kulikae ilng'osil ooata mbenek ootudung'utuo too nkurman.

⁹Ore lelo ooituruk o loosujita nebuaku aajo, “Hosana! Emayiana ilo olotu te nkarna o Laitoriani!

¹⁰Emayiana enkitoria nalotu e papa lang Daudi! Hosana te shumata naisul!”

¹¹Nejing Yesu Yerusalem, nelo atua enkaji e Nkai, ore pee eshil pooki toki, nemuto, neipang alo Betania o lelo pokira tomon o aare.

¹²Ore te nkolong nasujita ina, pee eshukunye Yesu te Betania, netir esumash.

¹³Ore pee edol te nelakua olng'aboli oata mbenek, nelo ejo ebaiki netumie toki. Nejo abaiki, mbenek ake eeta, amu mme enkata oo lng'abolo.

¹⁴Nejoki ilo ng'aboli, “Metaa mikingil likae anyayie lng'anayio ntarasi.” Nening lkipaareta lenyena.

¹⁵Nepuonu Yerusalem. Nejing Yesuenkaji e Nkai neiteru aaraa lelo oomirisho o looinyang'isho te nkaji e Nkai, neibeleleng'oo imisai oo laibelekenyak loo mpisai o lorikan le lelo omir inturkuluoni;

¹⁶nemit meitoki oltung'ani anap toki aitudung enkaji e Nkai.

¹⁷Neiteng'enisho, nejoki ninche, “Keitu eigeri aajo, ‘Keaku enkaji ai ene sayiare too loreren pooki?” Kake intaa intae enkapune oo laisimak.

¹⁸Nening ilapolosak kituaak o laiteng'enak loo nkitanapat ina neing'oru enkoitoi pee ear Yesu; kake etureita ninye, amu eing'asiayie enkikoo enye ilo orora pooki.

¹⁹Ore pee ebau enteipa neipang teina anasa.

²⁰Ore epuoito te nkakenya, nedol olang'ole ng'aboli etoyio o metabaiki intona.

²¹Nedamu Petero nejoki Yesu, “Olaiteng'enani, ng'ura ajo etoyio olang'ole ng'aboli litediaa!”

²²Newaliki Yesu ajoki, “Eruko Enkai.

²³Esipa ajoki intae, ore ake olojoki ele doinyo, ‘Tadotunye tanang'akinoyu enaiposha’, nemeing'ash to ltau lenye, kake neiruk ina najo nchere keaku, neaku te ninye anaa enatejo.

²⁴Metaa ajoki intae, ore embae ake pooki ninkilikuanunu te nkomono, eruko nchere itumutumu neaku ina.

²⁵Naa ore nkatitin pooki nintasheshe aaomon, entapalakinoto pee epalaki sii ninche intae Papa linyi otii keper nkitarruorrot inyi.

²⁶(Kake ti nimipalakinono, nemepalaki sii ninye Papa linyi otii keper intae nkitarruorrot inyi.)”

²⁷Neitoki ake aapuonu Yerusalem. Ore eloolo Yesu te nkaji e Nkai, nepuonu aayiaya ninye ilapolosak kituaak o lasirak o lpayiani.

²⁸Nejoki ninche ninye, “Kaa golon ena niaasie iyie kuna baa, naa ae ng'ae likinchoo ena golon niasie?”

²⁹Nejoki Yesu ninche, “Kaikilikuan intae embae nabo; entawalikiaki pee, aliki intae engolon naasie kuna baa.

³⁰Amaa apa enkibatisare e Yohana ae keper eing'uaa anaa ei ltung'ana? Entawalikiaki.”

³¹Neishankarra aajo maate, “Ti nikijo, ‘Keper eing'uaa,’ naa kejoki iyiook, ‘Oo naa pee eitu irukuruku?’

³²Kake ti nikijo, ‘Ltung'ana eing'uaa?’ ” Neureyu iltung'ana, amu etonyorraitie pooki inchere oloiboni le Nkai o dede Yohana.

³³Neaku etawalikitia Yesu aajoki, “Mikiyiolo.” Nejoki Yesu ninche, “Maliki sii nanu intae eneing'uaa enkitoria naasie kuna baa.”