Read MAASAI REVISED PROTESTANT Marko 12 Bible Online

Marko 12 - MAASAI REVISED PROTESTANT bible

Marko 12

¹Neiteru Yesu airorie ninche too nkitanyaanyukot ajoki, “Etuuno oltung'ani enkurma oo sabibu, neitaman enkikarrata, neturu engumoto naironyieki lng'anayio, neshetu oltalet oodo, neitaaki laturok enkurma enye, nelo enkop nalakua.

²Ore pee ebau enkata enye, neirriwaki lelo aturok osinka, meishoo ematua oo lng'anayio le ina kurma.

³Neibung lelo aturok ilo sinka near, nearaa meeta toki.

⁴Neitoki ake airriwaki likae sinka, nebor ilo elukunya, neinyal aasul.

⁵Neirriwaki ake likae, near ilo metua; neiko sii neijia kulikae kumok, neosh kulikae near kulikae metuata.

⁶Neaku eton apa eeta likae obo, laa oinoti lenye kirotet; neirriwaki aitabayie ninye, nejo, ‘Keyanyit oinoti lai.’

⁷Kake etiakinote lelo aturok ooitaakaki enkurma, ‘Ele doi olajung'oni; wootu, mataar metua pee eaku enaang enjung'ore.’

⁸Neibung ninche ninye near metua, nenang'aki auluo ina kurma oo sabibu.

⁹Kaa kenya eitaas olopeny ina kurma oo sabibu? Kelotu kenya aidaikie lelo aturok neisho ninye kulikae enkurma oo sabibu.

¹⁰Keitu doi isumusumu ele kigeroto ojo, ‘Ilo soit otanyaita ilashetak otaa osoit kitok lo lmairroto;

¹¹Olaitoriani otaasa ena, naa ene nking'asia too nkonyek ang’?”

¹²Neing'oru ninche eneiko pee eibung Yesu, kake etureita olorere, amu etayioloito aajo ninche eipirta ina kitanyaanyukoto; neaku eshomo aaing'uaa.

¹³Neirriwakini Yesu ematua oo Ilfarisayo o ematua oo le ncholiek e Herode, pee epuonu aarresh too rorei lenyena.

¹⁴Nepuonu enetii nejoki, “Olaiteng'enani, kiyiolo aajo ira iyie, asipani, nimishilaa hoo iyie likae tung'ani; amu mishilaa enkitoo oo ltung'ana, kake enkoitoi ake e Nkai iutaa too sipat. Keishiaakino te nikincho Kaisari kodi, anaa aimeishiaakino?

¹⁵Aikilak, ana aimikilak?” Kake ore amu etayiolo Yesu esunkuroisho enye, nejoki, “Kainyoo pee kitemiteme? Eyakaki empisai, maing'ura.”

¹⁶Neyakini. Nejoki ninche, “Ai ng'ae ele osirakino ena pisai naa ae ng'ae eigero?” Nejokini, “Kaisari.”

¹⁷Nejoki Yesu ninche, “Enchoo Kaisari ine Kaisari, ninchosho Enkai ine Nkai.” Neing'asiakino ninche Yesu oleng.

¹⁸Nepuonu Sadukayo enetii Yesu, lelo taa oojo eji meetae empiunoto; neikilikuan aajoki;

¹⁹“Olaiteng'enani, eigeroko Musa iyiook nchere te neye oltung'ani alashe olikae, neing'uaa enkitok meeta enkerai, neyam olalashe ina kitok, pee eiki olalashe nkera.

²⁰Eetae apa lalashera oopishana; neyam olbotor enkitok, ore pee eye neitu eing'uaa nkera.

²¹Neyam oliaare, neye neitu eiu nkera; naa neijia eikuna oliokuni;

²²neaku eitu eing'uaa nkera pokira oopishana. Ore te nkiting'oto neye ina kitok.

²³Amaa kenya te mpiunoto oo lootuata, keaku ene ng'ae ina kitok? Amu eyama naa pokira oopishana?”

²⁴Nejoki Yesu ninche, “Eijojo mme nji taa doi etiu pee ipong'oriri, mme ilkigerot miyiololo nimiyiololo sii engolon e Nkai?

²⁵Amu te nepiu kenya lelo too lootuata, meyamisho nemeyami, kake ketiu anaa lmalaika te keper.

²⁶Naa amaa doi enkitopiunoto oo lootuata, keitu isumusumu too nkitanapat e Musa, te noshi wueji neimaki osanag oyupuyup, pee ejoki Enkai ninye. ‘Ara nanu Enkai e Abraham, o Enkai e Isaak o Enkai e Yakobo?’

²⁷Mme Enkai oo lootuata ninye, kake enoo looishu, itapong'ori oleng.”

²⁸Nelotu obo loo laiteng'enak loo nkitanapat nening eishankarra, ore pee ening ajo etawalikia Yesu aitobiraki, neikilikuan ninye ajoki, “Kaa kitanapata naituruk?”

²⁹Newaliki Yesu ajoki, “Ena naituruk, ‘Toning'o iyie Siraeli; Enkai ang Olaitoriani; obo Olaitoriani;

³⁰naa tonyorra Olaitoriani Enkai ino to ltau lino pooki, o te nkishui ino pooki, o te ng'eno ino pooki, o te ngolon ino pooki.’

³¹Naa ena eniare, ‘Tonyorra ole latia ino anaa eninyor kewan.’ Meetae ae kitanapata kitok nalang nena.”

³²Nejoki ilo aiteng'enani loo nkitanapat, “Itisipa, Olaiteng'enani; itisipa nchere nabo Enkai, nemeetae likae leme ninye;

³³naa ti ninyorru ninye to ltau lino pooki o te ng'eno ino pooki, o te ngolon ino pooki, ninyorru sii ole latia ino anaa eninyor kewan, nelang nena kishorunot pooki naapeji elulung'a nelang ilasarri ake pooki.”

³⁴Ore pee edol Yesu ajo etawalikia te ng'eno, nejoki, “Milakuaniki iyie enkitoria e Nkai.” Ore ebaiki ina kata, metii oltung'ani onyaaka aitieu aikilikuana Yesu ae bae.

³⁵Ore eiteng'enisho Yesu te nkaji e Nkai, nejo, “Kaji etiu pee ejo laiteng'enak loo nkitanapat Kristo eji olayioni le Daudi?

³⁶Netejo Daudi openy, etuutaka Enkiyang'et Sinyati, nchere, ‘Etiaka Olaitoriani, Olaitoriani lai, Totona te nkaina ai e tatene, o matipika lmang'ati linono abori nkejek inono.’

³⁷Eipoto Daudi openy ajo Olaitoriani; kaji eitoki aakunye enkerai enye?” Neinining ilo orora kitok ninye te ng'ida.

³⁸Ore eiteng'enisho Yesu nejo, “Entodol ake ate too laiteng'enak loo nkitanapat, oonyor aaishopo lkilani adoru neyieu neirorokini too neemirishoreki,

³⁹nenyor ilorikan le nkitoo too nkajijik e nkomono o wuejitin e nkitoo too mashoi,

⁴⁰nedaare nkajijik oo nkolia neitaakuno eitoodor enkomono. Keyooki lelo aatum enkiguana kitok.”

⁴¹Neton Yesu aishiaakinore eneitadoikini mpisai e nkaji e Nkai, nejur olorere epik mpisai ilo sanduku. Nepik iltung'ana kumok karsisi te nkumoi.

⁴²Nelotu enkoliai aisinani, nepik isuyan are naabaya olking'otore obo.

⁴³Neipotu Yesu lkipaareta lenyena enetii, nejoki, “Esipa, ajoki intae, etipika ena oliai aisinani nkumok alang lelo kulikae pooki ootipika ilo sanduku.

⁴⁴Amu etipika pooki te nkumoi naata; kake ore ninye to sina lenye netipika entoki duoo pooki naata, entoki duoo pooki naishuyie.”