Read MAASAI REVISED PROTESTANT Marko 14 Bible Online

Marko 14 - MAASAI REVISED PROTESTANT bible

Marko 14

¹Ore etaa nkolong'i are naatiooyo pee ebau Pasaka, nebau sii osirua loo Mukateni Nemeisuiisheki. Neing'oru ilapolosak kituaak o laiteng'enak loo nkitanapat eneiko pee eibung Yesu to losek, aar metua;

²amu etejo ninche, “Neme taa te nkata o sirua, mepuku ake olong'oling'oli lo lorere.”

³Ore etii Yesu Betania enkaji e Simon oata enkeeya oo lbolot. Ore einosita endaa, nejing'u enkitok naata oltulet lo soit oji alabasta nebore eilata narropil naleng naji nardo, nagol oleng enkinyang'unoto, nedany ilo tulet nebukoki ina ilata elukunya e Yesu.

⁴Kake etii ilootagorote nejokino, “Kainyoo pee eitarruoyioki ena ilata narropil aaiko inji?

⁵Amu anaata etimiraki ena ilata aainosie dinari iip uni, neishori laisinak.” Neing'unyung'unyaki ina kitok.

⁶Nejo Yesu, “Entapal, kainyoo pee intanyamalala? Nanu eitaasa embae naikishian oleng.

⁷Amu iatata laisinak anaake, naa te niyieuu, indimidimi ake aaitaasa ninche isupati; kake mikiaatata nanu anaake.

⁸Etaasa anaa enaidima; osesen lai eitera ael eton eitu enukari.

⁹Naa kesipa, ajoki intae, ore pooki wueji nelikiorieki ele rorei supat te nkop pooki, neinosari ena nataasa edamunyeki ninye.”

¹⁰Nelo Yudas Iskariot laa obo le lelo tomon o aare enetii ilapolosak kituaak pee etum atakaldai Yesu te ninche.

¹¹Ore pee ening ninche neshipayu neisiligie aajo keisho mpisai. Neing'oru Yudas erishata nakaldarie Yesu.

¹²Ore te nkolong e dukuya e nkata oo Mukateni Nemeisuiishieki, enkolong apa nayieng'i ilkuoo, oodamunyeki Pasaka, nejoki lkipaareta lenyena Yesu, “Kaji iyieu nikipuo aaitobir pee inyayie Pasaka?”

¹³Neirriwaa lkipaareta lenyena aare, nejoki, “Enchom enda anasa, ore pee enang'are intae oltung'ani onapita emoti e nkare; erukurukore,

¹⁴ore ake enejing, entiaaki olopeny enkaji. ‘Etejo Olaiteng'enani, Koree enkaji ai oo lomon, nainosie Pasaka te nebo lkipaareta laainei?’

¹⁵Naa keitodol intae enkaji e shumata nalala naitobira; teine entobiraki iyiook.”

¹⁶Nedumunye lkipaareta lenyena nepuo ina anasa, neinepu etiu anaa enatiaakaki neitobiraki Pasaka.

¹⁷Ore pee eaku teipa nelotu Yesu o lelo tomon o aare.

¹⁸Ore etoni aanya endaa, nejo Yesu, “Esipa, ajoki intae, kaakaldaa obo linyi, oloinosita endaa te nebo nanu.”

¹⁹Neiteru lkipaareta aaisinanuo, nejoki maa obo ninye, “Ke nanu sa?”

²⁰Nejoki Yesu ninche, “Obo doi le kulo tomon o aare, obo oitadoiki emukate embakuli te nebo nanu.

²¹Amu elo ake Enkerai e Tung'ani aikunari anaa enatisirakaki ninye, kake ooi ilo tung'ani laa ninye okaldaa Enkerai e Tung'ani! Enaikash apa te neitu eini ilo tung'ani.”

²²Ore einosita endaa, nedumu Yesuemukate nemayian, nebelibel, neisho ninche, nejo, “Enkoito; osesen lai ele.”

²³Nedumu enkikompe, ore pee eisho Enkai enashe neisho ninche, neok pooki.

²⁴Nejoki ninye ninche, “Osarge lai ele lo sotua, oibukori te nkaraki ilkumok.

²⁵Esipa, ajoki intae, meekure aigil aok aekata enoo lng'anayio loo sabibu o metabau ina olong naok eokoto ng'ejuk te nkitoria e Nkai.”

²⁶Ore pee eidip aatarany osinkolio nepuku aapuo Oldoinyo loo Loirienito.

²⁷Nejoki Yesu ninche, “Isikisiki ade pooki aailanyisho; amu etisiraki aajo, ‘Kaosh olchekut, neisardak intare!’

²⁸Kake ore pee aaitopiuni, naituruk te intae alo Galilaya.”

²⁹Nejoki Petero, “Te naa keisik pooki, maaorore nanu.”

³⁰Nejoki Yesu ninye, “Esipa aajoki iyie, ore ade te na kewarie, eton eitu eru olchogoo katitin are nikimiki iyie katitin uni.”

³¹Neisimu oleng ajo, “Te naa kaye te nebo o iyie, maamiki nanu iyie.” Nejo ninche pooki neijia.

³²Nepuo ewueji neji Getsemane; nejoki Yesu lkipaareta lenyena, “Entaanyuaki tene o maidipa enkomono.”

³³Nerik Petero o Yakobo o Yohana, pee eiriamariyie, neiteru aiputukuny oleng nenyamalu.

³⁴Nejoki ninche, “Keeta oltau lai osina kitok oba anaa keeya; entotoni tene entashololoto[2].”

³⁵Neigut penyo, neirrabalakino enkop neomon inchere, te naa keidimayu metogiroi ina kata ninye.

³⁶Nejo, “Abba, Papa, keidimayu imbaa pooki te iyie; iwuang'akinyeki ena kikompe; kake mme enaa enayieu nanu, kake anaa eniyieu iyie.”

³⁷Neshukunye neinepu eirurate, nejoki Petero, “Simon, iyie ilo oirura? Italaikine atashololoyu ena ninye nabo?

³⁸Entashololoto naa entasaisho pee mijing'ijing'i atua ntemat; keyieu oltau, kake keshal osesen.”

³⁹Neitoki ake alo neomon, neigil iladuoo ake rorei.

⁴⁰Neitoki aitu neinepu eirurate, amu eiroshiutuo nkonyek oleng; nelau ninche enawaliki ninye.

⁴¹Neitu ene uni nejoki ninche, “Keton ake duoo irurara aayeng'iyeng'a? Eidipe; etabawua esaa; naitarasari Enkerai e Tung'ani aaitarasaki nkaik oo larruok.

⁴²Enyoito, emaape; idol etabaua ilo laakaldaa.”

⁴³Ore nabo kata, eton eirorita Yesu, nelotu Yudas, obo le lelo tomon o aare, neiriamunore ninye empuoto neeta lalema o siaren, eirriutua ilapolosak kituaak o lasirak o lpayiani.

⁴⁴Eishoo taa duoo ilo otakaldayie olmonekie, ajoki, “Ore taa olang'utut ninye ilo, embung'a entorik entirrisha.”

⁴⁵Ore pee elotu Yudas, nelo nabo kata enetii Yesu, nejoki, “Lo kitok!” Neng'utut.

⁴⁶Nesaru aaibung ninye.

⁴⁷Kake etushutua obo le lelo ooitashe teine olalem, neosh osinka lo lapolosani kitok nedung'u enkiok.

⁴⁸Nejoki Yesu ninche, “Ietuo itanapate anaa iloopuo aaibung olaisimani, aa nanu ipuonunu aaibung inapitata ilalema o siaren?

⁴⁹Natii oshi ake enkaji e Nkai te nebo intae aiteng'enisho, neitu kimbung'ubung'u? Kake nchoo eitabari ilkigerot.”

⁵⁰Neing'uaa lkipaareta lenyena pooki ninye, neilanyisho.

⁵¹Neirukurukore oloti barnoti Yesu laa olkarasha ake errotianita; neibung ninche ninye.

⁵²Kake eitiaa ninye ilo karasha neisik meishopo.

⁵³Nerikoki ninche Yesu olapolosani kitok, netumo lapolosak pooki kituaak o lpayiani o lasirak.

⁵⁴Nesujita Petero ninye elakuaniki, o metijing'a abaiki olgoriet lo lapolosani kitok; neton te nebo ilarripok aij enkima.

⁵⁵Neing'oru lapolosak kituaak o ina kiguana pooki shakenisho naarie Yesu metua; kake etalaita.

⁵⁶Amu eetuo lkumok ooiteenikitia mbaa, kake eitu eipira nkiteenikinot enye.

⁵⁷Neinyototo kulikae aaiteeniki, ejo,

⁵⁸“Kitoning'o iyiook ejo, ‘Kagil nanu ena aji e Nkai naitobiraki too nkaik, ore too nkolong'i uni nashetu ae, neitu eitobiri too nkaik.’ ”

⁵⁹Kake ore ake eyia, eitu eipira ina shakenisho enye.

⁶⁰Neinyototo olapolosani kitok nelo aitashe te mpolos, neikilikuan Yesu ajoki, “Ai miata ewalata niwalu? Kaa shakenisho ena nikintang'orie kulo tung'ana?”

⁶¹Kake etigire Yesu neitu ewaliki. Neitoki ake olapolosani kitok aikilikuan ajoki. “Ira iyie Kristo, Oinoti lo Lomayiana?”

⁶²Nejo Yesu, “Ee, ara, naa iyiookiki aadol Enkerai e Tung'ani eton te nkaina e tatene o Lopeny Engolon, elotu too nkatampo e keper.”

⁶³Nepolos olapolosani kitok ilkilani lenyena nejo, “Kainyoo kintoki aayieunye lchakenini?

⁶⁴Itoning'okito ate emoroto namor Enkai. Ijojo aa?” Nedung'oki pooki enkiguana aajo keishiaakino keeya.

⁶⁵Neiteru kulikae aanotaki, neimulumul enkomom, nedam, nejoki, “Imbonisho!” Neitanang'are ilarripok ninye ioshot.

⁶⁶Ore etii Petero olgoriet ti abori ine, nelotu enkaisiaayiani nabo o lapolosani kitok.

⁶⁷Ore pee edol Petero eijito enkima, neing'or ninye, nejo, “Iboitare sii oshi iyie Yesu le Nasaret.”

⁶⁸Kake etomikio ejo, “Mayiolo nemaning'u enijoito.” Nepuku ninye alo kishomi.

⁶⁹Nedol ina aisiaayiani, neitoki ake ajoki lelo ooitashe teine, “Ore ele tung'ani, obo lenye.”

⁷⁰Kake enyaaka ake Petero amiki. Ore ake sii te nkiti rishata nejoki lelo ooitashe te nebo Petero, “Edede taa ninye ira iyie obo lenye; amu ira ole Galilaya.”

⁷¹Kake eiterua adek kewan nenya lmuma ajo. “Mayiolo nanu ele tung'ani liimakiki.”

⁷²Ore nabo kata ake neru olchogoo ene are. Nedamu Petero enatiaaka Yesu nchere, “Ore eton eitu eru olchogoo katitin are, nikimiki iyie katitin uni.” Nedanya Petero aishir.