Read MAASAI REVISED PROTESTANT Marko 16 Bible Online

Marko 16 - MAASAI REVISED PROTESTANT bible

Marko 16

¹Ore pee eishari enkolong e nkiyeng'iyeng naji Sabato, neinyang'u Mariamu Magdalene o Mariamu ng'oto Yakobo, o Salome iila naarropil pee epuo aael osesen le Yesu.

²Ore tadekenya oleng te nkolong e nkiterunoto e wqiki, nepuonu enkurare eilepua enkolong,

³ejokino maate, “Ae ng'ae ade oret iyiook aibeleleng'oo, osoit te nkutuk e nkurare?”

⁴Nejo maing'ura, nedol aajo eidipaki aaibeleleng'oi osoit aaiwuang'ie amu ae sapuk apa oleng.

⁵Ore pee ejing enkurare, nedol oltung'ani barnoti eitashe te nkalo e tatene, neishopito olkila oibor; neing'asia ninche.

⁶Nejoki ilo tung'ani ninche, “Eming'asia; Yesu le Nasaret ing'oruru, otashoki. Etopiwuo, metii ene; eng'ura enapa wueji neirragieki ninye.

⁷Kake enchom, entoliki lkipaareta lenyena o Petero nchere, keituruk alo Galilaya; teine ipuopuo aadol, anaa enatiaaka intae.”

⁸Nepuku aapuo neipirri aaing'uaa enkurare; amu einepua olokirikiri o enkiputukuny, neitu eliki likae tung'ani, amu etureishote.

⁹Ore pee epiu Yesu enasirie te nkolong e nkiterata e wiki, Mariamu Magdalene etang'asa aipang'aki enapa kitok nataararie iloiriruani oopishana.

¹⁰Nelo ninye aliki lelo apa ooiriamariyie ninye, eishirita ninche neilisho[4].

¹¹Kake ore pee ening ninche aajo eishu netoduaa ninye, neitu sii eiruk.

¹²Ore te siadi nena, eibelekenye Yesu atum ae mua, neitalioo kewan te kulikae kipaareta aare lenyena epuo nkurman.

¹³Nerrinyo lelo aapuo aaliki lkulikae, kake eitu ninche eiruk.

¹⁴Ore te siadi nena, neipang'aki Yesu lelo tomon oobo etoni aadaa; neisikong ninche te nkaraki engolon oo lukuny enye o te nkaraki nemeeta enkirukoto amu eitu eiruk lelo ootoduaa ninye eidipa atopiu.

¹⁵Nejoki ninye ninche, “Enchom enkop pooki entoliki ltung'ana pooki ele rorei supat.

¹⁶Ore oloiruk neibatisae nejeu; ore olemeiruk nedung'okini enkiguana.

¹⁷Naa kulo lmonek ooiriamariyie lelo ooiruk te nkarna ai earaa loiriruani; neiro too nkutukie ng'ejuko.

¹⁸Nedumu lasuriaa, naa teneok entoki ake pooki nayaisho nemeeta enaiko ninche; neiteleiki ltamuoyia nkaik, neishiu.”

¹⁹Neaku ore pee eidip Olaitoriani Yesu airorie ninche, neilepieki aaya Keper, neton te nkaina e tatene e Nkai.

²⁰Nedumunye ilkipaareta aapuo aalikioo ilo rorei too wuejitin pooki, neasisho Olaitoriani te nebo ninche neitadedeyie ilo rorei too lmonek ooiriamariyie. Eesai. [ Enkae kiting'oto e apa oo lomon supati e (Mk 16.9-10) Kake etolikitio Petero too ndorropu o lelo ooboitare nena naatolikioki ninche. Ore te siadi nena, neitanap yesu makewan ninche mewaita enkilepunoto neya endoyioroto elikioroto sinyati e njeunoto nemeish nebik intarasi.]