Read MAASAI REVISED PROTESTANT Marko 2 Bible Online

Marko 2 - MAASAI REVISED PROTESTANT bible

Marko 2

¹Ore pee errinyo Yesu Kapernaum eishari nkuti olong'i, nening'i aajo etii ang.

²Neiturrurrokino iltung'ana kumok o metaa, meetae enepaashareki te kutuk aji, einosaki Yesu ninche ilomon.

³Nepuonunui neyakini oltung'ani tarrush oikaole onapita ltung'ana oong'uan.

⁴Ore pee elau eneimu te nkumoi o lorere, nebol aadede shumata enkaji, ine neipirare. Ore pee eidip aatabol neitadou erruat napetita ilo oikaole.

⁵Ore pee edol Yesu enkirukoto e lelo tung'ana, nejoki ilo oikaole, “Enkerai ai, kitapalakaki ng'ok inono.”

⁶Netoni teine laigerok nedamisho aajo too ltauja lenye,

⁷“Kainyoo pee ejo ele tung'ani inji? Eijo kemorisho! Ai ng'ae oidim atapalaki ng'ok, leme Enkai ake?”

⁸Neyiolou nabo kata Yesu ina to ltau lenye nchere, kedamu ninche nena too ltauja lenye, neikilikuan ajoki, “Kaji etiu pee inkilikuanana ate nena too ltauja linyi?

⁹Kaa nalelek, ai te najoki ele oikaole, ‘Kitapalakaki ng'ok inono,’ ana ai te najoki, ‘Inyo, tudumu erruat ino shomo?’

¹⁰Kake ore pee itumutumu aatayiolo nchere keeta Enkerai e Tung'ani enkidimata te nkop napalakinye ng'ok.” Nejoki ilo oikaole,

¹¹“Aajoki, inyo, tudumu erruat ino shomo ang.”

¹²Neinyototo, nedumu nabo kata erruat enye, neipang te dukuya ninche pooki; o meing'asiata pooki neisis Enkai, ejo, “Eitu ai kata kidol embae naaijo ena!”

¹³Neitoki Yesu apuku teine nelo embata e naiposha, nesotokino iltung'ana kumok ninye neiteng'en ninche.

¹⁴Ore ina kata eloito nedol Lawi ole Alfayo eton te nkapisi oo mpisai e kodi nejoki, “Tusujuaki.” Neinyototo Lawi asuj ninye.

¹⁵Ore etonita anya endaa te nkaji e Lawi, netoni ilasotok kumok loo mpisai e kodi o looata ng'ok te nebo Yesu o lkipaareta lenyena; amu aikumok apa iloosujita.

¹⁶Ore pee edol ilaigerok lo Lfarisayo eng'arie ninye endaa looata ng'ok o lasotok le kodi, nejoki lkipaareta lenyena, “Kaji etiu pee eng'arie ninye ilasotok le kodi o looata ng'ok endaa?”

¹⁷Ore pee ening Yesu, nejoki ninche, “Meyieu ilememuoi olabaani, iloomuoi ake ooyieu neitu alotu aipot isupati, kake ilooata ng'ok aewuo aipot.”

¹⁸Neaku enkata naitupukoo ate lkipaareta le Yohana o loo Lfarisayo. Nepuonu ltung'ana enetii Yesu nejoki, “Kaji etiu pee eitupukoo ate lkipaareta le Yohana o loo Lfarisayo, nemeitupukoo ate ilinono?”

¹⁹Nejoki Yesu ninche, “Keitupukoo ate ilchoreta lo loyamishe eton eisiritore? Ore eton eisiritore oloyamishe, nemeidim aaitupukoi ate.

²⁰Keyooki aapuonu nkolong'i, naayae oloyamishe aaitung'uaa ninche, neitupukoo taa a teina olong.

²¹Meetae oltung'ani oripaki enkarasha ng'ejuk enkila musana; amu te neripaki, neng'erunye ina ng'ejuk teidia musana, nejarari eng'erata.

²²Nemeetae oltung'ani opik enaisho ng'ejuk atua ilbenia musan; naa te nepik, nedany ina aisho ilbenia. Ilbenia ng'ejuko ake epiki enaisho ng'ejuk.”

²³Ore egira Yesu aim inkurman te nkolong e nkiyeng'iyeng naji Sabato, ore epuoito neiteru lkipaareta lenyena aagilu ilukuny e nkano.

²⁴Nejoki Ilfarisayo ninye, “Amaa kaji etiu pee easita lkipaareta linono enemeishoruno too nkitanapat metaasi te nkolong e Sabato?”

²⁵Nejoki Yesu ninche, “Keitu ai kata isumusumu enataasa Daudi, etanyamala netir esumash ninye o lelo ooisiritore:

²⁶eneikuna pee ejing enkaji e Nkai enapa kata aa Abiatar olapolosani kitok, nenya emukate nasinya nemeishoruno too nkitanapat meinosa likae leme olapolosani, nenya ninye neisho sii lelo ooboitare?”

²⁷Nejoki Yesu ninche, “Eitayioki enkolong e Sabato te nkaraki oltung'ani, eitu eitaini oltung'ani te nkaraki enkolong e Sabato;

²⁸netaa Enkerai e Tung'ani Olaitoriani le nkolong e Sabato.”