Read MAASAI REVISED PROTESTANT Marko 7 Bible Online

Marko 7 - MAASAI REVISED PROTESTANT bible

Marko 7

¹Ore pee eiturrurrokino Ilfarisayo enetii Yesu, eboitare ninche ematua oo lasirak, ooetuo eing'uaa Yerusalem.

²Nedol aajo kenya kulikae ooiteng'eni lenyena endaa eiduruk inkaik, eji meisuja.

³(Amu ore Ilfarisayo, naa neijia etiu Ilyahudi pooki, menya endaa eitu eisuj inkaik enye, pee eitabaya nkoon oo loo nkakuyiaa.

⁴Naa te nepuonu eing'uaa ineemirishoreki; menya endaa eitu eng'as aaisuj ate. Naa keeta kulie koon naaitabaya ninche, anaa enkisujata oo nkikompeni o motioo o ntokitin oo suyan.)

⁵Neikilikuan Ilfarisayo o lasirak Yesu aajoki, “Kainyoo pee mesuj lkipaareta linono inkoon oo loo nkakuyiaa metaa kenya endaa too nkaik naaiduruk.”

⁶Nejoki Yesu ninche, “Kesipa enotoko Isaya pee eibonisho ajo tialo intae, irara isunkuro, anaa enaigero; ‘Too nkutukie ake, aayanyit, kulo tung'ana, kake kaalakuaniki ltauja lenye nanu,

⁷naa pesho aaserem nanu, aa nkoon oo ltung'ana eiteng'enare.

⁸Itapalaitie intae inkitanapat e Nkai, nikurrakiki aaibung inkoon oo ltung'ana.’ ”

⁹Nejoki Yesu ninche, “Inotito intae olosek lianyienyie nkitanapat e Nkai, pee itumutumu aaitabai nkoon inyi.

¹⁰Amu etejo, Musa ‘Iyanyita minyi o ng'utunyi,’ nejo sii, ‘Ore olomor menye anaa ng'otonye, neiririkino keeya.’

¹¹Kake nijojo intae, ‘Te nejoki oltung'ani menye aashu ng'otonye, Ore dupoto duoo nikitumie nanu etaa Korban (aa taa enkishooroto naishori Enkai)

¹²nimintokiki aaisho ilo meitaasa menye anaa ng'otonye toki.’

¹³Ore teina nintaa pesho ororei le Nkai te nena koon inyi nintarasakinono. Niasiasa doi kulie kumok naaijo nena.”

¹⁴Neitoki Yesu aipotu olorere nejoki, “Entoning'oki intae pooki, naa enchoo ejing'aa intae.

¹⁵Meetae entoki e oriong oltung'ani naa te nejing ade atua neidim aisarkionie ninye; kake mbaa naapuku tiatua oltung'ani naaitaa ninye torrono.

¹⁶Te neeta oltung'ani nkiyiaa naaning'ishore toning'o.”

¹⁷Ore pee ejing aji, neing'uaa olorere, neikilikuan lkipaareta lenyena enajo ina kitanyaanyukoto.

¹⁸Nejoki Yesu ninche, “Aimejing'aa sii ninche intae? Aimidolidolo aajo ore pooki toki natii oriong oltung'ani, te nejing nemeidim aitarruoi;

¹⁹amu te nejing, mme oltau lenye ejing kake enkoshoke, neipang ade ake?” (Ore pee ejo neijia neitisiny indaiki pooki.)

²⁰Nejo, “Ore inaapuku tiatua oltung'ani, ninche naaitarruoo oltung'ani.

²¹Amu atua oltung'ani eing'uaa indamunot torrok, enkiborra oo nkonyek, empurrorre, earata metua, eloloito,

²²ng'uarrat torrok, enkarruoisho, olosek torrono, enkipororonkos, olom, esulare, olwuasa, emodai.

²³Atua oltung'ani eing'uaa kuna torrok pooki, naa kuna naaisarkionie oltung'ani.”

²⁴Ore pee epuku Yesu teine nelo olkirine le Tiro o Sidon. Nejing enkaji nabo, nemeyieu neyiolouni aajo etii ine; kake etalaikinoteki aaisudoi.

²⁵Kake ore nabo kata netii enkitok, naibung'a entito enye kiti oloirirua oiduruk, nening ajo etii Yesu ine, nelotu, nebatata too nkejek e Yesu aserem.

²⁶Ore ina kitok naa enoo Lyunani, o losho le Foinike te inoto. Neomon metaarai oloirirua teina tito enye.

²⁷Nejoki Yesu ina kitok, “Inchoo eng'asi aaitoti nkera, amu meishiaakino teneyae mukateni oo nkera aanang'aki ildiein.”

²⁸Kake etawalikia ninye nejoki, “Ee itisipa lo kitok; kake ore sii ninche ildiein kelutoo emisa nesotu rrarrat naitadoyio nkera.”

²⁹Nejoki Yesu, “Ore te nkaraki ina nitejo, shomo ang; etung'uayie oloirirua entito ino.”

³⁰Nelo ang, neinepu enkerai eirrag te rruat, neshomo oloirirua.

³¹Nerrinyunye Yesu aing'uaa ilo kirine le Tiro, neimaa Sidon alo enkalo e naiposha e Galilaya, nepolos aimaa atua Dekapoli.

³²Nerikokini oltung'ani ming'ani laa penyo sii neiro, nesai meiteleiki inkaik.

³³Nerik aitung'uaa atua olorere ewueji naa ninye ake openy, nepik ilkimojik inkiyiaa enyena, nenotu inkamulak neiseyie olng'ejep lenye;

³⁴neing'or keper, neitadoiyio oltau, nejoki ilo tung'ani, “Efafata,” nchere, “Taboloyu.”

³⁵Nebolo nkiyiaa, enyena nelaa eneta o lng'ejep lenye, neiro aitobiraki.

³⁶Neitanap Yesu pee meliki likae tung'ani; kake ore anaa pee eitanap ajoki pee melikioo, neitulus ninche eitadaraa ina.

³⁷Nelus enking'asia e Yesu neaku keji, “Etaasa mbaa pooki aitobiraki ore ninye ilming'anta o lemeiro, neidimie aisho meiroro.”