Read MAASAI REVISED PROTESTANT Marko 8 Bible Online

Marko 8 - MAASAI REVISED PROTESTANT bible

Marko 8

¹Ore te nena olong'i, enyaaka olorora kitok asoto, nemeeta entoki nanya, neipotu Yesulkipaareta lenyena nejoki ninche,

²“Kaata olng'ur tele orere, amu nkolong'i uni taata aaisiritore nanu nemeeta entoki nanya.

³Naa te najoki meshomo nkang'itie enye, neiterriaa te nkoitoi; neetuo kulikae eing'uaa enelakua.”

⁴Newaliki lkipaareta lenyena aajoki, “Kaji eiko oltung'ani te neitoti kulo tung'ana too mukateni te ne ti ong'ata?”

⁵Neikilikuan Yesu ajoki, “Kaja mukateni niatata intae?” Nejoki, “Naapishana.”

⁶Neitanapisho metotona ltung'ana te nkop, nedumu nena mukateni naapishana, ore pee eisho Enkai enashe nebelibel neisho lkipaareta lenyena meitarasaki olorere. Neitarasaki ninche ilo orora.

⁷Neeta sii lkuti sinkir kutiti. Ore pee emayian, neitanapisho meitarasari sii ninche lelo aaisho olorere.

⁸Nenya, neraposho. Nesotuni lmong'oishi ootelekuaki, nkikapuni naapishana naabore.

⁹Nebaya lelo tung'ana nkalifuni ong'uan.

¹⁰Neitanap Yesu meshomo ang; nejing ninye nabo kata atua empeut te nebo lkipaareta lenyena, nepuo enkalo olkerenket le Dalmanuta.

¹¹Nepuonu Ilfarisayo, aaishankarrarre Yesu aayie olmonekie oing'uaa keper aatem.

¹²Neitadoiyio Yesu oltau te nguton, nejo, “Kainyoo pee eing'oru kulo tung'ana le na kata olmonekie oing'uaa keper? Esipa, ajoki intae, meetae hoo olmonekie oishori ltung'ana le na kata.”

¹³Neing'uaa Yesu ninche, neitoki ajing empeut nelo olikae kekun.

¹⁴Netorikine lkipaareta eitu eyau mukateni; neaku emukate nabo ake eeta tiatua empeut.

¹⁵Neitanap Yesu ninche ajoki, “Entorrip ate te nkisuisho oo Lfarisayo o te nkisuisho e Herode.”

¹⁶Neiguana maate aajo, “Mukateni mikiaata.”

¹⁷Neyiolou Yesu ina, nejoki ninche, “Kainyoo pee ijokinono eji miatata mukateni? Keton ake mejing'aa intae naa aimining'ung'u? Kaji etiu pee egol intae ilukuny?

¹⁸Aimidolidolo niatata nkonyek? Niatata nkiyiaa aimining'ishosho? Aimidamumu?

¹⁹Amaa pee abel imukateni imiet abelaki ltung'ana nkalifuni imiet, kaja nkikapuni oo lmong'oishi naabore nitasotutuo?” Nejoki, “Tomon o aare.”

²⁰“Oo napa naapishana natebelaka nkalifuni ong'uan: kaja nkikapuni naabore oo lmong'oishi nitasotutuo?” Nejoki, “Naapishana.”

²¹Nejoki Yesuninche, “Neton ake intae mining'ung'u?”

²²Nepuonu Betsaida. Nerikokini Yesu olmodooni, aaomon meiseyie.

²³Nerik ilo modooni aibung enkaina, neipung'ie teina ang. Ore pee enotaki nkonyek enyena, neiteleiki nkaik, neikilikuan ajoki, “Idol toki?”

²⁴Neshumu nkonyek nejo, “Kadol iltung'ana; kake etiu anaa lkeek, epuoito.”

²⁵Neitoki ake Yesu aiteleiki nkonyek enyena nkaik, neing'orisho ninye oleng neishiu, nedolishoyu aitobiraki.

²⁶Neisho elo ang, nejoki, “Nimirrinyo ake ajing ena ang.”

²⁷Nelo Yesu o lkipaareta lenyena, nkang'itie e Kaisaria e Filipi. Ore epuo te nkoitoi neikilikuan Yesu lkipaareta lenyena ajoki, “Kejo iltung'ana kara nanu ng'ae?”

²⁸Nejoki ninche ninye, “Yohana Olaibatisani, nejo kulikae, Eliya; nejo sii kulikae ira obo loo lapa oibonok le Nkai.”

²⁹Neikilikuan Yesu ajoki, “Kake amaa intae, nijojo kara ng'ae?” Newaliki Petero ajoki, “Ira iyie Kristo.”

³⁰Neitanap ninche pee meliki likae tung'ani.

³¹Neiteru Yesu aiteng'en ilooteng'eni lenyena ajoki meeta nchere pee meisilisili Enkerai e Tung'ani too mbaa kumok neany ilpayiani o lapolosak kituaak o lasirak, neari metua, ore pee elusoo nkolong'i uni neitoki apiu.

³²Nelimu ina aibalunye. Nerik Petero ninye neiteru aisikong.

³³Kake eibelekenye Yesu ore pee edol lkipaareta lenyena, neing'ode Petero, nejoki, “Shomo kurum ai Sheitani! Amu mitii iyie enkalo e Nkai, kake enoo ltung'ana itii.”

³⁴Neipotu Yesu olorere te nebo o lkipaareta lenyena meetu enetii ninye, nejoki ninche, “Te neyieu oltung'ani naasuj nanu, nchoo metanya inaayieu oltau lenye, nedumu osalaba lenye naasuj nanu.

³⁵Amu ore olojo aitopok enkishui enye neiminie; ore oloiturraa enkishui enye te nkaraki ele rorei supat, neitajeu.

³⁶Amu ainyoo edupore oltung'ani, te netum enkop pooki neiturraa enkishui enye?

³⁷Anaa kainyoo einosie oltung'ani enkishui enye?

³⁸Amu ore olodol enkurruna te naaimaki nanu aashu ororei lai tena ishoi oo ng'ok naloloito nedol sii ninye Enkerai e Tung'ani enkurruna eimaki ninye teina olong elotu te nkitoo e Menye eiriamunore ilmalaika sinyat.”