Read MAASAI REVISED PROTESTANT Marko 9 Bible Online

Marko 9 - MAASAI REVISED PROTESTANT bible

Marko 9

¹Nejoki Yesu ninche, “Esipa, ajoki intae, etii doi ilooitashe tene lemeishamisham keeya katukul o metaba anaa nedol enkitoria e Nkai eewuo te ng'olon.”

²Ore pee eishunye nkolong'i ile nerik Yesu Petero o Yakobo o Yohana, neilepie enchumata o ldoinyo oodo aa ninche ake. Neibelekenya emua e Yesu edolita ninche.

³Neitintilu lkilani lenyena, aaiborru oleng, enaa meetae olaisujani te nkop oidim aiborrie metotiwuo neijia.

⁴Neliooyu Eliya o Musa te dukuya ninche; eirorie Yesu.

⁵Nejoki Petero Yesu, “Olaiteng'enani, aisidai kitii ene; nchoo iyiook mateshetu ilng'oborri okuni, olino obo o le Musa o le Eliya”

⁶naa aimeyiolo enajoito, amu eiputukunyo oleng.

⁷Neitemoo enkatampoi ninche, nepuku oltoilo ojo, “Nele Oinoti lai lanyor, ninye entoning.”

⁸Ore nabo kata ake, ejo maing'orisho neitu eitoki aadol likae otii te nebo ninche. Yesu ake openy.

⁹Ore edou to ldoinyo, neitanap Yesu amitiki einosaki likae tung'ani nena naatoduaa ninche, o metaba naa nepiu Enkerai e Tung'ani aing'uaa ilootuata.

¹⁰Neibung ninche ilo rorei, neikilikuana maate aajo. “Kainyoo doi ena najo ake, kepiu aing'uaa ilootuata?”

¹¹Neikilikuan ninche Yesu aajoki, “Kainyoo pee ejo ilaiteng'enak loo nkitanapat eji meeta nchere pee meng'as Eliya alotu?”

¹²Newaliki Yesu ajoki ninche, “Esipa eng'as Eliya alotu neitang'ejuk imbaa pooki. Paa amaa, kainyoo pee ejo lkigerot tialo Enkerai e Tung'ani, eji keitamei too mbaa kumok nemenuni?

¹³Kake ajoki nanu intae, eewuo Eliya, neitaas ninche ninye enapa ake nayieu neitaas, anaa enatisirakaki ninye.”

¹⁴Ore pee epuonu enetii ilkulikae ooiteng'eni, nedol emanita olorere kumok, neishankarrarre ilaiteng'enak loo nkitanapat ninche.

¹⁵Ore ake pee edol ilo orere Yesu, neing'asia oleng, nekuetiki aairoroki.

¹⁶Neikilikuan ajoki, ninche, “Kainyoo doi ena shankar niaatata o ninche?”

¹⁷Newaliki oltung'ani obo te ilo orere ajoki, “Olaiteng'enani, atorikuo duoo enkayioni ai enitii, eeta oloirirua lemeisho eiro;

¹⁸olaa ore pee eibung, nenang'ie enkop; neitayu ilabur, nenya lala neikaolo; najo ajoki lkipaareta linono metaarai, nelaikino.”

¹⁹Newaliki Yesu ajoki ninche, “Wooi ena ishoi nemeeta enkirukoto! Kebaa aton aboitare intae? Kapal intae o anu? Entoriku ninye ene natii.”

²⁰Nerikokini; ore pee edol ilo oirirua Yesu neiterreyie enkayioni nabo kata, nebatata te nkop neiperipera, neitayu ilabur te nkutuk.

²¹Neikilikuan Yesu menye enkerai ajoki, “Kanu iterua atum ena pukunoto?” Nejo, “Te keraisho eiterua.

²²Naa katitin kumok etanang'aka ninye atua enkima nenang'aki enkare ejo aar; kake te nindim iyie ataasa ae, ing'urrie iyiook taretu iyiook.”

²³Nejoki Yesu ninye, “Eji te nindim Keidimayu imbaa pooki to loiruk.”

²⁴Nebuak nabo kata menye ina ayioni nejo, “Airuko, ore eneton eitu airuk taretokoki!”

²⁵Ore pee edol Yesu olorere ekuetu aasotokino, neing'ode ilo oirirua oiduruk, nejoki, “Lo oirirua ming'ani lemeiro, nanu laaitore, tupuku tung'uai ena ayioni, nimingil ajing ae kata.”

²⁶Nebuaku aishir neiterreyie aipushupush oleng, nepuku, netiu enkayioni anaa olmeneng'ani o metejo lkumok, “Ae etua!”

²⁷Kake eibung'a Yesu enkaina nedumu, neinyototo aitashe.

²⁸Ore pee ejing atua aji, neikilikuan lkipaareta lenyena too nkurrat aajoki, “Kainyoo pee eitu kindim iyiook aatarai ninye?”

²⁹Nejoki, “Meararoyu ena pukunoto ti ae oitoi neme te nkomono ake.”

³⁰Nepuo Yesu o lkipaareta lenyena teine neimaa Galilaya. Nemeyieu Yesu neyiolou hoo oltung'ani:

³¹amu lkipaareta lenyena eiteng'enita, ajoki, “Keitarasakini Enkerai e Tung'ani inkaik oo ltung'ana, near ninche ninye metua; ore pee eidipi aatar metua, neishari nkolong'i uni nepiu.”

³²Kake eitu ening'u ninche ina natejo, neureyu sii eikilikuan.

³³Nepuonu Kapernaum; ore etii Yesu aji neikilikuan ninche ajoki, “Kainyoo naaji enchankar niaatata te nkoitoi?”

³⁴Negira ninche; amu keishankarrate aajo kalo olkitok te pooki.

³⁵Neton Yesu neipot lelo tomon o aare; nejoki ninche, “Ore oloyieu neaku ole dukuya, nchoo metaa ninye obayie te pooki neaku osinka le pooki.”

³⁶Nedumu enkerai, neitasheyie te mpolos enye; nedumu aibung too nkaik enyena nejoki ninche,

³⁷“Ore pooki ong'amu enkerai anaa ena te nkarna ai, nanu eng'amu; ore olaang'amu, neme nanu ake eng'amu kake ilo laairriwua.”

³⁸Nejoki Yohana ninye, “Olaiteng'enani, kitoduaa oltung'ani earaa iloiriruani te nkarna ino, nikimitiki, amu mme ole ncholiek ang.”

³⁹Kake etiaaka Yesu, “Emimitiki, amu meetae hoo oloas embae sapuk te nkarna ai, laa ore aa enaidipie ina, naaitoki aidim atusukenya.

⁴⁰Amu ore ilo lemegilunore iyiook naa ole nkalo ang.

⁴¹Kesipa, ajoki intae, ore ake oloisho intae enkikompe e nkare entook te nkaraki naipotieki intae Kristo, nemeeta nchere pee etala olerrinyore lenye.

⁴²“Ore ake oloitapong'oo nabo e kuna kutiti naairuk nanu, enaikash te neenikini ninye osoit oiutuutishoreki emurt, nenang'akini enaiposha.

⁴³Naa ti nikintapong'oo enkaina ino, tudung'oi; enaikash te nijing enkishui iata enkumur alang ti niata nkaik pokira are, nilo Yehanam atua enkima nemeye ntarasi;

⁴⁴(enemeye lkuru lenye nemeye enkima.)

⁴⁵Naa ti nikintapong'oo enkeju ino, tudung'oi; amu enaikash te iyie ti nijing enkishui ira ng'ojine, alang ti nikinang'akini Yehanam, iata nkejek pokira are;

⁴⁶(ewueji nemeye ilkuru lenye, nemeye enkima.)

⁴⁷Naa ti nikintapong'oo enkong'u ino, tukurtu; enaikash ti nijing enkitoria e Nkai iata enkong'u nabo alang ti nikinang'akini Yehanam iata inkonyek pokira are;

⁴⁸ewueji nemeye ilkuru lenye, nemeye enkima.

⁴⁹“Amu keitisinyi pooki ng'ae te nkima, anaa enaitisinyi olasar te munyan.

⁵⁰Sidai emunyan; kake amaa te nelau emunyan enkisukut enye, kaji eikoni pee eitokini aaisukutie? Enoto emunyan tiatua ate, nitonini te seriani intae maate.”