Read MAASAI REVISED PROTESTANT Luka 1 Bible Online

Luka 1 - MAASAI REVISED PROTESTANT bible

Luka 1

¹Ore te nkaraki natii lkumok ootonyuaakita aaiger imbaa naatupukutuo tiatua iyiook.

²Neigero anaa enainosakita iyiook lelo apa ootoduaa te nkiterunoto too nkonyek enye, oora ninche ilaisiaayiak ooinosu ele rorei le Nkai.

³Nadol sii nanu, Oloyanyiti Teofilo, ajo keishiaakino amu atisipua mbaa pooki te rishata naado, naaigeroki mbaa naaitobirakino aitisipaki,

⁴pee itum atayiolo esipata e kuna baa nikinosakaki.

⁵Etii apa te nkata o laiguanani Herode, le Yudea, olapolosani oji Sakaria, le ntalipa o lapolosak e Abija. Ore enkitok enye naa ene ntalipa e Aaron, neji enkarna enye Elisabet.

⁶Naa supati ninche pokira are tialo Enkai, nesuj inkitanapat o nkitoriat pooki o Laitoriani, meitong'or.

⁷Nemeeta enkerai, amu koolupi Elisabet, naa moruak pokira are oleng.

⁸Neaku ore eitayu Sakaria esiaai e mpolosare too nkatitin olkekun lenye te dukuya Enkai,

⁹anaa enaikununo olkuak loo lapolosak. Nedoiki enkukuo metaa ninye ojing enkaji o Laitoriani, ainok olasar le nkorropil.

¹⁰Neomon olorere te boo, ina kata einoki enkorropil.

¹¹Neipang'aki olmalaika lo Laitoriani aitashe te nkalo e tatene olperere lo lasar le nkorropil.

¹²Ore pee edol Sakaria neirut,

¹³nejoki olmalaika, “Sakaria, miureishoyu, etoning'oki enkomono ino: naa aikiiki enkitok ino Elisabet enkayioni, naa ijo enkarna enye Yohana.

¹⁴Naa itum iyie enchipai o eng'ida to ltau lino, neng'ida ltung'ana kumok te inoto enye.

¹⁵Amu keakuninye kitok te dukuya Olaitoriani, nemeok enaisho oo sabibu aashu enaisho napi, naa keiput Enkiyang'et Sinyati ebaiki etii enkoshoke e ng'otonye.

¹⁶Naa kerrinyoki Siraeli kumok Olaitoriani Enkai enye.

¹⁷Neituruk te dukuya Olaitoriani aaku olkilikuai lenye, te nkiyang'et o te ngolon naaijo ene Eliya. Neitaiki osotua inkera o loo menye, neibelekeny iloogolong'u menoto eng'eno e lelo supati pee eitobiraki Olaitoriani iltung'ana ooishiaakino.”

¹⁸Nejoki Sakaria olmalaika, “Kainyoo ayiolounye ena bae? Nataa moruo, naa moruo sii ninye enkitok ai?”

¹⁹Newaliki olmalaika ajoki, “Ara nanu Gabriel, oitashe te dukuya Enkai; naairriwua maairorie naaitabaiki ele kilikuai supat.

²⁰Ekionyo enkutuk nimintoki airo, o metabau ina olong naibalayu nena, amu eitu iruk irorei laainei, kake keitabari ake te nkata naikenakaki.”

²¹Naa keanyita apa lelo tung'ana Sakaria neing'asia te nkimutioto naimutie tiatua Enkaji e Nkai.

²²Ore pee epuku Sakaria, nelaikino airorie ninche, neyiolou ninche aajo eeta enatoduaa te neinokieki olasar. Neitodol too lmonek etalaikine airorie.

²³Ore pee eidipayu ilkekuno le nkisiayiare enye, nelo Sakaria ang.

²⁴Ore pee elusoo nena olong'i, nenutayu enkitok enye Elisabet, neisudoo kewan ilapaitin imiet, nejo,

²⁵“Ena aaitaasa Olaitoriani te nkata natoduaa naaoru esulare te dukuya iltung'ana.”

²⁶Ore to lapa le ile le nutai e Elisabet, neirriwaa Enkai olmalaika oji Gabriel, meshomo enkanasa e Galilaya naji Nasaret,

²⁷enetii eselenkei natisira oltung'ani oji Yosef, lo lgilata le Daudi; naa keji apa ina selenkei Mariamu.

²⁸Nejing'aki olmalaika nejoki, “Takuenya na kirotet! Etii Olaitoriani te nebo iyie!”

²⁹Neirut Mariamu oleng te nkaraki lelo rorei, nejo to ltau, “Kaji eikununo ina kirorokino?”

³⁰Nejoki olmalaika, “Mariamu, miureishoyu, itaa kirotet te Nkai.

³¹Naa inutayu, niiu enkayioni, nijo enkarna enye Yesu.

³²Naa keaku kitok neji Enkerai e Nkai natii shumata aisul te pooki naa keisho Olaitoriani Enkai ninye olorika le nkitoo le Daudi menye lenye,

³³neitore olgilata le Yakobo intarasi, nemeiting enkitoria enye.”

³⁴Nejoki Mariamu ilo malaika, “Kaji eiko pee eaku ena nemayiolo olee?”

³⁵Newaliki olmalaika ajoki, “Kelotu Enkiyang'et Sinyati shumata iyie, nikintoip engolon o Lotii Shumata Aisul, ore te nkaraki ina, ore enkerai naini, neji sinyati, Enkerai e Nkai.

³⁶Naa ore enkanashe ino Elisabet nenuta te moruao enye, naa keiu enkayioni, naa ole ile ele apa, te nutai enye, netejoki oshi koolupi.

³⁷Amu meetae embae nemeidimayu te Nkai.”

³⁸Nejo Mariamu, “Kara nanu esinka o Laitoriani; metotiwuo te nanu anaa enitejo.” Nelo olmalaika aing'uaa ninye.

³⁹Ore te nena olong'i, nedumunye Mariamu aisarrisar alo enkop oo oldoinyo natii enkanasa e Yuda.

⁴⁰Nejing enkaji e Sakaria, neiroroki Elisabet.

⁴¹Ore ake pee ening Elisabet enkirorokino e Mariamu, neipid enkerai te nkoshoke; neiput Elisabet Enkiyang'et Sinyati,

⁴²nebuak to ltoilo sapuk ajo, “Kitamayianaki iyie too nkituaak, nemayiani eishoi e nguset ino!

⁴³Kaji eikununo ena kias kitok, eji ng'otonye Olaitoriani lai nalotu enatii?

⁴⁴Amu ore ake pee aning too nkiyiaa aainei enkiroroto ino, neipid enkerai te nchipai te nkoshoke ai.

⁴⁵Emayiana enairuko nchere keitabari inaatiaakaki ninye eing'uaa Olaitoriani.”

⁴⁶Nejo Mariamu, “Kalimu to ltau lai enkitoo o Laitoriani;

⁴⁷neshipakino enkiyang'et ai Enkai Olaitajeunoni lai,

⁴⁸amu etadamua enchalan e sinka enye. Amu ore ebaiki taata, kaajo ishoritin pooki namayiana;

⁴⁹amu aaitaasa ologol isapuki, aisinyati enkarna enye.

⁵⁰Ore olng'ur lenye netii shumata lelo ooure ninye too ishoritin pooki.

⁵¹Etaasa ine ngolon te nkaina enye; neisardakie iloowuasa o nkiguanat oo ltauja lenye.

⁵²Eitadowuo ilaitoriak too lorikan lenye le nkitoo, neilepie iloomeni.

⁵³Eitaraposho ilooata esumash too ntokitin sidain, nearaa ilkarsisi meeta toki.

⁵⁴Etasarua Israel osinka lenye, te nkaraki olng'ur lenye,

⁵⁵ anaa enatiaaka iloo papa, Abraham o eishoi enye intarasi.”

⁵⁶Neton Mariamu aboitare Elisabet ilapaitin oobaya okuni, nerrinyo alo ang.

⁵⁷Nebau enkata naishore Elisabet, neiu enkayioni.

⁵⁸Nening elatia enye, o lgilata lenye nchere, eing'urrie Olaitoriani, neshipayu te nebo ninye.

⁵⁹Ore te nkolong e isiet, nepuonu aamurat enkerai, neyieu nedung'oki enkarna aaipotie Sakaria menye lenye.

⁶⁰Nejo, ng'otonye, “Mme nejia, keipoti aajo, Yohana.”

⁶¹Nejokini Elisabet, “Meetae oltung'ani lo lmarei linyi oji nejia.”

⁶²Neikilikuan menye too lmonek enayieu neji enkerai.

⁶³Neipotu osoit dapash neiger ajo, “Keji enkarna enye Yohana!” Neing'asia pooki.

⁶⁴Nebolo Sakaria enkutuk ina kata ake, nelaa olng'ejep lenye, neiteru airo, aisis Enkai.

⁶⁵Neureishoyu pooki oomanya ina latia, nelikiori nena baa pooki to ldoinyo le Yudea.

⁶⁶Ore lootoning'o pooki neiteng'el too ltauja lenye ejo, “Keaku pasa ena kerai keniaa pukunoto?” Amu etii engolon e Nkai tenebo ninye.

⁶⁷Neiput Sakaria, menye le Yohana Enkiyang'et Sinyati neibonisho ajo;

⁶⁸“Meisisi Olaitoriani Enkai oo Siraeli, amu etabaikia nekordu ltung'ana lenyena.

⁶⁹Eishorua Olaitajeunoni Magilani to lgilata lo sinka lenye Daudi,

⁷⁰anaa enatejo apake too nkirorot oo sinyat o enoo loibonok le Nkai liapa moitie

⁷¹pee kijeu too lmang'ati lang, o too nkaik e lelo pooki ooiba iyiook;

⁷²neitabaya olng'ur oisiligie iloo papa lang, nedamu osotua lenye sinyati,

⁷³olmumai oinosie papa lang Abraham,

⁷⁴nchere, ore pee eitajeu iyiook, too nkaik oo lmang'ati lang, nikisiaai ninye metiii enkuretisho,

⁷⁵te sinyatisho o te supatisho, too nkolong'i pooki e nkishui ang.

⁷⁶Ore sii iyie na kerai ai, aikiji oloiboni lo Lotii Shumata Aisul te pooki. Amu inturuk te dukuya Olaitoriani, aitobiraki nkoitoi enyena.

⁷⁷Aliki ltung'ana lenyena enjeunoto, te mpalakinoto oo ng'ok enye,

⁷⁸te nkaraki enanai o lng'ur le Nkai ang, laa te ninye ekenyiki iyiook enjeunoto eing'uaa keper,

⁷⁹eitawang'aki ilootoni te naimin, o lootoni to loip le keeya, pee eutaki nkejek ang inkoitoi osotua.”

⁸⁰Nebulu enkerai, neponari engolon e nkiyang'et, nebik ti ong'ata o metabau enkolong naipang'akinyeki olorere loo Siraeli.