Read MAASAI REVISED PROTESTANT Luka 12 Bible Online

Luka 12 - MAASAI REVISED PROTESTANT bible

Luka 12

¹Ore kiti, neiturrurro olorora kitok metaa keitunyoro, neiteru Yesu aiturukie lkipaareta lenyena ajoki, “Entodol ake ate te nkisuisho oo Lfarisayo amu keisunkur.

²Meetae enaimulumularo nemeibalunyeki, aashu enaisudoro nemeyiolouni.

³Ore embae pooki nitejo ntae te naimin neyookini aalikioo te wang'an, ore nena nipuopuo aaing'oming'omakino too lgilat loo nkisudorot neyookini aalikioo too nchumarot oo nkajijik.

⁴“Ajoki ntae, loshoreta laainei, emiure lelo ooar osesen, nemeitoki aata ai naaidim aataas eidipa ina.

⁵Kake aikok intae aliki olonare niurere; entureita ilo laa ore eidipa atara metua, neitoki aata engolon nanang'akinye Yehanum; ee ajoki ntae, ilo entureita!

⁶“Aimme nchilinkini are ake enya imotonyi miet? Nemelang ninye Enkai hoo nabo e nena.

⁷Oo naa ntae ilaa keikena ninye lpapit loo lukuny inyi. Emiureisho; iatata pae tipat aalang motonyi kumok.

⁸“Najoki nanu ntae, ore pooki laaibalie te dukuya ltung'ana, neibalie sii ninye Enkerai e Tung'ani ninye te dukuya ilmalaika le Nkai.

⁹Kake ore ilo laamiki te dukuya ltung'ana nemikini sii ninye te dukuya lmalaika le Nkai.

¹⁰Ore oltung'ani pooki osukeny Enkerai e Tung'ani kepalakini, kake ore olomor Enkiyang'et Sinyati nemepalakini.

¹¹Naa te neyae ntae nkajijik e ntumo o laitoriak o enkitoo, eming'aing'ai aajo ai jojo aa anaa aiwalulu aajo aa;

¹²amu keutaki ntae Enkiyang'et Sinyati teina saa enijojo.”

¹³Nejoki oltung'ani obo otii atua ilo orere Yesu, “Olaiteng'enani, tiaaki olalashe lai maatooriki enjung'ore ang.”

¹⁴Kake etiaaka, “Lo tung'ani, ai ng'ae laaitaa nanu olarishani anaa olooriki ntae imasaa?”

¹⁵Neitoki Yesu ajoki ninche, “Entodol ake ate, entodol ate to lng'uarra; amu ore enkishui neme nkumoi oo masaa naata oltung'ani.”

¹⁶Neitoki aliki enkitanyaanyukoto, nejoki, “Eetae apa olkarsis neisho enkurma enye oleng,

¹⁷nejoki kewan enye, ‘Kaa taa aas, amu maata enapik endaa ai?’

¹⁸Nejo, ‘Inji aiko, kaar ilkompen laainei nashetu loolala oolang kulo pee ashumie endaa ai o masaa aainei.

¹⁹Naa kajoki oltau lai, lo tau! Iata masaa kumok nikitushumakaki too larin kumok; isikarrayu tadaayu niokisho nishipa.’

²⁰Kake nejoki Enkai, ‘Lo modai! Ena kewarie kiyieki oltau lino; paa amaa nena tokitin ninteng'ela keaku pasa nkuneng'ae ninche?’

²¹Nejia etiu oloshumaki kewan imasaa neme karsis tialo Enkai.”

²²Nejoki Yesu lkipaareta lenyena, “Ajoki naa ntae, emintanyamaluo te nkaraki enkishon inyi, te ntoki ninyanya, o too seseni linyi te ntoki ninchopishopo.

²³Amu kitok enkishui alang endaa, naa kitok osesen alang inkilani.

²⁴Ing'ura lkurruki; meunisho, nemesotisho, nemeeta sitooni anaa ilkompen, neitoti ake Enkai sii ninche. Kebaa naa elang tipat inyi ntae enoo motonyi!

²⁵Naa kalo obo linyi oidim atoponiki kewan entemata nabo e nkaina te nkishui enye?

²⁶Amaa naa te nimindimidimi aataas enkiti bae anaa ina, oo pee intanyamaluoluo too nkulie pooki?

²⁷Ng'ura ntapuka, eneiko te nebulu, nemeekenya nemepiyaisho; kake ajoki ntae, ore ninye Solomon te sikar enye pooki nemeikodo anaa enatiu nabo e kuna.

²⁸Kake pasa taa eishop Enkai aiko nji olkujita obulu taata ti ong'ata ore taaisere nenang'akini enkima, kebaa eitulus aishop intae, lo tung'ana kulo ooti enkirukoto!

²⁹Naa eming'oruru entoki ninyanya anaa eniokioko, naa emisinanuo.

³⁰Amu kuna tokitin eing'oru loreren pooki le nkop; neyiolo Papa linyi ajo nkolati inyi nena.

³¹Ore enaikash, naa eng'oru enkitoria enye, naa keaku sii nkuninyi nena kulie.

³²“Emiureisho, lo turrur oti, amu Papa linyi otonyorra aisho ntae enkitoria enye.

³³Entimir imasaa inyi, enchoo laisinak; eng'uraki ate lbenia lememusanu, ooata olchumati te keper lememuta, ine nemenyikaki olapurroni nemeinosie oriri.

³⁴Amu ore ine netii olchumati lino naa ine etii oltau lino.

³⁵“Enterreten impolosi inyi, naa enchoo etoni eyupuyup ltaai linyi

³⁶nitiuu anaa iltung'ana ooanyita olkitok lenye elotu eing'uaa osirua le nkiyama, pee te nebau neipotisho nesioki aabolu nabo kata.

³⁷Emayiana ake lelo aisiaayiak laa te nebau olkitok lenye neinepu erripisho. Esipa ajoki ntae, kerretena ninye openy neisho ninche metotona te misa, nelotu aitoti ninche.

³⁸Naa te neewuo te rripore e are, aashu tene uni, neinepu etiu nejia nemayian ake lelo aisiaayiak!

³⁹Kake entayiolo nchere, tenaa keyiolo olopeny enkaji esaa nalotunye olapurroni, anaata etorripishe naa anaata eitu eisho metigili enkaji enye.

⁴⁰Entashololoto sii ntae; amu kelotu Enkerai e Tung'ani te saa niminteikiki.”

⁴¹Nejoki Petero, “Olaitoriani, aiyiook ake iliki ena kitanyaanyukoto ena ei pooki ng'ae?”

⁴²Nejoki Olaitoriani, “Kalo pasa abarani[4]? Ilo supat naa ng'en otung'eikia olopeny enkaji, meitotio lootii too rishat enye.

⁴³“Emayiana ake sii ilo aisiaayiani oinepu olkitok lenye easita ina naitanapa.

⁴⁴Esipa ajoki ntae, keisho meitoria masaa enyena pooki.

⁴⁵Kake oo te nejo ilo aisiaayiani openy, ‘Eimutie olkitok lai,’ neiteru aidong nkaisiaayiak, nedaa ninye neokisho amera.

⁴⁶Neyooki alotu olkitok le ilo aisiaayiani to lkekun, lemeiteikini o te saa nemeyioloi, neitame neitaboitaki ilemening'isho.

⁴⁷Ore ilo aisiaayiani apa oyiolo enayieu olkitok lenye, neitu eas aitabaya aashu ina nanyor, neidong'i oleng.

⁴⁸Kake ore ilo lemeyiolo, netaasa enaishiaakino enkidong'oto, eari penyo. Ore pooki oishooki nkumok, neyieki ninye nkumok; ore ilo laa ninye eitanap iltung'ana nkumok neyieki ninye nkumok oleng.

⁴⁹“Aewuo aisuroki enkop enkima; naa oi sii ake duoo te naa keidipa atudupai!

⁵⁰Kake kaata enkibatisa naaibatisae; nebaa enaaitirrishita o meitabari kenya!

⁵¹Aijojo pasa kaewuo ayaki enkop osotua? A'a, ajoki eoro ayaki;

⁵²amu ore ebaiki taata eoro enkaji nara miet; nepong'ore uni are, nepong'ore are uni;

⁵³nepong'o enkerai o menye, nepong'o entito o ng'otonye, nepong'ore enkaputani enkitok o layioni lenye, nepong'ore esiankiki enkaputani.”

⁵⁴Nejoki sii Yesu olorere, “Te nidolulu oshi enkatampoi eilepu te nkalo e ndoyioroto, nijojo nabo kata, ‘Kelotu asha’; netiu nejia.

⁵⁵Ore pee idolidolo osiwuo oing'uaa moikuape nijojo, ‘Kelotu airowuaju’; netiu nejia.

⁵⁶Lo sunkuro kulo! Iyiololo intae aatolimu ilbulabul le nkop o loing'ang'e; kake kaji inkoko pee miyiololo aaing'ura nilimumu enatiu ena kata?

⁵⁷“Naa kaji etiu pee mirishushu oopeny enasipa?

⁵⁸Ore eton iriamariri te nkoitoi o ilo likintang'or to larishani, tetema toning'ore ninye eton ipuopuo, pee mikiyeataki enetii olaiguanani, nikintarasaki olaiguanani osikari, nikipik osikari jila.

⁵⁹Aajoki, mipuku aikata teine mme italaa empisai nabayie.”