Read MAASAI REVISED PROTESTANT Luka 14 Bible Online

Luka 14 - MAASAI REVISED PROTESTANT bible

Luka 14

¹Ore apa te Sabato nabo nelo Yesu anya endaa te nkaji o Lfarisayoi obo kitok, te nkolong e nkiyeng'iyeng'ata, neing'or ninche aajur.

²Naa ketii ine oltung'ani dukuya ninye otejia osesen.

³Neirorie Yesu lang'eni loo nkitanapat o Lfarisayo ajoki, “Keishoruno pasa too nkitanapat meishiunyeki oltung'ani te nkolong e Sabato anaa ai meishoruno?”

⁴Kake etigirate ninche. Neibung ilo tung'ani neishiunye, neisho meshomo.

⁵Nejoki ninche, “Ai ng'ae te ntae laa te neeta enkurrarru anaa olkiteng otusulakine olkesumet lemesaru nabo kata aitayu, oi aa te nkolong e Sabato.”

⁶Nelaikino aatawaliki ina.

⁷[5] Neitoki Yesu aliki enkitanyaanyukoto lelo ooitoomoni, etoduaa eneiko tenegelaki ate iwuejitin oo lorikan aailepie ate. Nejoki ninche,

⁸“Te nikimpotokini osirua le nkiyama, mitonie ake ewueji enkanyit, melotu ake likae oipoto kitok likilang;

⁹nelotu ilo oipoto ntae, pokira oaare, nikijoki, ‘Nchoo sii iyie ele tung'ani enetonie,’ nintoki iyie adou te nkurruna alo ewueji e abori.

¹⁰Kake ore iyie pee kimpoti, totona te wueji nebayie tukul, paa te nelotu ilo oitoomonisho nikijoki, ‘Olchore, ilepa sii iyie;’ nikiyanyitu iltung'ana pooki liboitare te misa.

¹¹Amu ore pooki oilepie kewan neitadouni, ore oloitadou kewan neilepieki.”

¹²Nejoki sii ninye ilo oitoomonisho, “Te nincho ltung'ana endaa aashu ntobiraki osirua, mimpot lchoreta linono o lalashera linono o lelo lo lmarei lino aashu lkarsisi le latia ino, pee mikiyiooki sii ninche aaitoomon, nikilaaki enda apa nintaasa.

¹³Kake ore ti nintobir iyie osirua, mpoto laisinak, o ltarrushi o lng'ojiniaa o lmodook,

¹⁴naa eikimayiani amu mikindim ninche aatalaaki iyie. Aikilaakini kenya ake te mpiunoto e lelo supati.”

¹⁵Ore pee ening ina obo le lelo ootoni te misa tenebo o Yesu, nejoki, “Emayiana ilo oyooki adaa te nkitoria e Nkai.”

¹⁶Kake etiaaka ninye ilo, “Etii apa oltung'ani oitobira osirua kitok, neipot iltung'ana kumok,

¹⁷ore pee ebau enkata e ilo sirua neirriwaa olaisiaayiani lenye metiaaki lelo ooipotoki, ‘Wootu; amu keirrag pooki toki!’

¹⁸Kake eiterutua pooki aaitaakuuk. Nejo ole dukuya, ‘Ainyang'ua enkurma, naa kalo ake adol; aatasayia tung'ueikiaki nanu.’

¹⁹Nejo likae, ‘Ainyang'ua nanu lmong'i tomon naa kalo pee alo asipu; aatasayia tung'ueikiaki nanu.’

²⁰Nejo likae, ‘Enayamie enkitok, nemaidim naa aeu.’

²¹Kaae, nelotu olaisiaayiani aliki olkitok lenye nena. Negoro olopeny enkaji nejoki olaisiaayiani lenye, ‘Tasiooi shomo nkoitoi oo nkaulele e ina anasa, toriku laisinak o ltarrushi o lmodook o lng'ojiniaa.’

²²Nejoki ilo aisiaayiani, ‘Lo kitok, eidipaki aataas ina nitejo, neton ake meiputa enkaji.’

²³Nejoki olkitok ilo aisiaayiani lenye, ‘Shomo nkoitoi sapuki o nkutiti, o lkirinen taaru ltung'ana meetu, o meiputayu enkaji ai.

²⁴Amu ajoki ntae, meishiamisham hoo obo le lelo apa ooipotokoki endaa ai.’ ”

²⁵Ore eiriamariyie olorora kitok Yesu, neibelekenyakino nejoki,

²⁶“Ore pooki ng'ae olotu enatii lemeibayu menye o ng'otonye, o enkitok enye o nkera, o lalashera o nkanashera, oo ebaiki enkorrok enye, nemeidim ataa oloiteng'eni lai.

²⁷Ore pooki lemenap osalaba lenye naairukurukore, nemeidim ataa oloiteng'eni lai.

²⁸Amu kalo pasa linyi, laa te neyieu neshetu oltalet, lemeng'as aton aikenisho pee eyiolou te naa keidip intokitin naata?

²⁹Pee meaku ake, ore eidipa aitamanyu nelaikino aidipa, nesukeny pooki ng'ae odol,

³⁰nejo, ‘Eiterua ele tung'ani ashetisho, neitu eidip.’

³¹Anaa kalo aiguanani oyieu nerasaki likae aiguanani to larrabal, eitu eng'as aiguana te naa keirish ilenyena iip tomon, iip tikitam le lido oarare?

³²Naa te nemeirish, ore eton eitu enyiku olikae, neirriwaki lkiliku aikilikuanu mbaa naaitayu osotua.

³³Nejia naa etiu, ore ake olinyi lemeibayu pooki toki naata nemeidim ataa oloiteng'eni lai.

³⁴“Ai sidai emunyan; kake amaa te netuyiatuyu emunyan kerrinyokinoyu enkisukut enye?

³⁵Meitoki aata tipat te nkurma nemeeta to lchala; keiturrarri ake. Oloata nkiyiaa naaning'ie inchoo ening.”