Read MAASAI REVISED PROTESTANT Luka 16 Bible Online

Luka 16 - MAASAI REVISED PROTESTANT bible

Luka 16

¹Neitoki Yesu ajoki lkipaareta lenyena, “Etii apa oltung'ani karsis oata olaing'urani le nkaji, neitang'ori ilo shekut aajo keishang'itie intokitin olkitok lenye.

²Neipotu ninye nejoki, ‘Kaa bae ena natoning'o nikimpirta iyie? Inkenakaki intokitin pooki aainei ning'orita.’

³Nejo olchekut makewan, ‘Kaji aiko, netaa kaaoru olkitok lai enking'urata e siaai? Nemaata engolon naturishore, nemaaisho isura aomonisho.

⁴Atayiolo enaas, pee aang'amu ltung'ana too nkajijik enye te naaoruni enking'urata e siaai.’

⁵Kaae, neipot lelo pooki ootayie olkitok lenye silen maa obo, nejoki oloiturukuo, ‘Kebaa esile niata o lkitok lai?’

⁶Nejo, ‘Iltuleta iip le ilata.’ Nejoki ninye ilo, ‘Tudumu empalai ino e sile, totona tasioki ngero onom.’

⁷Neitoki ajoki likae, ‘Kebaa esile niata iyie?’ Nejo, ‘Ilbenia iip le nkano.’ Nejoki ninye ilo, ‘Tudumu empalai ino e sile ngero ntomoni isiet.’

⁸Neisis olkitok ilo aing'urani aimonkoni amu kalamas; amu ng'eni nkera e na kop too mbaa enye aalang nkera e wang'an.

⁹“Najoki intae entaiki ate lchoreta te kuna masaa enkop nemesinya, paa ore pee emuta neng'amari intae te nenen neebikieki ntarasi.

¹⁰“Ore ilo oisiligayu too nkuti neisiligayu sii too nkumok ore olemeisiligayu too nkuti nemeisiligayu too nkumok.

¹¹Amaa naa te nimisiligayuyu too masaa nemesinya, aing'ae pasa likintoki aisiligie imasaa naadede?

¹²Naa amaa te neitu iaku oloisiligayu too neeiking'a, ai ng'ae likincho nena naara ninono?

¹³Meetae osinka oidim aisiaayia lkituaak aare; keibayu ake obo nenyorru olikae, aashu eibung'are obo nemenaa olikae. Mindimidimi sii intae aaisiaayia Enkai o masaa.”

¹⁴Ore pee ening Ilfarisayo, iloonyor naa masaa neikordod Yesu.

¹⁵Kake etiaaka Yesu, “Ntae lelo ooitaakuno irara asipak too ltung'ana, kake keyiolo Enkai ltauja linyi; amu ore ina nailepie ltung'ana naa olminong too nkonyek e Nkai.

¹⁶“Keetae apa nkitanapat e Musa o noo loibonok o metabaiki Yohana; ore ebaiki ina kata nelikiori lomon supati le nkitoria e Nkai, nediding'akino pooki ng'ae te ngolon.

¹⁷Kake kelelek pee eish keper o enkop alang te nelau tipat o ltipoto obo loo nkitanapat e Nkai.

¹⁸“Ore oltung'ani ake pooki oituraa enkitok enye neyam ai keloloito. Ore oloyam enkitok natung'uayie olmoruo lenye naa keloloito.”

¹⁹Nejo Yesu, “Etii apa oltung'ani karsis, oishop olkila onyokie o loibor, nenya olkar nkolong'i pooki.

²⁰Neirrag te kutuk aji e nkaji enye oltung'ani aisinani oomonisho oji Lasaro, oata nkirondoni

²¹oyieu neitaraposh kewan too mbelat naasulunye te misa o lkarsis; neaku kepuonu ldiein aamej nkirondoni enyena.

²²Neye ilo aisinani nenap ilmalaika aaya olgoo le Abraham. Neye sii ninye olkarsis nenukari.

²³Ore etii Yehanam, eitamei, neraposhu nkonyek, nedol Abraham elakua netii Lasaro olgoo lenye.

²⁴Neipotisho ajo, ‘Papa Abraham, ing'urrieki, irriu Lasaro meitadoiki olkimojino lenye enkare naaitong'aki olng'ejep lai; amu aainosita ena kima.’

²⁵Kake etiaaka Abraham, ‘Nakerai, tadamu nchere inoto olkar loo mbaa pooki inchu te nkop, ore Lasaro nenoto sii ninye osina, kake ore taata neitishipi etii ene, nitii iyie osina.

²⁶Naa ore etii kuna pooki, etipikaki eng'erem narish iyiook o intae, pee melang'u ole naalo ine nemelang'u oleine alotu ene nikitii.’

²⁷Nejoki olkarsis, ‘Aatasayia naa, papa, irriwai ninye metaa olkilikuai te nkang e papa,

²⁸amu imiet ilalashera laata, metoliki pee mepuonu sii ninche ene wueji o somit.’

²⁹Kake etiaaka Abraham, ‘Keeta Musa o loibonok le Nkai, inchoo ninche ening lelo.’

³⁰Nejoki, ‘A'a papa Abraham mme nejia; te netum olkilikuai loolooinguaa ilootuata, neirridu.’

³¹Nejoki ninye, ‘Te nemening Musa o loibonok le Nkai, nemening sii ninye oloing'uaa lootuata.’ ”