Read MAASAI REVISED PROTESTANT Luka 17 Bible Online

Luka 17 - MAASAI REVISED PROTESTANT bible

Luka 17

¹Nejoki Yesu lkipaareta lenyena, “Meeta nchere pee mepuonu ntemat e nkarruoisho; kake ee kake aiyia ilo laa ninye eimu!

²Enaikash te neenikini ninye osoit oiutuutishoreki emurt nenang'akini atua enaiposha, alang te neitapong'oo nabo e kuna kutiti.

³Entodol ate; te neitarruoo olalashe lino, irorie, ore pee eirridua, tapalaki;

⁴naa te nikinyala nabo, olong kat naapishana, nikingil kat naapishana ajoki, ‘airridua’, nipalaki ake.”

⁵Nejoki lkipaareta, “Olaitoriani, toponiki iyiook enkirukoto!”

⁶Nejoki Olaitoriani, “Tenaa iatata naaji enkirukoto naba anaa enkantererai e karadali, indimidimi aatiaaki ele ng'aboli, ‘Tadotunye, tuunokinoyu enaiposha’ nening intae.

⁷“Keetae obo linyi oata osinka oturisho aashu oloirritisho, ojoki te nelotu eing'uaa enkurma, ‘Wou nabo kata totona tadaayu?’

⁸Anaa keng'as ake ajoki, ‘Tang'asa taa ntobirakaki endaa, nirretena nikiyaki, ore aidipa atadaayu naokisho; nilo sii iyie adaa niokisho?’

⁹Ijojo pasa keisho ilo sinka enashe te nkaraki nataasa enaitanapaki?

¹⁰Nejia itiuu sii intae, ore pee ndipidipi aataas inaaitanapaki intae pooki, entejo, ‘Mikira sinkan le tipat; kitaasa ake iyiook enaishiaakino nikiaas.’ ”

¹¹Neaku ore te nkoitoi eloito Yesu Yerusalem neim erishata e Samaria o Galilaya.

¹²Ore ejing'ita enkang nabo, nenang'are ltung'ana tomon ooata enkeeya oo lbolot neitashe ninche te nelakua.

¹³Nebuaku aajo, “Olaitoriani, Yesu, ing'urrie iyiook.”

¹⁴Ore pee edol Yesu ninche nejoki, “Enchom entoduaai ate too lapolosak.” Ore epuoito neishiu nesika.

¹⁵Ore pee edol obo lenye ajo eishiunyeki, neshukunye eisisita Enkai to ltoilo sapuk;

¹⁶neirrabalakino enkop too nkejek e Yesu, ajoki ashe. Naa Osamariyiai ninye.

¹⁷Neikilikuan Yesu, “Aimme ilewa tomon duoo ilaishiunye metisikata? Koree lkulikae pokira ooudo?

¹⁸Kaji etiu pee eitu etumi obo oshukunye aisho Enkai enashe meteleku ele leeiking'a?”

¹⁹Nejoki ninye ilo, “Inyo shomo; kintajewuo enkirukoto ino.”

²⁰Ore pee eikilikuan Ilfarisayo Yesu enkata nalotu enkitoria e Nkai, newaliki ajoki ninche, “Melotu enkitoria e Nkai too lmonek oolioo;

²¹nemeyookini aajo, ‘She, nena natii ene!’ Aashu ‘Neidia!’ Amu etii enkitoria e Nkai atua intae.”

²²Nejoki Yesu lkipaareta lenyena, “Kepuonu inkolong'i naa ing'uarring'uarra pee idolidolo enkolong nabo e Nkerai e Tung'ani, nimidolidolo.

²³Naa kejokini intae, ‘Ng'ura ende!’ Aashu, ‘Ng'ura ene!’ Emipuo ake emirubare.

²⁴Amu ore anaa enatiu enkiwuang'ata naimerlelu neitawang embata nabo e shumata o metabaiki enkae, nejia etiu Enkerai e Tung'ani teina olong enye.

²⁵Kake ore eitu ebau ine eng'asi ake aainyal too nkumok neany iltung'ana lena kata.

²⁶Ore anaa enatiu apa too nkolong'i e Noa, nejia etiu too nkolong'i e Nkerai e Tung'ani.

²⁷Kedaae apa, neokishoi, neyamishoe, neishoori meyami, o meeu ina olong natijing'a Noa atua emeli, nelotu oloirrag le nkare nemut ninche pooki.

²⁸Nejia sii apa etiu too nkolong'i e Lot aa, kedaae apa, neokishoi, neinyiang'ishoe, nemirishoe, neunishoi, neshetishoe,

²⁹kake ore ake ina olong natupukuo Lot aing'uaa Sodom neshau enkima oo soito le nkima eing'uaa shumata neidaikie ninche pooki.

³⁰Nejia sii etiu ina olong naibalunyeki Enkerai e Tung'ani.”

³¹Ore teina olong, inchoo ilo otii shumata enkaji, oata ntokitin tiatua, milotu ake ajo aya; ore sii ilo otii enkurma mirrinyo ake.

³²Entadamu enkitok e Lot.

³³Ore pooki ng'ae ojo agolie enkishui enye neiminie, kake ore pooki oiturraa enkishui enye neitopoki.

³⁴Ajoki intae, “Ore teina kewarie keirrag ltung'ana aare erruat nabo; neyai obo, neing'uari olikae.

³⁵Neiutuutisho nkituaak are te nebo to soit obo; neyai nabo neing'uari enkae.

³⁶Netii ltung'ana aare enkurma; neyae obo neing'uari olikae.”

³⁷Nejoki ilkipaareta lenyena ninye, “Olaitoriani, ae ti aji?” Nejoki, “Enetii empopok, eiturrurrokino lmotonyi.”