Read MAASAI REVISED PROTESTANT Luka 18 Bible Online

Luka 18 - MAASAI REVISED PROTESTANT bible

Luka 18

¹Neliki Yesu lkipaareta lenyenaenkitanyaanyukoto, aitodol inchere keishiaakino ake neomon anaake nemenauru.

²Nejoki, “Eetae apa te nkanasa nabo olaiguanani lemeure Enkai nemeshilaa tung'ani;

³neetae enkoliai teina anasa nalotu anaa ake enetii ajoki, ‘Tomituoki sii ake tele mang'atinta.’

⁴Neng'as aany; ore te siadi nejo openy, ‘Ore hoo nemaure Enkai nemaikenu tung'ani,

⁵kake ore amu aateeka ena oliai, kamitu pee maaitoki aisomit te na lotunoto enye.’ ”

⁶Kejo Olaitoriani, “Entoning enajo ilo aiguanani arruoni.

⁷Paa aijojo memitu ninye Enkai ilgelunot lenyena, ooishiraki dama o kewarie? Ijojo keimutie tialo ninche?

⁸Ajoki intae kemitu asioki. Kake amaa eyia, keinepu pasa Enkerai e Tung'ani te nelotu, eetai enkirukoto te nkop?”

⁹Etolikio sii Yesu ena kitanyaanyukoto lelo ooisilig ate aajo supati te Nkai nemen ilkulikae;

¹⁰“Eilepa ltung'ana aare aapuo aaomon te nkaji e Nkai, naa Olfarisayoi obo naa olasotoni le kodi olikae.

¹¹Neitashe Olfarisayoi neomon te nkorrok enye makewan nejo nji, ‘Na Ai, aaisho enashe amu matiu nanu anaa ikulikae tung'ana, matiu anaa ilaikonyak ilaimonkok, iloololoito, nematiu sii anaa ele osotu kodi.

¹²Kat are aen kewan aitupukoo te wiki, naishooyo ematua e tomon e pooki toki natum.’

¹³Kake eitasho ninye olasotoni le kodi, te nelakua nemeshumu ninye inkonyek enyena aing'orie shumata kake olgoo eoshiosh, nejo, ‘Na Ai, ing'urrieki nanu olaing'okoni!’

¹⁴Ajoki intae, etadoyie ele tung'ani alo enkaji enye eishooki esipata alang ilo likae; amu ore pooki ng'ae oilepie kewan neitadouni, ore oloitadou kewan neilepieki.”

¹⁵Neyakini sii Yesu nkera kutiti pee etum aiseyie, ore pee edol lkipaareta ina neisikong ninche.

¹⁶Kake eipotuo Yesu enetii nejoki, Enchoo nkera epuonu enatii emimitiki; amu enoo naatiu anaa kuna enkitoria e Nkai.

¹⁷Kedede, ajoki intae, ore pooki ng'ae lemeng'amu enkitoria e Nkai anaa enang'amu enkerai nemejing ina kitoria katukul.

¹⁸Neikilikuan oltung'ani obo oitoreisho Yesu ajoki, “Laaiteng'enani supat, kaji aiko pee ajung enkishui oo ntarasi?”

¹⁹Nejoki Yesu ninye, “Kainyoo pee kijo kara supat? Meetae hoo obo supat leme Enkai ake.

²⁰Iyiolo iyie nkitanapat: ‘Miloloito, miar metua, mipurrisho, minteeniki likae elejare iyanyita minyi o ng'utunyi.’ ”

²¹Nejoki ninye, “Aibung'a kuna pooki ebaiki apa ara oti.”

²²Ore pee ening Yesu ina, nejoki, “Kitong'orikia entoki nabo. Timira pooki toki niaata tooriki laisinak, naa itum olchumati te keper; nikilotu taa asuj.”

²³Kake ina ake etoning'o neisinanuo oleng, amu karsis apa naleng.

²⁴Neing'or Yesu ninye nejo, “Egol taa duoo to ltung'ani oata imasaa pee ejing enkitoria e Nkai!

²⁵Amu kelelek te ntames pee eim enaudoto o ltidu alang oltung'ani karsis te nejing enkitoria e Nkai.”

²⁶Nejo lelo ootoning'o, “Ai ng'ae naa doi eitajeuni?”

²⁷Kake etejo, “Ore enemeidimayu too ltung'ana keidimayu te Nkai.”

²⁸Nejo Petero, “Ng'ura ajo kitung'uaitie iyiook inkang'itie ang nikisuj iyie.”

²⁹Nejoki Yesu ninche, “Kedede, ajoki intae, meetae oltung'ani otung'uayie enkaji, aashu enkitok, aashu lalashera, aashu ntoiwuo, aashu nkera, te nkaraki enkitoria e Nkai,

³⁰lemetum nkatitin kumok taata te na kata, ore teidia kata nalotu netum enkishui oo ntarasi.”

³¹Nerik Yesu lelo tomon o aare enkilepata, nejoki, “Yerusalem kilep aapuo, naa ore mbaa pooki naatisiraki naaipirta Enkerai e Tung'ani too loibonok le Nkai naa keitabari.

³²Keitarasakini ninye Iloreren nesurdaanyi neitaasi enesulare nenotakini;

³³neoshi ninye, neari metua, ore te nkolong e uni nepiu.”

³⁴Kake eitu hoo ening'u lkipaareta embae nabo e kuna; keisudoro ena bae te ninche, neaku eitu ening'u enatiaaka Yesu.

³⁵Ore pee enyikaki Yesu Yeriko, netii oltung'ani modooni otonita te mbata e nkoitoi aomonisho.

³⁶Ore pee ening olorere egiroo aapuo, neikilikuanisho ajo kainyoo ina.

³⁷Nejokini, “Yesu le Nasaret oimita ene.”

³⁸Nebuaku ajo, “Yesu, olayioni le Daudi, ing'urrieki nanu!”

³⁹Ore lelo ootii dukuya ninye nebuaaki metigirayu; kake etabuakua ninye aitulus oleng, “Ara Daudi, ing'urrieki!”

⁴⁰Neitashe Yesu nejo metorikuni enetii; ore pee enyikaki, nejoki,

⁴¹“Kaa iyieu naaitaas?” Nejo, “Olaitoriani, kayieu nadolishoyu.”

⁴²Nejoki Yesu ninye, “Todolisho; kinchiunye enkirukoto ino.”

⁴³Nedolishoyu nabo kata nesuj ninye, eisisita Enkai; ore lelo tung'ana pooki, pee edol ina, neisis Enkai.