Read MAASAI REVISED PROTESTANT Luka 20 Bible Online

Luka 20 - MAASAI REVISED PROTESTANT bible

Luka 20

¹Ore nabo olong eiteng'enita Yesuiltung'ana nelikioo lomon supati te nkaji e Nkai, nepuonu lapolosak kituaak o lasirak o lpayiani enetii

²neikilikuan aajoki, “Toliki iyiook ae te ngolon e ng'ae ias iyie kuna baa, ae ng'ae likinchoo ena golon?”

³Newaliki Yesu ajoki, “Kaikilikuan sii nanu intae embae nabo; entolikioki,

⁴amaa apa enkibatisa e Yohana ai Keper eing'uaa, anaa ltung'ana?”

⁵Neiguana maate ejo, “Amaa tenikijo, ‘Keper einguaa’, nejoki iyiook, ‘Kainyoo naa pee eitu irukuruku?’

⁶Kake ti nikijo, ‘Iltung'ana eing'uaa,’ nenang iyiook kulo tung'ana pooki too soito; amu keyiolo too ltauja aajo oloiboni le Nkai Yohana.”

⁷Newaliki aajoki, mikiyiolo eneing'uaa.

⁸Nejoki Yesu ninche, “Maliki sii nanu intae eneing'uaa engolon naasie kuna baa.”

⁹Neiteru Yesu aliki olorere ena kitanyaanyukoto, nejo, “Etuno oltung'ani enkurma oo lng'anayio, neisho laramatak meisilenoi nelo ai kop nebik enkata naado.

¹⁰Ore pee ebau enkata, neirriu osinka airriwaki ilaramatak, meishoo ematua oo lng'anayio le ina kurma; kake eidong'o lelo ooisilenoitie ninye nerriny too nkaik naarook.

¹¹Neirriwaa likae sinka; near sii ilo nesul, nearaa too nkaik naarook.

¹²Neitoki ake airriwaa oli okuni, nepik ilbaa ilo nearaa ong'ata.

¹³Nejo olopeny ina kurma oolng'anayio, ‘Kaji aiko? Olayioni lai kirotet airriwaa; kebaiki neyanyit ninye.’

¹⁴Kake ore pee edol lelo ooisilenoitie ninye, nejokino maate, ‘Ele doi olajung'oni, mataar pee eaku enaang enjung'ore.’

¹⁵Nearaa auluo enkurma near metua. Kaa pasa kenya eitaasi ninche olopeny e nkurma?

¹⁶Kelotu aidaikie lelo ooisilenoitie neisho kulikae ina kurma.” Ore pee ening ninche ina nejo, “Taba meiwuang'a!”

¹⁷Kake eing'ura Yesu ninche nejo, “Kaa naa ejo ilkigerot, ‘Ilo soit otanyaita lashetak otaa ole lukunya o lmairroto?’

¹⁸Ore pooki ng'ae osulakino ilo soit negiligil aitaa mpurdat; kake ore ake olourokino ninye nerrar tukul.”

¹⁹Neiteru lasirak o lapolosak kituaak aajo matipik Yesu inkaik teina saa, kake etureita olorere; amu etoduaa aajo ninche eipirie ina kitanyaanyukoto.

²⁰Metaa neing'or ninche ninye neirriwaki ilaikitalak ooitaakuno supati te Nkai, pee etum aawaita kuna naajo, netum aaitarasaki enkitoria o enkiguana o lbalusui.

²¹Neikilikuan ninche aajoki, “Olaiteng'enani, kiyiolo aajo iro iyie ninteng'enisho too sipat, metii enyorrakinoto, kake iutu iyie enkoitoi e Nkai te sipata.

²²Keishiaakino neishori Kaisari kodi ana aimeishiaakino?”

²³Kake etayiolo Yesu olosek lenye, nejoki,

²⁴“Entoduaaki empisai. Ai ng'ae esirakino naa kole ng'ae olkigeroto oata?” Nejoki, “Ole Kaisari.”

²⁵Nejoki ninche, “Enchoo naa Kaisari inaara ine Kaisari, ninchosho Enkai inaara ine Nkai.”

²⁶Nelaikino aaibung'a ninye etii olorere te nena naatejo; kake eing'asiate ninche te nena naawalu negira.

²⁷Nepuonu Sadukayo enetii Yesu, lelo apa oojo meetae empiunoto.

²⁸Neikilikuan embae nabo, aajoki, “Olaiteng'enani, etisiraka iyiook Musa nchere te neye olalashe oltung'ani, oata enkitok nemeeta nkera, neya ake ilo tung'ani ina kitok pee eiki olalashe nkera.

²⁹Eetae apa ilalashera oopishana; neyam ole dukuya enkitok, neye meeta nkera;

³⁰neiko nejia oli aare,

³¹neyam sii oli okuni. Neiko nejia pokira oopishana neye neitu eing'uaa nkera

³²ore te siadi neye sii ninye enkitok.

³³Amaa kenya te mpiunoto, etiu nejia, keaku ene ng'ae ina kitok? Amu eyama pokira oopishana ninye.”

³⁴Nejoki Yesu ninche, “Eyamisho neishoori meyami nkera e na kata;

³⁵kake ore lelo oishiaakino nebaiki ina kata nebaiki sii empiunoto oo lootuata meyamisho nemeyami,

³⁶amu metiooyo eitoki aaye, amu etiu anaa lmalaika neaku nkera e Nkai, aaku nkera e mpiunoto.

³⁷Kake ore nchere kepiu ilootuata, etuutua ninye Musa, teine neigerore mbaa osanag oyupuyup teine neipotie ninye Olaitoriani ajo Enkai e Abraham naa Enkai e Isaak, naa Enkai e Yakobo.

³⁸Mme naa Enkai oo lootuata, kake enoo looishu; amu ninye eishuyie pooki.”

³⁹Newalu embata oo lasirak aajo, “Olaiteng'enani, iroro aitobiraki.”

⁴⁰Amu eturia ninche eitoki aaikilikuana ae bae.

⁴¹Kake etiaaka Yesu ninche, “Kaji etiu pee eji Kristo enkerai e Daudi?

⁴²Amu etejo Daudi openy te mbuku Olkerempe le Nkai, ‘Etiaka Olaitoriani, Olaitoriani lai, Totona te nkaina ai e tatene

⁴³o metaba anaa naitaa ilmang'ati linono olorika loo nkejek inono.’

⁴⁴Amaa teneipoto Daudi ninye ajo Olaitoriani; kaji naa eiko pee eitoki Yesu aaku enkerai enye?”

⁴⁵Nejoki Yesu lkipaareta lenyena einining'ito olorere pooki,

⁴⁶“Entorrip ate too lasirak, oopuaya eishopito lkilani oodo, nenyor neirorokini too neemishoreki nenyor ilorikan sidain aaisul tiatua nkajijik e ntumo, o wuejitin e nkanyit too mashoi,

⁴⁷nenya aamut nkajijik oo nkolia neitaakuno neitoodor enkomono e Nkai. Ketum ninche enkiguana narrish oleng.”