Read MAASAI REVISED PROTESTANT Luka 21 Bible Online

Luka 21 - MAASAI REVISED PROTESTANT bible

Luka 21

¹Neshumu Yesu nkonyek nedol ilkarsisi eitadoiki inkishoorot enye osanduku oshumishoreki;

²nedol sii enkoliai aisinani eitadoiki isuyan are.

³Nejo, “Kedede ajoki intae, ena oliai aisinani natipika aisul too lkulikae pooki;

⁴amu eishorutua pooki te nkumoi oo naata, kake eishorua ninye to sina lenye pooki toki naata.”

⁵Ore eimaki kulikae enkaji e Nkai, eneikunaki teneikodi too soito sidain o too nkishorunot, nejoki Yesu,

⁶“Ore anaa kuna tokitin nidolitata, kepuonu nkolong'i nemeitokini aata osoit obo oiteleikino olikae lemesulakini enkop.”

⁷Neikilikuan lkipaareta lenyenaaajoki, “Olaiteng'enani, kanu eaku kuna baa, naa ainyoo olmonekie outu ajo etaa kebau?”

⁸Nejo, “Entodol meitapong'ori intae; amu kepuonu lkumok te nkarna ai, nejo, ‘Nanu ilo? Etinyikua enkata!’ Emisuj intae ninche.

⁹Naa ore pee ining'ining'i njoreitin o long'oling'oli, emiureisho, amu keituruku ake nena aikununye nejia, kake melotu enkiting'oto e nkop nabo kata.”

¹⁰Nejoki ninche, “Kedumakino olosho likae osho, nedumakino enkitoria enkae kitoria;

¹¹nelotu olokirikiri le nkop too wuejitin kumok, nelotu olameyu o olmeitai too wuejitin kumok, naa kepuonu ntabo naaitureisho o lmonek ooing'uaa shumata,

¹²kake ore eton eitu ebau nena pooki keibung'i intae, neinyali, neitarasakini intae nkajijik e ntumo o jila, nerikokini intae laiguanak o lbalusuni te nkaraki enkarna ai.

¹³Neaku te intae enkata nimbalielie enkirukoto inyi.

¹⁴Entumut ena nabo too ltauja linyi nchere, emidamu eitu ebau enkata eninkoko tinimitutu ate;

¹⁵amu nanu oisho intae enkariyiano oo nkutukie o eng'eno, nemeetae hoo obo le lelo mang'ati linyi oidim airisha aashu ewal.

¹⁶Keitarasaa intae intoiwuo o lalashera o ltung'ana lo lmarei o lchoreta, naa keari kulikae linyi metuata;

¹⁷neibayu intae pooki te nkaraki enkarna ai.

¹⁸Kake meimin ninye olpapita obo loo lukuny inyi.

¹⁹Kake te ng'iriata inyi itumutumu enkishui.

²⁰“Kake ore pee idolidolo Yerusalem etamana mpuot, entayiolo aajo etinyikua emutata enye.

²¹Ore ina kata lootii Yudea esikaki ldoinyo, ore lelo ootii atua ina anasa nepuku aapuo, nemejing'u lelo ootioyo ti ong'ata;

²²amu nkolong'i e nkitamioto kuna, naabaya mbaa pooki naatisiraki.

²³Woi nena naanuta o naaitanakisho te nena olong'i! Amu keaku kitok osina o engoro e Nkai nadoiki kulo tung'ana;

²⁴kedung'ori aauroo too lalema, neriki atua loreren pooki meshomo sinkaisho; neitiamie Iloreren Yerusalem o metaba anaa neitabari nkatitin oo Loreren.

²⁵“Naa keitodolu enkolong o lapa o lakir ilbulabul le nking'asia. Ore te nkop neinepu osina iloreren o enking'aing'ai neikurrukur enaiposha o lopir le nkare,

²⁶neiterriaa ltung'ana te nkiputukuny e nena baa naapuonu enkop; amu keigirigiro engolon pooki e shumata.

²⁷Ore teina kata nedoluni Enkerai e Tung'ani elotu te ngolon te nkatampoi o te nkisisa kitok.

²⁸Ore taa pee eng'as aabau kuna baa eng'ura shumata entushumu lukuny inyi, amu etinyikua esarunoto inyi.”

²⁹Neliki Yesu lkipaareta lenyena enkitanyaanyukoto ajoki. “Eng'ura olng'aboli o lkeek pooki;

³⁰ore ake pee eiteru aaitayu mbenek, niduaakiki ate nchere etinyikua oladalu.

³¹Nejia naa etiu, ore pee idolidolo eaku kuna baa, entayiolo entejo etinyikua enkitoria e Nkai.

³²Kedede, ajoki intae, meishari ena ishoi eitu eitabari nena pooki.

³³Keish keper o enkop, kake meish ororei lai hoo obo.

³⁴“Kake eng'ura ate pee meibiitiari ltauja linyi te nkaraki emerai o nkolati e na kop, neirrashu intae ina olong neluam intae anaa orreshet;

³⁵amu nejia etiu, kedoiki lelo pooki oomanya enkop pooki.

³⁶Kake entashololoto intae inkatitin pooki, niomonunu meishori intae engolon nipaashieshie nena naapuonu, pee intasheshe te dukuya Enkerai e Tung'ani.”

³⁷Neiteng'enisho Yesu te ndama nkolong'i pooki te nkaji e Nkai, kake ore kewarie neipang alo airrag oldoinyo oji oloo Loirienito.

³⁸Ore enasirie neyooki ltung'ana pooki aapuo aainining ninye te nkaji e Nkai.