Read MAASAI REVISED PROTESTANT Luka 22 Bible Online

Luka 22 - MAASAI REVISED PROTESTANT bible

Luka 22

¹Nenyiku osirua loo Mukateni neitu eisuishieki oji Pasaka.

²Neing'oru ake lapolosak kituaak o lasirak eneiko pee ear Yesu metua; paa olorere eure.

³Nejing Sheitani Yudas oji Iskariot, olaa obo le lelo tomon o aare;

⁴nedumunye alo aning'ore lapolosak kituaak o sikarini aitoriak eneiko pee ekaldaa Yesu te ninche.

⁵Neshipa ninche nejoki keisho mpisai.

⁶Nenyorraa Yudas, neing'oru erishata naitarasarie Yesu meyiolo olorere.

⁷Nebau enkolong oo Mukateni Nemeisuishieki, ina olong nayieng'i olkuoo lo sirua le Pasaka.

⁸Neirriwaa Yesu Petero o Yohana, ajoki, “Enchom entobiraki iyiook Pasaka pee kitum aainosa.”

⁹Nejoki ninche Yesu, “Kaji iyieu nikipuo aaitobirie?”

¹⁰Nejoki, “Eng'ura, ore ijing'ijing'i ina anasa, nenang'are intae olee onapita oltoo le nkare, enturubare nijing'ijing'i enkaji najing,

¹¹nijokiki olopeny enkaji, ‘Kitiaaka Olaiteng'enani, koree ake olgilata loo lomon, lainosie Pasaka o lkipaareta laainei?’

¹²Naa keutaki intae olgilata le shumata oidipaki aaitobira; entobira teine.”

¹³Nepuo, neinepu etiu anaa enatiaaka; neitobiraki Pasaka.

¹⁴Ore pee ebaya esaa, neton Yesu adaa, netoni lkipaareta lenyena te nebo ninye.

¹⁵Nejoki ninche, “Atayiewua te yieuna sapuk nanya ena Pasaka te nebo intae eton eitu aaisilisili.

¹⁶Amu ajoki intae, meekure aitoki ai kata anya o meitabari te nkitoria e Nkai.”

¹⁷Ore pee eng'amu enkikompe, neisho Enkai enashe nejo, “Entudumu ena entang'ar;

¹⁸amu ajoki intae ore ebaiki taata meekure aitoki ai kata aok ena kikombe oo lng'anayio lo sabibu o meeu enkitoria e Nkai.”

¹⁹Nedumu emukate, ore pee eisho Enkai enashe nebel neisho ninche ejoito, “Osesen lai ele oishoori te nkaraki intae. Entaas ena kidamumu nanu.”

²⁰Neiko nejia enkikompe eidipa endaa, ejoito, “Ore ena kikompe, osotua ng'ejuk eitaiki intae anaa enaibukori osarge lai, te nkaraki intae.

²¹Kake eng'ura amu etii ilo laaitarasaa ena misa te nebo nanu.

²²Amu keikunari Enkerai e Tung'ani anaa enatejoki apake; kake ee kake aiyia ilo laa ninye oitarasaa!”

²³Neiteru ninche aaikilikuana maate, aajo kalo pasa oiko nejia.

²⁴Nepuku sii enchankar tiatua lkipaareta ejo kalo lenye oaku olkitok aisul te ninche.

²⁵Nejoki Yesu ninche, “Eitoreisho laiguanak loo Loreren; ore lelo ooata enkitoria te ninche neji ninche ilooduporeki.

²⁶Kake mme nejia etiu te intae; enchoo ilo kitok aisul te intae pooki metotiwuo anaa ai ninye oloti aisul, netiu olarikoni anaa olaisiaayiani.

²⁷Amu kalo olkitok, koloton te misa, anaa keilo oisiaaisho? Aime ilo oton te misa? Kake atii nanu atua intae atiu anaa oloisiaaisho.

²⁸“Naa intae ootobiko kiboitarere too ntemat aainei

²⁹ore anaa enaaishoo Papa enkitoria, aisho sii nanu intae aiko nejia

³⁰pee itonini aadaa te nebo nanu te nkitoria ai, nitonini too lorikan le nkitoo aaiguanaki lelo oshon tomon o aare loo Siraeli.

³¹“Simon, Simon, kitoomonuo iyie Sheitani neishooki pee kitum ninye aipiripiro, anaa enkano,

³²kake aatoomonoko iyie pee meish enkirukoto ino, naa ore pee kishukokino, ntagolo lalashera linono.”

³³Nejoki Petero, “Lo Kitok, atonyorrayie nanu pee aarubare jila aashu keeya.”

³⁴Nejoki Yesu, “Aajoki, Petero, meru olchogoo ade taata, eitu kimiki iyie, katitin uni ajo mikiyiolo.”

³⁵Nejoki Yesu ninche, “Amaa apa pee airriwaa intae miatata mbenia oo mpisai aashu olbene aashu namuka, italaita toki?” Nejo, “Eitu.”

³⁶Nejoki, “Kake ore ilo oata olbene inchoo eya, naa inchoo ilo lemeeta olalem emir enkila enye pee einyang'u.

³⁷Amu meeta nchere pee eitu eitabari ele sirata te nanu ojo, ‘Amu eikenakini ninye ilwushuush;’ amu kepuonu o metimitunye inaatisiraki tialo nanu.”

³⁸Nejo ninche, “Olaitoriani, ng'ura doi, noolo lalema aare.” Nejoki ninche, “Eidipe.”

³⁹Nepuku Yesu anaa enaiko apake, nelo oldoinyo loo Loirienito, nesuj lkipaareta lenyena.

⁴⁰Ore pee ebaiki ine wueji nejoki ninche, “Entoomon pee mijing'ijing'i atua ntemat.”

⁴¹Nelam ninche alo enelakua peno, negil kung aomon ejo,

⁴²“Papa, ti niyieu, torishieki ena kikompe; kake ore ake eyia mme anaa enayieu nanu, kake nchoo metotiwuo anaa eniyieu iyie.”

⁴³Neipang'aki ninye olmalaika oing'uaa Keper, aitagol.

⁴⁴Ore te nkaraki naisina neitirrish oleng aomon netiu enkinyinyiret enye edoiki enkop anaa lkituaa kitong'at lo sarge.

⁴⁵Ore pee einyototo te nkomono, nelotu enetii loointeng'eni lenyena neinepu eirurate te nkaraki osina,

⁴⁶nejoki, “Kainyoo pee irurara? Enyoito entoomon pee mijing'ijing'i atua ntemat.”

⁴⁷Ore eton eirorita, nelotu esiamo tenebo o ltung'ani oji Yudas, obo le lelo tomon o aare, erikito. Nenyikaki Yesu ang'utut;

⁴⁸kake etiaaka Yesu, “Yudas, ai te ng'ututata intarasaa Enkerai e Tung'ani?”

⁴⁹Ore pee edol lelo ooboitare enaasayu, nejo, “Olaitoriani, eikiosh too lalema?”

⁵⁰Neosh obo osinka lo lapolosani kitok nedung'u enkiok e tatene.

⁵¹Kake nejo Yesu, “Entapal ena!” Neiseyie enkiok enye neishiunye.

⁵²Neitoki Yesu ajoki lapolosak kituaak o laitoriak loo sikarini le nkaji e Nkai, o lpayiani, ooetuo aarasaki, “Amaa, eikipuonunu aarasaki anaa kara olaisimani, iatata lalema o siaren?

⁵³Kaboitare intae anaa ake te nkaji e Nkai, neitu kimbung'ubung'u. Kake esaa inyi ena, o engolon e naimin.”

⁵⁴Ore pee eidip aaibung'a Yesu nerik, neitabaiki enkang o lapolosani kitok. Nesuju Petero tenelakua.

⁵⁵Ore pee einoki enkima te mpolos o lkoriet netoni te nebo, neton sii ninye Petero te nebo ninche.

⁵⁶Ore pee edol enkaisiaayiani ninye eton te newang neunoki enkong'u nejo, “Ore ele tung'ani keboitare oshi Yesu.”

⁵⁷Kake etomikio Petero, ejo, “Na kitok, maiyiolo nanu ninye.”

⁵⁸Ore te nkiti kata nedol likae nejo, “Ira sii iyie obo lenye.” Kake etejo Petero, “Eero, mme nanu.”

⁵⁹Ore etulusoyie esaa nabo neitoki ake likae aitirrishaki, ejo, “Kedede keboitare sii oshi ake ele tung'ani Yesu amu Olgalilayai.”

⁶⁰Kake etejo Petero, “Lo lee, maiyiolo nanu enijoito.” Ore nabo kata, eton eirorita, neru olchogoo.

⁶¹Neibelekenya Olaitoriani aing'or Petero. Nedamu Petero ororei lo Laitoriani otiaka, “Ore ade taata eitu eru olchogoo aikimiki iyie katitin uni.”

⁶²Neipang alo aishir te mion.

⁶³Ore ina kata lelo ooibung'ita Yesu nesurdaany near ninye;

⁶⁴neitoki sii aaen nkonyek neikilikuan aajoki, “Imbonu! Ai ng'ae likitoosho?”

⁶⁵Nejo siib kulikae rorei kumok aayietaa ninye neinyal.

⁶⁶Ore pee ekenyu, netumo olkioma loo lpayiani lo lorere o lapolosak kituaak o lasirak, nerik Yesu enetii olkioma lenye, nejoki,

⁶⁷“Toliki iyiook tenaa keyie Kristo?.” Nejoki Yesu ninche, “Tenaliki intae, mikirukuruku;

⁶⁸naa te naikilikuan intae embae nimikiwalikiki.

⁶⁹Kake ore ebaiki taata keton Enkerai e Tung'ani te nkaina e tatene e ngolon e Nkai.”

⁷⁰Nejo ninche, “Metaa eira doi Enkerai e Nkai?” Nejoki ninye ninche, “Intae ootejo kara.”

⁷¹Nejo ninche, “Kainyoo ai shakenisho neton kiyieu? Kitoning'okito ate eimunye enkutuk enye.”