Read MAASAI REVISED PROTESTANT Luka 23 Bible Online

Luka 23 - MAASAI REVISED PROTESTANT bible

Luka 23

¹Nedumunye olorora pooki, nerikokini Yesu Pilato.

²Neiter aaitang'or ninye, aajo, “Kineputua ele tung'ani eiwushie olorere lang nemitiki iyiook kincho Kaisari kodi, nejo kewan Kristo naa olaiguanani.”

³Neikilikuan Pilato Yesu ajoki, “Ai yie doi Olaiguanani loo Lyahudi?” Newaliki ajoki, “Iyie otejo nejia.”

⁴Nejoki Pilato ilapolosak kituaak o lorora, “Eitu atum entiyoto tele tung'ani.”

⁵Kake eitirrishakita aajo, “Keing'oling'ol olorere, eiteng'enita te Yudea pooki, ebaiki Galilaya o meeu ene.”

⁶Ore pee ening Pilato ina, neikilikuanu tena kole Galilaya ilo tung'ani.

⁷Ore pee ening ajo ole nkalo naitore Herode, neirriwaki Herode etii ninye Yerusalem ina kata.

⁸Ore pee edol Herode Yesu, neshipa oleng, amu keyieu apa nedol te nkata naado, amu etoning'o imbaa enyena, nejo sii pee edol eas embae e nking'asia.

⁹Ore te nkaraki ina neikilikuanishore Herode te nkata naado; kake eitu ewaliki Yesu.

¹⁰Neitashoo lapolosak kituaak o lasirak aaitirrishaki aaitang'or ninye.

¹¹Nesul Herode o sikarini lenyena, neikordod; neitoki aishopoki olkila, nerrinyoki Pilato.

¹²Neaku lchoreta Herode o Pilato aaiteru te ina olong, amu ore eton eitu ebau ena, naa ilmang'ati apa ninche pokira.

¹³Neitoki Pilato aipot ilapolosak kituaak o laitoriak lo lorere

¹⁴nejoki ninche, “Intae likitorikokito ele tung'ani anaa oloiwushie olorere; naiguanare te dukuya intae, neitu atumie ele tung'ani entiyoto hoo nabo too nitipika.

¹⁵Eitu sii etumie Herode amu etorrinyoko iyiook. Eitu hoo eas ai nairirikino keeya;

¹⁶metaa kaitame naisho elo.”

¹⁷Nemeeta kata ake nemelaaki Pilato ninche oltung'ani obo te ilo sirua.

¹⁸Kake etabuakutua pooki te nebo aajo, “Iwuang'ie ele tung'ani, naa Barabas talaaki iyiook”

¹⁹oltung'ani taa otanang'akaki jila, te nkaraki enkitarrikinoto natijing'a ina anasa, o te nkaraki natarishe.

²⁰Neitoki Pilato airorie olorere, eyieu nelaku Yesu;

²¹kake nebuaku ninche aajo, “Tasho ninye tasho!”

²²Neigilie Pilato ene uni ajoki, “Kainyoo, kaa torroni etaasa? Eitu atumie nanu ninye entiyoto nairirikino keeya; metaa kaitame nalaku.”

²³Kake eitirrishakita nekurraki to ltoilo sapuk ejo metashei. Neidimu oltoilo lenye ninye.

²⁴Nedung'oki Pilato enkiguana meitaasi Yesu ina nayieu ninche.

²⁵Nelaku ilo tung'ani otanang'akaki jila te nkaraki enkitarrikinoto oo nkitanapat o te nkaraki natarishe, ilo oipotutuo, kake eishooyie Yesu meitaasi ina nayieu ninche.

²⁶Ore erikitoi Yesu, neibung'i oltung'ani obo oji Simon le Kirene, oewuo eing'uaa nkurman, neitanapi osalaba, metanapa esujita Yesu.

²⁷Nesuj olorora kitok le lelo tung'ana, o nkituaak naaishiraki eoshiosh ilgooitie.

²⁸Kake eibelekenye Yesu aing'or nejoki, “Natoyie e Yerusalem, emikinchiraki nanu, kake ate enchiraki o nkera inyi,

²⁹amu kepuonu nkolong'i naaku keji, ‘Emayiana nkituaak olupin, nemayiana nkoishuaa neitu eisho, nemayiana ilki leitu enaki!’

³⁰Neaku kejokini ildoinyo, ‘Entuurokinoto iyiook,’ nejokini ndoinyio, ‘Entoipoi iyiook.’

³¹Amu, pasa taa eikoni nji olchani onyori, kaji eikoni olotoyio?”

³²Neriki sii kulikae wushuush aare, metari te nebo Yesu.

³³Ore pee ebaiki ewueji neji Emborbor, neshe Yesu teine, o lelo maisero, etii obo te tatene netii olikae te kedianye.

³⁴Nejo Yesu, “Papa, tapalaki ninche, amu meyiolo enaasita.” Neosh ninche enkukuo pee etum aatoor nkilani enyena.

³⁵Neitashoo ltung'ana teine, aaing'or; kake nesurdaany ilaitoriak, ejo, “Keitajewuo kulikae, nchoo naa eitajeu kewan te naa ai ninye doi Kristo le Nkai, ilo gelunoti lenye.”

³⁶Nesurdaany sii ninche isikarini, epuonu aayaki enaisho naisuisho

³⁷nejo, “Tenaa ira Olaiguanani loo Lyahudi, intajeu kewan!”

³⁸Etisiraki sii olkigeroto te shumata elukunya enye ojo, “Ele Olaiguanani loo Lyahudi.”

³⁹Nemor obo le lelo wushuush ootashoki te nebo ninye, nejo, “Aimira doi Kristo? Intajeu kewan o iyiook!”

⁴⁰Neisikong olikae ajoki, “Ai miure iyie Enkai, nidol ajo ina kiguana kitudung'okoki sii iyie?

⁴¹Neishiaakino ninche iyiook; amu inikitaasa eitalakitae iyiook; kake meeta hoo ele tung'ani entorrono nataasa.”

⁴²Nejoki, “Yesu, tadamuaki nanu te nilotu te ngolon ino e nkitoria.”

⁴³Nejoki Yesu ninye, “Esipa aajoki iyie, ijing ade Paradiso te nebo nanu.”

⁴⁴Neaku ina kata enaipirie enkolong, nerip enaimin enkop pooki o metabaiki saa naaudo,

⁴⁵neimis ewang'an e nkolong; nepolosa olkarasha orish enkaji e Nkai aaku are.

⁴⁶Ore Yesu, nebuaku to ltoilo sapuk, nejo, “Papa, inkaik inono apik enkiyang'et ai!” Ore pee ejo nejia nedung'o tau.

⁴⁷Ore pee edol olkitok loo sikarini enataase, neisis Enkai, nejo, “Kedede meeta hoo ele tung'ani entiyoto!”

⁴⁸Ore ilo orora pooki ooetuo enking'urare, pee edol enataase, nerrinyo nkang'itie enye eoshiosh ilgooitie eisina.

⁴⁹Ore ilooyiolore Yesu pooki o nkituaak naatusujutua eing'uaa Galilaya neitashe te nelakua aadol kuna baa.

⁵⁰Netii apa oltung'ani oji Yosef le nkang oo Lyahudi naji Arimatea. Naa obo ninye lo lkiama, naa oltung'ani supat asipani,

⁵¹neitu enyorraa ninye ina nayieu o enataasa ninche, amu keanyita enkitoria e Nkai.

⁵²Nelo ilo tung'ani enetii Pilato aomonu osesen le Yesu.

⁵³Neitadou neirin to lkarasha le kitani, neirragie te nkurare naguetuno to soit, neitu ai kata epiki likae.

⁵⁴Naa enkolong e Nkitobirare, etaa kebau Sabato.

⁵⁵Nesuj nkituaak naairiamunore Yesu eing'uaa Galilaya, nedol enkurare, nedol eneikunakaki osesen enturoroto.

⁵⁶Nerrinyo aapuo ang, nepuo aaitobir sonkoyoni o ila naarropil. Neyeng'iyeng'a te nkolong e Sabato anaa enajo inkitanapat.