Read MAASAI REVISED PROTESTANT Luka 5 Bible Online

Luka 5 - MAASAI REVISED PROTESTANT bible

Luka 5

¹Ore eiding'akino ltung'ana aaman Yesu einining'u lomon le Nkai, neitashe ninye te mbata e naiposha e Genesaret.

²Nedol impeuti are eirrag te mbata e naiposha. Etupukutuo larreshok loo sinkir aapuo aaisuj irresheta lenye.

³Nejing Yesu atua empeut nabo, naa ene Simon nejoki meturrumoi peno aitalam enkop natoyio. Neton aiteng'en olorere etonita ninye tiatua empeut.

⁴Ore pee eidip airoro nejoki Simon, “Terewa enegut nintadoikiki irresheta linyi enaiposha aaibung isinkir.”

⁵Nejoki Simon, “Lo Kitok, kitaasishote enkewarie nalulung'a neitu kitum toki, kake ore amu itejo, kaitadoyio irresheta.”

⁶Ore pee eiko nejia neibung olkito turrur loo sinkir omeiteru aang'era resheta lenye.

⁷Neyuku ile ncholiek enye ootii enkae peut meetu aaret. Nepuonu, neiput impeuti pokira are, ometaa keimis.

⁸Ore pee edol Simon Petero ina nebatata too nkejek e Yesu, nejoki, “Olaitoriani, tung'uayioki nanu amu, kara oltung'ani loo ng'ok.”

⁹Amu eing'asie ninye o lelo ooboitare, te nkumoi oo sinkir ooibung'a;

¹⁰eing'asiate sii ninche layiok le Sebedayo, aa Yakobo o Yohana, oora le ncholiek e Simon, Nejoki Yesu Simon, “Miureishoyu; ore ebaiki taata, iltung'ana intorioo aibung.”

¹¹Nereu mpeuti enkop natoyio, neing'uaa pooki toki nesuj Yesu.

¹²Ore etii Yesu ae ang, netii oltung'ani oata enkeeya oo lbolot, ore pee edol ninye Yesu, nebatata te nkomom, neserem ajoki, “Olaitoriani, te niyieu eikindim aishiunye naishiu.”

¹³Neitorioo Yesu enkaina enye neiseyie nejoki, “Ekayieu, inchiu tisikayu.” Neishiu asika nabo kata ina keeya oo lbolot.

¹⁴Neitanap Yesu ninye pee meliki likae tung'ani; nejoki, “Kake shomo, intoduaai kewan mikitisipu olapolosani ninchooyo olasar le nkishiunoto naitanapishe Musa pee eitadedeyie ina sikata ino te ninche.”

¹⁵Kake etoponari lomon le Yesu aaibulu enkop pooki, nepuonu iltung'ana kumok enetii aainining neishiunye imuoyiaritin enye pooki.

¹⁶Kake kekepari ake nelo ong'ata, aomon Enkai openy.

¹⁷Ore nabo olong eiteng'enisho Yesu, netii ine Ilfarisayo o laigerok ooing'uaa nkang'itie pooki e Galilaya, o Yudea o Yerusalem. Netii engolon e Nkai atua Yesu pee etum aishiunye olorere.

¹⁸Nepuonu ina kata ltung'ana oonapita te rruat, oltung'ani maima, netem aajo mayaki Yesu tiatua aji.

¹⁹Ore te nkaraki enkiding'a o lorere nelaikino aayaki. Nedumu aailepakinye shumata enkaji, nebol aaitayu elusie, neitadou te rruat aaitadoiki nkejek e Yesu te mpolos o lorere.

²⁰Ore pee edol Yesu enkirukoto naata ninche, nejoki ilo tung'ani, “Olchore, kitapalakaki ng'ok inono.”

²¹Neiteru ilaigerok o Lfarisayo aaishankarra ejo, “Ae ng'ae ele oiro amor Enkai? Aimme Enkai ake naidim atapalaki oltung'ani ing'ok?”

²²Nedol Yesu eishankarra newaliki ajoki, “Kainyoo pee inchankarrarra maate?

²³Kaa nalelek, te najo, ‘Kitapalakaki ng'ok inono,’ ana te najo, ‘Inyo shomo?’

²⁴Kake ore pee iyiolouu aajo keeta Enkerai e Tung'ani enkitoria te nkop napalakinye ng'ok,” nejoki ilo tung'ani maima, “Aajoki inyo tudumu erruat ino shomo ang.”

²⁵Neinyototo nabo kata ilo tung'ani te dukuya ninche, nedumu enaduoo rruat napetita, nelo ang eisisita Enkai.

²⁶Neing'asia pooki neisis Enkai, neureishoyu, nejo, “Kitoduaa ake taata mbaa e nking'asia!”

²⁷Ore pee eidipayu nena nelo Yesu, nedol oltung'ani osotu kodi oji Lawi, eton te wueji nesotunye kodi; nejoki, “Tusujuaki nanu.”

²⁸Neing'uaa Lawi pooki toki, neinyototo asuj Yesu.

²⁹Neitoomon Lawi Yesu to sirua kitok netii iltung'ana kumok oo loosotu kodi o kulikae ake oodaa te nebo ninche.

³⁰Neing'unyung'unyaki Lfarisayo o laigerok lkipaareta lenyena aajo, Kainyoo pee ing'arierie endaa niokishosho te nebo iloosotu kodi o laing'okok?”

³¹Newaliki Yesu ajoki, “Meyieu iltung'ana biyot olabaani, iloomuoi ooyieu.

³²Eitu alotu aipot lelo supati kake ilaing'okok aeuo aipot meetu aairridu.”

³³Nejoki iltung'ana Yesu, “Anaaijo keen ate aaitupukoo oshi lkipaareta le Yohana neomon Enkai naleng sii, naa nejia eiko lkipaareta loo Lfarisayo, nedaa ninche linono neokisho?”

³⁴Nejoki Yesu ninche, “Indimidimi aaitupukoi ilomon lo loyamisho eton eboitare oloyamisho?

³⁵Kake keyooki aapuonu nkolong'i naayae oloyamisho aaitung'uaa, nepukoo taa ninche te nena olong'i.”

³⁶Neitoki Yesu aliki ena kitanyaanyukoto nejoki, “Meetae oltung'ani oboru erashe to lkila ng'ejuk aripaki olkila musana, pee meinyal ilo ng'ejuk elde musana.

³⁷Meetae sii olobukoki enaisho oo sabibu ng'ejuk ilbenia musan pee medany ina aisho oo sabibu lelo benia musan, neibukori enaisho neidaaya ilbenia.

³⁸Kake ilbenia ng'ejuko epiki enaisho ng'ejuk.

³⁹Meetae sii oltung'ani otooko enaisho nao oitoki ayieu enajon, amu kejo, ‘Enao esidai.’ ”