Read MAASAI REVISED PROTESTANT Luka 6 Bible Online

Luka 6 - MAASAI REVISED PROTESTANT bible

Luka 6

¹Neaku ore te nkolong e nkiyeng'iyeng naji Sabato, neim Yesu atua nkurman e nkano. Negilu lkipaareta lenyena lukuny e nkano nepupu too nkaik aanya lanterera.

²Nejoki embata oo Lfarisayo, “Kaji etiu pee iasiasa enemeishoruno too nkitanapat ang te nkolong e Sabato?”

³Newaliki Yesu ajoki, “Keitu ai kata isumusumu enataasa Daudi o looisiritore pee etir esumash?

⁴Eneikuna pee ejing enkaji e Nkai, neitayu emukate nasinya, nenya, neng'arie sii lelo ooisiritore. Neibala nchere meishoruno too nkitanapat meinosa likae tung'ani ina mukate leme lapolosak?”

⁵Neitoki Yesu ajoki, “Olkitok le nkolong e Sabato doi Enkerai e Tung'ani.”

⁶Ore ti ae olong e Sabato nejing Yesu enkaji e ntumo aiteng'enisho. Netii oltung'ani ine oikaoele enkaina e tatene.

⁷Neing'oru ake kulikae aigerok o Lfarisayo embae naitang'orie Yesu aajo eitarruoyie; nejur pee edol te naa keeta oltung'ani oishiunye te nkolong e Sabato.

⁸Kake etayiolo Yesu ndamunot enye nejoki ilo tung'ani oikaoele enkaina, “Inyo wou dukuya tene.” Neinyototo ilo tung'ani neitashe teine.

⁹Nejoki taa Yesu ninche, “Aikilikuan intae ena? Kaa naishoruno too nkitanapat mataas te nkolong e Sabato? Keishoruno mataar ana mataret?”

¹⁰Nekurraki pooki inkonyek aing'or, neitoki ajoki ilo tung'ani, “Intorioi enkaina ino!” Neiko nejia, neishiu enkaina enye.

¹¹Kake eiputa ninche engoro sapuk neiguana maate eing'oru enaitaas Yesu.

¹²Ore te nena olong'i, neilep Yesu alo oldoinyo aomon, neton enkewarie pooki eomonito Enkai.

¹³Ore pee ekenyu neipot lkipaareta lenyena negelu tomon o aare tiatua ninche nejo ninche lkipaareta.

¹⁴Naa Simon eipoto ajo Petero o Anterea olalashe lenye; o Yakobo o Yohana, o Filipo o Bartolomayo;

¹⁵Matayo o Tomas, Yakobo ole Alfayo o Simon oji olkirowuai;

¹⁶Yudas olayioni le Yakobo o Yudas Iskariot laa ninye otakaldayie Yesu.

¹⁷Ore pee edou Yesu oo lkipaareta lenyena to ldoinyo nepuonu enkisiashata. Netii ine lkipaareta lenyena kumok o siamon naaing'uaa Yudea o Yerusalem o lomanaa le Tiro o Sidon;

¹⁸laa ninye eetuo aainining nejo sii pee eishiunye imuoyiaritin enye. Ore lelo ooitanyamalita loiriruani ooiduruk, neishiunye.

¹⁹Netem pooki ng'ae teina siamo aiseyie ninye amu, kepuku engolon tiatua ninye neishiunye pooki.

²⁰Neraposhu Yesu nkonyek aing'or lkipaareta lenyena nejo, “Imayianana intae ilaisinak amu eninyi enkitoria e Nkai.

²¹“Imayianana ilooata taata esumash; amu keitaraposhi intae. “Imayianana ilooishir taata amu iyiookiki aakueni.

²²“Imayianana te neibayu intae iltung'ana, nekepaa intae nemor, nemit eipoti nkarn inyi ejo ntorrok, te nkaraki Enkerai e Tung'ani.

²³Ore ina olong entishipata niranyiranya aaipidipid te ng'ida, amu kesipa ai kitok enkishorunoto naishori intae te Keper; amu ina apa eitaasa iloo papaai linyi iloibonok li apa.

²⁴“Kake ee ekake ayia intae ilkarsisi taata; indipa intae aanoto olkar linyi.

²⁵“Ee kake ayia intae ilooraposho taata; keyooki atir intae esumash. “Woi ake intae ilookueni taata; iyiookiki ake aaishir.

²⁶“Ee kake ayia te neimaki intae ltung'ana aaisis; nejia taa apake eikuna iloo papaai linyi aaisis iloibonok le lejare.

²⁷“Kake ajoki intae kulo laaning'ito,

²⁸entonyor ilmang'ati linyi; entaasa isupati ilooiba intae; entamayian ilo odek intae; ore iloosukeny intae neinyial, entoomonoki.

²⁹Ore pee kiosh oltung'ani eseder nyaaki inchoo sii enkae; ore pee eya oltung'ani olkila lino; inchoo sii enchati meewa.

³⁰Inchoo pooki likiomon; ore pee eya oltung'ani enino, mimpotu aoru.

³¹Intaasa ilkulikae tung'ana anaa eniyieu nikintaas ninche iyie.

³²“Amaa te naa iloonyor intae ake inyorrinyorro, kaji eret ina te intae? Kenyor sii ninche larruok iloonyor ninche.

³³Amaa sii te naa lelo ake ooitaas intae isupati intaasiasa sii intae, kaji eret ina te intae? Nejia eiko sii ninche ilarruok.

³⁴Naa amaa te naa pooki ake olisilen naa elde ake liyiolo ajo kilaaki, ainyoo eret ina te iyie? Keisilenokino sii ninche ilarruok eyiolo aajo kelaakini aaiputaki.

³⁵Kake ore intae, entonyor ilmang'ati linyi niaasiasa isupati; enchooi te sile misiligugu toki naitu; naa itumutumu enkishorunoto kitok; niaakuku nkera o lotii Shumata Aisul te pooki, amu ore ninye keing'urrie ilarruok o lemeeta enashe.

³⁶Enoto olng'ur anaa Papa linyi oata olng'ur.

³⁷“Minguanare pee mikinguanareki; minor pee mikinorri, entapalaki pee epalakini intae.

³⁸Enchooi pee eishori intae; aaisho emborei sidai narujakino, neiposhakino, o metadooi nepiki ilbenia too lgooitie linyi; amu ore ake ina nitemakinyenye lkulikae naa ninye ake etemakinyeki sii ninche intae.”

³⁹Neitoki Yesu aisho ninche enkitanyaanyukoto, nejo, “Keidim olmodooni atoriko likae modooni? Aimesulakino pokira aare engumoto?

⁴⁰Megiroo oloiteng'eni oloiteng'en; kake ore eidipaki aaiteng'ena netiu anaa oloiteng'ena ninye.

⁴¹Kainyoo pee idol entubuloi natii enkong'u o lalashe lino, nimidol olchata otii enkong'u ino makewan?

⁴²Kaji nko pee ijoki olalashe lino, ‘Olalashe lai, ntasho maaitayu entubuloi nikitii enkong'u ino makewan,’ eji nimidol olchata likitii enkong'u ino makewan? Lo sunkuroi, tang'asa intayu ilo shata likitii enkong'u ino pee itum taa atodolisho, nintayu entubuloi natii enkong'u o lalashe lino.

⁴³“Meetae olchani sidai oiu ilng'anayio torrok, aashu olchani torrono oiu ilng'anayio sidain;

⁴⁴amu eyiolouni ake olchani too lng'anayio lenyena. Amu metumieki olaimurunyai ilng'abolo, nemetumieki isabibu intulele.

⁴⁵Keitayu oltung'ani supat isupati naaitung'uaa olchumati supat otii oltau lenye, neitayu oltung'ani torrono ntorrok naaitung'uaa olchumati torrono otii oltau lenye, amu inaabore oltau lo ltung'ani eiro oltung'ani te nkutuk enye.

⁴⁶“Kainyoo pee kijojo, ‘Olaitoriani, Olaitoriani,’ nimiaasiasa enajoki intae?

⁴⁷Kaliki intae enetiu ololotu enatii nening enajoki, neas nena natejo.

⁴⁸Etiu ninye anaa oltung'ani oshet enkaji, neng'as atur enkop aitugut, neunoki osoit olkitamanyunoto. Ore pee enang'unye enkare nenang'akino ina aji, kake nelaikino aigusugusie amu enotokoki olkitamanyunoto.

⁴⁹Kake ore ilo oning nemeas ae, etiu anaa oltung'ani otesheta enkaji eitu eng'as apik olkitamanyunoto. Ore pee enang'unye enkare neipony te ngolon enaduoo aji, neurori nabo kata, neme euroroto sii iyie ina natuurori enaduoo aji.”