Read MAASAI REVISED PROTESTANT Luka 8 Bible Online

Luka 8 - MAASAI REVISED PROTESTANT bible

Luka 8

¹Neaku ore pee eidipayu nena, nemanaa Yesu too nkanas sapuki o nkutiti elikioo ilo rorei neyaki lomon supati le nkitoria e Nkai. Neiriamariyie ninye lkipaareta lenyena tomon o aare,

²o nkituaak naaishiunyeki nkiyang'eta torrok o nkeyaitin: Mariamu Magdalena, nataarayioki loiriruani oopishana metung'uai,

³o enkitok e Kusa osinka le Herode naji Yoana o Susana o kulie kumok naaitoomono ninche Yesu o lkipaareta too masaa enye.

⁴Ore pee etumo ltung'ana kumok aaiturrurro, nesotokino lelo le nena ang'itie pooki, neiro Yesu alimu ena kitanyaanyukoto.

⁵“Etupukuo olaunoni alo aun ilanterera lenyena; ore eunisho, nedoiki kulikae embata e nkoitoi, neitunyori too nkejek, nenya motonyi e shumata.

⁶Nedoiki kulikae enkop o soit, nejo matubulu, netoyu amu meeta enkare naok.

⁷Nedoiki kulikae atua lkiku, neiriamunore lkiku, negor ninche.

⁸Nedoiki kulikae enkop sidai, nebulu, neiu ilng'anayio iip nabore.” Ore ejoito Yesu nejia nebuak ajo, “Oloata nkiyiaa, toning'o!”

⁹Neikilikuan lkipaareta lenyena ninye enalimu ena kitanyaanyukoto.

¹⁰Newaliki Yesu ajoki, “Eishooki intae entayiolo nkisudorot e nkitoria e Nkai; kake keishori ilkulikae too nkitanyaanyukot pee eing'or nemedol, nening ninche nemejing'aa”.

¹¹“Naa inji eikununo ina kitanyaanyukoto. Ore ilanterera naa ninche ororei le Nkai.

¹²Ore lelo ootadoikitio embata e nkoitoi naa lelo ooning ororei; nelotu Sheitani aitayu too ltauja lenye arishie pee meiruk neitajeuni.

¹³Ore ilanterera ootadoikitio enkop o soit naa lelo ooning ororei neng'amu te ng'ida. Kake eitu ejing'aa atua ninche; neiruk te nkiti kata ake, ore pee epuonu ntemat nebatata aaitiak.

¹⁴Ore lelo ootadoikitio atua lkiku naa lelo ooning, kake nepuo neitirrishaki enyamali oo masaa o esikar ena kishon nemeitabaya aaiu ilng'anayio.

¹⁵Ore ilanterera ootadoikitio enkulupuoni sidai naa lelo ooning ele rorei, neibung aakuraki too ltauja lenye neiu ilng'anayio.

¹⁶“Meetae oltung'ani oinok oltaa neitoki aitoip to ltoo anaa epik orunku[3] le rruat, kake kepik enerupa neitasheyie pee edol iloojing ewang'an.

¹⁷Amu meetae entoki naisudoro, nemeibalunyeki; nemeetae enoo nkurrat nemeibalunyeki te wang'an.

¹⁸Enteng'enuoto too mbaa nining'ining'i amu ore oloata, naa keishori, ore olemeeta neoruni ina najo ninye keeta.”

¹⁹Nelotu ng'otonye Yesu o lalashera lenyena nelaikino aatabaiki ninye te nkiding'a o lorere.

²⁰Neyakini olkilikuai aajoki, “Etii ng'utunyi o lalashera linono boo, eitashe, kiyieu nikitumore.”

²¹Newaliki Yesu ajoki, “Ore yieyio o lalashera laainei naa, lelo ooning ororei le Nkai neibung.”

²²Ore nabo olong; nejing Yesu empeut o lkipaareta lenyena; nejoki ninche, “Ematalang aapuo lido kekun le naiposha,” nedumunye aapuo.

²³Ore epuoito neirura Yesu. Nedumunye olkutati te naiposha, neaku keiput empeut enkare, nejing bata.

²⁴Nepuo loiteng'eni aainyeyie ninye ajoki, “Lo Kitok! Lo Kitok! Kindaaitie!” Neinyototo neisikong osiwuo o enkilugo e nkare; negira, nelotu enkitirring'a.

²⁵Nejoki ninche, “Koree enkirukoto inyi?” Neureishoyu lkipaareta lenyena, neing'asia, nejokino maate, “Kaing'ae taa ele laa keitore osiwuo o enkare, nening?”

²⁶Nebaya ninche lido kekun loo Lgeraseni, oipirare Galilaya.

²⁷Ore pee edoiki Yesu enkop natoyio nenang'are oltung'ani obo leina anasa oata iloiriruani; oshomo nkolong'i kumok meishopo, nemejing ang, too nkuraren eton.

²⁸Ore pee edol Yesu, nebuak, nebatata te dukuya ninye, nejo to ltoilo sapuk, “Kainyoo aatayie nanu iyie Yesu, Enkerai e Nkai Natii Shumata Aisul te pooki? Aatasayia mikisilisil.”

²⁹Amu ketaarayie Yesu ilo oirirua torrono otii ilo tung'ani metupuku. (Amu eibung'a nkolong'i kumok, neteenaki aarrip, nerridi too sekenke naairoishi o too lpisia; ore pee eitirrie pooki nearaa oloirirua ninye ong'ata.)

³⁰Neikilikuan Yesu ajoki, “Aikiji ng'ae?” Nejo, “Kaaji, Empuoto;” amu iloiriruani kumok ootijing'a.

³¹Nesai iloiriruani Yesu pee mearaa ninche meshomo olodo le nkop.

³²Netii ine emboo oo lbitiro, nadaa to losho; nesai meishoo pee epuo aajing lelo bitiro. Neisho meshomo.

³³Nepuku lelo oiriruani te ilo tung'ani, nejing ilbitiro; nekuet ina luaata oo lbitiro to loshong'ishong'i neimis te naiposha neya enkare.

³⁴Ore pee edol lchekuti le lelo bitiro inaatotiwuo, neisik aapuo aalikioo teina anasa o teina kop.

³⁵Nepuku iltung'ana aapuo aadol enatotiwuo. Nepuonu enetii Yesu, neinepu ilo tung'ani otaarayioki loiriruani etonita, neishopo, nenyakua oltau lenye biyoto, etonita too nkejek e Yesu; neureishoyu ninche.

³⁶Nelikioo lelo apa ootoduakita ilo tung'ani earari loiriruani metaa biyoto, enaikuna pee eishiunyeki.

³⁷Ore lelo tung'ana pooki le nkop oo Lgeraseni o neemanita, nesai Yesu metung'uai ninche amu etureishote oleng. Nejing ninye empeut ashuko.

³⁸Nesai oladuoo oishiunyeki Yesu meturubare, kake eitanapa Yesu ajoki,

³⁹“Tushukoyu enkang inyi, imbalakinye enaba ina nikintaasa Enkai.” Nelo aing'uaa, einosaa teina anasa pooki nena e nking'asia naaitaasa Yesu ninye.

⁴⁰Ore pee eitu Yesu, neitoomon olorere te nchipai amu keanyita apa ake pooki.

⁴¹Nelotu oltung'ani oji Yairo naa olkitok le nkaji e ntumo; nebatata too nkejek e Yesu nesai meshomo enkaji enye,

⁴²amu entito nabo ake eeta, oo larin tomon o aare, neirrag etaa keye. Kake ore ejo Yesu alo neiding'akino olorere.

⁴³Netii enkitok naturuke osarge larin tomon o aare; netumuta masaa enyena kumok too labaak, neitu eishiunye hoo obo.

⁴⁴Neimu te siadi Yesu, neiseyie olcholoi lo lkila lenye negem nabo kata osarge.

⁴⁵Nejo Yesu, “Ae ng'ae naatoshoroyie?” Neitolilo olorere, nejoki Petero, “Lo Kitok, kironyita olorere likinturrurrokinote!”

⁴⁶Kake etiaaka Yesu, “Etii oltung'ani laatoshoroyie, amu atayiolo ajo etii engolon natupukuo te nanu.”

⁴⁷Neisho ina kitok, pee edol ajo meekure eidim aisudori, nekuetu eikirikira, nebatata te dukuya Yesu, neibalakinye mbaa pooki te dukuya olorere, ajo ainyoo pee etaasa ina, o eneikuna pee eishiwuo.

⁴⁸Nejoki Yesu ina kitok, “Naito, kinchiunye enkirukoto ino. Shomo te seriani.”

⁴⁹Ore ejo nejia, nelotu oltung'ani oing'uaa enkaji e ilo kitok le nkaji e ntumo, nejoki, “Etua entito ino; mintoki aintanyamal olaiteng'enani.”

⁵⁰Ore pee ening Yesu ina, newaliki Yairo ajoki, “Miureishoyu: iruko ake iyie, naa keitaae biyoto.”

⁵¹Ore pee ebaya ina aji, neitu eisho Yesu likae tung'ani ejing'u, Petero ake o Yohana o Yakobo, o menye o ng'otonye ina kerai.

⁵²Ore aa kitok olkiyioi loo ltung'ana, nejoki Yesu ninche, “Eminchir amu eitu eye, keirura.”

⁵³Nekueniyieki oleng, amu keyiolo aajo eidipa atua.

⁵⁴Kake ore ninye, neibung, neipot ajoki, “Nakerai, inyo!”

⁵⁵Neshukokino ninye enkiyang'et enye, neinyototo nabo kata, neitanapisho meishori endaa.

⁵⁶Neing'asia ntoiwuo e ina kerai kake eitanapa Yesu pee meliki hoo oltung'ani enataase.