Read MAASAI REVISED PROTESTANT Luka 9 Bible Online

Luka 9 - MAASAI REVISED PROTESTANT bible

Luka 9

¹Neipot Yesu lkipaareta lenyena tomon o aare, neisho engolon o enkidimata naitoreyie iloiriruani pooki, neishiunye imuoyiaritin.

²Neirriwaa metolikioi enkitoria e Nkai, neishiunye iloomuoyiaa.

³Nejoki ninche, “Emiya hoo toki te lototo inyi, aa eng'udi, aashu embene, aashu endaa, aashu impisai, nimiyaya nkilani maa are.

⁴Ore enkaji pooki nijing'ijing'i, entotoni teine o entupuku teina ang.

⁵Ore ilemeitoomon intae, entung'uai ina ang nimpiripiroo enterit natii nkejek inyi metaa shakeni te ninche.”

⁶Nepuo aamanaa te nena ang'itie, pooki elikioo lomon supati, neishiunye iltamuoyia too wuejitin pooki.

⁷Ore Herode laa ninye oitore Galilaya, pee ening nena pooki naasitae; neiputukuny amu etejo kulikae tung'ana, “Yohana otopiwuo too lootuata.”

⁸Nejo kulikae, “Eliya oipang'ua.” Nejo kulikae, “Obo loo loibonok li apa otopiwuo.”

⁹Nejo Herode, “Atudung'oyie taa ninye Yohana elukunya, ae ng'ae naa ele laning mbaa enyena?” Neing'oru eyieu nedol ninye.

¹⁰Ore pee eshukunye ilkipaareta, neinosaki Yesu mbaa pooki naataasa. Nerik nepuo enkilepata, o metoriko enkanasa naji Betsaida.

¹¹Ore pee eyiolou olorora, nesujaa. Neitoomon neirorie aliki ninche mbaa e nkitoria e Nkai, neishiunye ilooyieu neishiunyeki.

¹²Ore pee eaku kedoiyo enkolong, nepuonu lkipaareta lenyena enetii nejoki, “Intanapa olorere meshomo kuna kurman o nkang'itie naataana aairrag neing'oru endaa amu ong'ata ene nikitii.”

¹³Nejoki Yesu ninche, “Enchoo doi intae endaa.” Nejoki ninche, “Mikiaata ae toki neme mukateni miet o sinkir aare, aashu te naa aikipuo aainyang'aki ele orere pooki endaa.”

¹⁴Amu kebaya lewa ootii, nkalifuni miet. Nejoki Yesu lkipaareta lenyena, “Entotona olorere too intukusi maa onom.”

¹⁵Neas ina, neitoton iltung'ana pooki.

¹⁶Nedumu Yesu imukateni pokira miet, o sinkir are, neing'or shumata nemayian nebel, neisho lkipaareta lenyena meishoo olorere.

¹⁷Nenya, neraposho pooki. Nesotuni lmong'oishi, neiput inkikapuni tomon o aare.

¹⁸Ore eomonito Yesu openy, netii lkipaareta lenyena, neikilikuan ajoki, “Kejo olorere kara nanu ng'ae?”

¹⁹Newaliki aajoki, “Ejo Yohana Olaibatisani, nejo kulikae, Eliya; nejo kulikae ira obo loo loibonok li apa otopiwuo.”

²⁰Nejoki, “Nijojo intae kara ng'ae?” Nejoki Petero, “Iyie Kristo le Nkai.”

²¹Neitanap Yesu lkipaareta lenyena neitanap pee meliki hoo oltung'ani ilo rorei.

²²Nejoki, “Meeta nchere pee meinyali Enkerai e Tung'ani too mbaa kumok, neany ilpayiani o lapolosak kituaak o lasirak neari metua, neitopiuni te nkolong e uni.”

²³Nejoki ninche pooki, “Te neyieu oltung'ani naasuj nanu, inchoo emenaa kewan, nenap osalaba lenye inkolong'i pooki, naasuj.

²⁴Amu ore oloyieu neitajeu enkishui enye, neiminie; kake ore pooki oiturraa enkishui enye te nkaraki nanu neitajeu.

²⁵Amu ainyoo dupoto o ltung'ani tenetum enkop pooki neiturraa enkishui enye.

²⁶Amu ore olodol enkurruna te nanu o too rorei laainei, neduaaki sii ninye Enkerai e Tung'ani ninye enkurruna te nelotu te nkitoo enye o ene menye o enoo lmalaika sinyat.

²⁷Kake ajoki intae too sipat nchere etii kulo ooitashe te ne lemeishamisham keeya katukul, eitu eng'as aadol enkitoria e Nkai.”

²⁸Ore too nkolong'i naabaya isiet eidipate nena baa nerik Yesu Petero o Yohana o Yakobo neked oldoinyo aaomon.

²⁹Neaku ore eomonito, neibelekenya emua e nkomom e Yesu, o nkilani enyena, neiborru neimerlelu.

³⁰Neirorie ninye Musa o Eliya

³¹etalioote te nkitoo e keper, neirorie Yesu eimaki eneyooki aiko teneitabaya eyieunoto e Nkai aye te Yerusalem.

³²Ore Petero o looboitare neiliara too njio, kake edolisho ake nedol enkitoo e Yesu, o lelo tung'ana pokira aare ooitashe te nebo ninye.

³³Ore epuo lelo tung'ana aaing'uaa Yesu, nejoki Petero Yesu, “Lo Kitok, eisidai kitii ene, maitobira lng'oborri okuni, obo lino, o obo le Musa o le Eliya.” Nemeyiolo enajoito.

³⁴Ore ejoito nejia nedou enkatampoi neitoip ninche apik oloip; neureishoyu pee ejing atua ina atampoi.

³⁵Nepuku oltoilo te nkatampoi nejo, “Ena Enkerai ai Gelunoti, entoning ninye.”

³⁶Ore pee egira ilo toilo, nedoli Yesu aa ninye ake. Negira ninche, eitu eliki ltung'ana te nena olong'i inaatoduaa.

³⁷Ore pee ekenyu pee edou ninche to ldoinyo, netumore olorora kitok Yesu.

³⁸Nebuaku oltung'ani obo tiatua ilo orora ajo, “Olaiteng'enani, aatasayia ng'urai enkerai ai amu ninye ake aata;

³⁹naa kenang'aa oloirirua, nebuak, neiterreyie o meitayu labur nemeing'uaa asioki, near oleng.

⁴⁰Natasayia lkipaareta linono meitayu netalaikinote.”

⁴¹Newaliki Yesu ajoki, “Oi ena ishoi nemeeta enkirukoto, kaboitare intae naitaas intae o anu? Iyau enkerai ino ene.”

⁴²Ore egira ayau, nenang'aa oloirirua neiterreyie. Nebuaaki Yesu ilo oirirua torrono, neishiunye ina kerai, neshukoki menye.

⁴³Neing'asia lelo pooki ootoduaa engolon magilani e Nkai. Ore eton eing'asia pooki too mbaa naataasa Yesu, nejoki ninye lkipaareta lenyena,

⁴⁴“Emincho ake erikino intae kuna taata naliki intae! Keishoori Enkerai e Tung'ani aaitarasaki inkaik oo ltung'ana.”

⁴⁵Kake eitu ejing'aa lkipaareta ina natiaaka; eton eisudoro te ninche, metaa mening'u tipat enye, nemeitieu sii aaikilikuana.

⁴⁶Neiteru enchankar tiatua ninche maate ejo kalo lenye olkitok te pooki.

⁴⁷Neyiolou Yesu ina naibirribirrita ninche, nedumu enkerai neitataaniki kewan aitasheyie.

⁴⁸Nejoki ninche, “Ore pooki ng'ae ong'amu ena kerai te nkarna ai, nanu etang'amua, ore oloisul te nkitisho tiatua intae, naa ninye oisul te nkitoo.”

⁴⁹Neng'amaa Yohana Yesu ajoki, “Lo Kitok, kitoduaa oltung'ani earaa loiriruani te nkarna ino nikimitiki, amu mme ole ncholiek ang.”

⁵⁰Nejoki Yesu ninye, “Emimitiki, amu ore olemekesh intae, naa ole nkalo inyi.”

⁵¹Netaanu nkolong'i pee eilep Yesu alo keper, nemut nabo ajo kelo Yerusalem.

⁵²Neirriwaa ilkipaareta meituruko dukuya ninye aajing enkang oo Samaria, pee eitobiraki enejing.

⁵³Kake eitu eitoomon ilopeny te nkaraki neipirita Yerusalem.

⁵⁴Ore pee edol lkipaareta lenyena, Yakobo o Yohana nena, nejo, “Olaitoriani, iyieu nikimpotu enkima te keper metapejoi?”

⁵⁵Neibelekenyakino Yesu aing'ode nejoki, “Mayiolo aajo kaa pukunoto oo ltauja iatata,

⁵⁶amu eitu doi elotu Enkerai e Tung'ani amut iltauja loo ltung'ana, kake pee eitajeu.” Nepuo ae ang.

⁵⁷Ore epuoito te nkoitoi, nejoki oltung'ani obo Yesu, “Ekaasuj nanu iyie pooki wueji nilo.”

⁵⁸Nejoki Yesu, “Eeta mbariak ngumot enye, neeta motonyi nkajijik enye. Kake meeta Enkerai e Tung'ani eneirishaki elukunya enye.”

⁵⁹Nejoki likae, “Tusujuaki nanu.” Kake etiaaka, “Lo Kitok, nchooki ang'as alo anukaa papa.”

⁶⁰Nejoki Yesu, “Inchoo lmeneng'a, metunukai ilmeneng'a kake shomo iyie tolikioi ilomon le nkitoria e Nkai.”

⁶¹Nejoki sii likae, “Olaitoriani, kaasuj kake, nchooki ang'as alo aitanapare iltung'ana to lmarei lang.”

⁶²Nejoki Yesu, “Ore oltung'ani otonyorra enturore neitoki anang silig, nemeishiaakino enkitoria e Nkai.”