Read MAASAI REVISED PROTESTANT Enkigilata oo Nkitanapat 1 Bible Online

Enkigilata oo Nkitanapat 1 - MAASAI REVISED PROTESTANT bible

Enkigilata oo Nkitanapat 1

¹Kulo ninche irorei apa ooirorie Musa iltung'ana loo Siraeli pooki te lido kekun lo lkeju le Yordan ti ong'ata, te Araba te nkipirakinoto e Sufu, te rishata e Paran o Tofel o Laban o Heserot o Disahab.

²Inkolong'i tomon oobo elototo ebaiki Horeb te nkoitoi o ldoinyo le Seir o metabaiki Kadesh-Barnea.

³Ore to lari le artam, te nkolong e dukuya olapa le tomon oobo, neirorie Musa iltung'ana loo Siraeli te risioroto e nena pooki naaishoo ninye Olaitoriani aitanap ninche.

⁴Ina kata eidipa ninye atimira Sihon olaiguanani loo Lamori apa omanya Heshbon o Oog olaiguanani le Bashan apa omanya Ashtarot o Edrei.

⁵Ore te lido kekun lo lkeju le Yordan, te nkop e Moab, neinosu Musa ena kitanapata, ajo,

⁶“Etiaaka apa iyiook Olaitoriani Enkai ang te Horeb, ‘Itobiko intae oleng tele doinyo;

⁷embelekenyunye enteru elototo inyi, nipuopuo ina kop oo ldoinyo e Amori, ole latia enye pooki te Araba, teinakop oo ldoinyo o te nkop nashong'ishong o Negeb o lomanaa le naiposha, ina kop oo Lkanaan o Lebanon o metabaiki ilo keju kitok, ilo keju le Frati.

⁸Ng'ura ajo airragie nanu enkop te dukuya intae. Enchom intae ewaita ina kop apa nainosie Olaitoriani olmumai too loo papaai linyi te Abraham, te Isaak o te Yakobo, pee eisho ninche o eishoi enye te siadi ninche.’”

⁹“Ore apa teina kata atiaaka intae, ‘Maidim nanu openy atanapa intae,

¹⁰etoponayie intae Olaitoriani Enkai inyi nitabaita intae ena olong anaa ilakir le shumata te nkumoi.

¹¹Meitaa intae Olaitoriani Enkai oo loo papaai linyi katitin enkalifu te nkumoi alang enibaba. Nemayian intae, anaa enaisiligie intae!

¹²Kaji nanu aiko openy te nanap enkiroishi o lola linyi, o loo larrabali linyi?’

¹³Entegelu iltung'ana ng'eni, oodamisho neeta eyiolounoto, te risioroto oo loshon linyi, pee agelu nanu ninche metaa ilaitasheikinok linyi.

¹⁴Nikitawalikitia intae, aajo, ‘Ore ina bae nitejo naa eisidai te nikiaas iyiook.’

¹⁵Neaku aawa apa nanu lelo arikok loo loshon linyi, lelo tung'ana ng'eni arriyiak, naitaa ninche ilarikok linyi, ilaitasheikinok loo nkalifuni o ilaitasheikinok loo maa iip o ilaitasheikinok loo maa-onom o laitasheikinok loo maa tomon naitaa ilkituaak tiatua iloshon linyi pooki.

¹⁶Naitanap apa nanu ilarishak linyi teina kata, ajoki ‘Entoning inkiguanat oo lalashera linyi entirish ninche, nidung'udung'u enkiguana te sipata te rishata o ltung'ani o lalashe lenye, aashu ilo loo nkuapi otii te nebo ntae.

¹⁷Nimiatata olkep te ndung'okinoto e nkiguana; entoning oltung'ani oti o lkitok, te nkitorisiokinoto; miureyu enkomom o ltung'ani amu ore endung'okinoto e nkiguana naa ene Nkai, ore ilo rorei ogol te ntae niyauu enatii nanu, naa kaning nanu,’

¹⁸naitanapa apa nanu intae teina kata nena tokitin pooki naaishiakino niasiasa.

¹⁹“Kitudumunye apa iyiook te Horeb, nikipuo aaim ina ong'ata sapuk nagol nitoduaa, kiimita ina oitoi eina kop oo ldoinyo nalo Amori, anaa enaitanapa iyiook Olaitoriani Enkai ang; nikipuonu Kadesh-Barnea.

²⁰Naitoki nanu ajoki intae, ‘Itabautua intae enkop oo ldoinyo e Amori, apa naishoo iyiook Olaitoriani Enkai ang.

²¹Ng'ura ajo eirragie Olaitoriani Enkai inyi ena kop te dukuya intae; elepa enchom, ewaita anaa apa enatiaka intae Olaitoriani Enkai oo loo papaai linyi; miureishoyuyu niming'aing'aiyiayia.’

²²Nikipuonunu intae pooki aanyikaki nanu, nijojo, ‘Emairriwai iltung'ana meituruko te iyiook aajur enkop, neyaki iyiook olomoni le nkoitoi nikiim o nena anas nikipuo.’

²³Etalie apa ina bae aa sidai te nanu, nagelu nanu iltung'ana tomon oaare te intae, oltung'ani obo ake to losho;

²⁴neibelekenya ninche neilep aapuo ina kop oo ndoinyo, nebau oerata le Eshkol neikitalan.

²⁵Neyau ninche too nkaik enye embata oo lng'anayio leina kop neitadou aayaki iyiook, neitoki aayaki iyiook olkilikuai, nejo, ‘Enkop sidai ina naishoo iyiook Olaitoriani Enkai ang.’

²⁶“Ore ake eyia eitu intae ipuopuo, kake itogolong'akita enkitanapata o Laitoriani Enkai inyi;

²⁷Ning'unyung'unyunyu tiatua ilng'oborri linyi, nijojo ‘Te nkaraki naiba iyiook Olaitoriani pee eitupukuo iyiook te nkop e Misiri, pee elotu apik iyiook atua nkaik oo Lamori, pee eidaikie iyiook.

²⁸Kainyoo iyiook kiilep aapuo aaing'oru? Eitalepoitie ilalashera lang iltauja lang, aajo: Eisapuki lelo tung'ana naa adoru aalang iyiook; eikituaak nena anas naashetuno aabaiki shumata; ore sii kitoduaa ilayiok le Anakim teine.’

²⁹Naitoki nanu ajoki intae, eming'aeng'ai aashu iureyuyu ninche.

³⁰Ore Olaitoriani Enkai inyi oshi laa ninye orikoo intae, ninye makewan olo aarisho amitu intae, anaa apa enaitaasa ninye intae te Misiri te dukuya inkonyek inyi,

³¹o tiong'ata teine apa nitodolie Olaitoriani Enkai inyi enap intae, anaa enanap oltung'ani enkerai enye teina oitoi apa pooki niima o metaba anaa nipuonunu ene wueji.

³²Ore ake etii ele rorei, eitu intae irukuruku Olaitoriani Enkai inyi,

³³laa ninye apa oshomo dukuya intae te nkoitoi pee eing'uraki intae ewueji niunienie ilng'oborri linyi, nerikoo intae te nkima kewarie, pee eitodol intae enkoitoi niimiimi, nerikoo intae te nkatampoi te ndama.

³⁴“Nening Olaitoriani lelo rorei linyi, negoro, nenya ninye olmumai nejo,

³⁵‘Medol ninye oltung'ani obo le ilo porror torrono, ina kop apa nainosie olmumai nchere kaisho loo papaai linyi,

³⁶meteleku ake Kaleb olayioni le Yefune; kelo ninye adol o nkera enyena alo nanu aisho ina kop metororua ninye too nkejek enyena, te nkaraki nairukurukore ninye tukul Olaitoriani!’

³⁷Aatagorokine sii nanu Olaitoriani te nkaraki intae, nejo, ‘Milo sii iyie ajing atua ine,

³⁸Yoshua olayioni le Nuni, ilo oitashe te dukuya iyie, ninye olo ajing; ntagolo ninye oshoke, amu ninye olo aidimie Isiraeli metujung'o ina kop.

³⁹Ore nena kera inyi nitejo intae keidaikieki o nkera inono, nena nemeyiolo taata ninche esidai o entorrono, kepuo ninche atua ine, naa kaisho nanu ninche ina kop, naa keya ninche aaitaa enenye.

⁴⁰Kake ore iyie, mbelekenyayu shomo ong'ata mpira enkalo Enaiposha Nanyokie.’

⁴¹“Nikintokiki intae aawalaki nanu nijojo, ‘Kitaasa eng'oki to Laitoriani, eikilep iyiook aapuo olarrabal, anaa enaitanapa iyiook Olaitoriani Enkai ang.’ Nerretena ake pooki tung'ani too masaa enyena o larrabal, ejo tenaa kelelek eilepakini ina kop oo ndoinyo.

⁴²Naajoki nanu Olaitoriani, ‘Tiaaki Isiraeli, emiilep aapuo olarrabal amu matii nanu atua intae, pee memiri ake intae te dukuya ilmang'ati linyi.’

⁴³Neaku airorie nanu intae nianyianya intae ining'ining'i; kake itogolong'akita enkitanapata o Laitoriani, ore to lwuasa linyi nilepilepe aapuo ina kop oo ldoinyo.

⁴⁴Ore lelo tung'ana le Amori oomanya ina kop oo ldoinyo nepuonu aarare intae, nemir intae anaa enamirisho ilotorok, near intae aairragie te Seir, o metabaiki Horma.

⁴⁵Nirrinyunyenye intae aapuonu aaishir te dukuya Olaitoriani; kake eitu ening Olaitoriani oltoilo linyi neitu eisho intae enkiok.

⁴⁶Neaku itobiko intae te Kadesh inkolong'i kumok, te nena olong'i apa nitobiko intae teine.