Read MAASAI REVISED PROTESTANT Enkigilata oo Nkitanapat 10 Bible Online

Enkigilata oo Nkitanapat 10 - MAASAI REVISED PROTESTANT bible

Enkigilata oo Nkitanapat 10

¹“Ore apa teina kata naajoki nanu Olaitoriani, ‘Tagueta indapidapo are o soit naatiu anaa inapa e dukuya, nilepu alotu enatii to ldoinyo, nintobir osanduku loo nkeek.

²Naa kaiger nanu te lelo soito dapashi irorei ootii lelo soito le dukuya nitebela, nipik iyie ninche atua osanduku.’

³Neaku aitobira apa nanu osanduku too nkeek, naguetu indapidapo are o soit naatiu anaa ine dukuya, nailep alo oldoinyo aata nena soito pokira te nkaina ai.

⁴Neiger Olaitoriani te lelo soito, anaa apa ine dukuya, nena kitanapat tomon apa naairorie intae Olaitoriani to ldoinyo eimunye empolos enkima teina olong apa eumata; naaisho nanu Olaitoriani lele soito.

⁵Naibelekenya nanu nadou to ldoinyo, napik lelo sooito atua ilo sanduku laitobira; naa ine taata etii, anaa enaaitanapa nanu Olaitoriani.”

⁶Nepuo iltung'ana loo Siraeli te Beerot Beneyaakan ometabaiki Mosera. Neye Aron teine naa teine etunukayioki; Neisiaisho olayioni lenye Eliesa anaa olapolosani te rishata enye.

⁷Nedumunye teine nepuo Gadugoda, nedumunye te Gadugoda nepuo Yotbata, enkop oo nchorroi oo nkariak.

⁸Ore apa teina kata neiteng'el Olaitoriani olosho le Lawi pee enap ilo sanduku lo lning'o lo sotua le Nkai, neitashe te dukuya Olaitoriani aaisiaai ninye nemayianisho te nkarna enye o taata.

⁹Metaa meeta Ilawi erubata e njung'ore tiatua ilalashera lenye; Olaitoriani ninye enjung'ore enye, anaa enatiaka Olaitoriani Enkai inyi ninche.

¹⁰“Naton nanu to ldoinyo anaa apa te nkata e dukuya, nkolong'i artam o nkewarieitin artam, naatoning'o sii apa Olaitoriani ina kata; neany Olaitoriani eidaikie intae.

¹¹Naajoki nanu Olaitoriani, ‘Tudumunye, shomo te lototo ino tijing'a dukuya iltung'ana, pee etum ninche aashom aaibung'a ina kop, apa nainosie olmumai too loo menye pee aisho ninche.’

¹²“Amaa taata Israel, kainyoo eyieu Olaitoriani Enkai ino te iyie, neme teniureyu Olaitoriani Enkai ino, nilo too nkoitoi enyena pooki, ninyorru ninye, nisiaai Olaitoriani Enkai ino to ltau lino pooki o te nkishui ino pooki.

¹³Nimbung nena kitanapat o nkiguanat o Laitoriani naaitanapa nanu iyie ena olong te nkaraki eseriani ino.

¹⁴Ng'ura ajo eno Laitoriani nalakua aisul o enkop o pooki toki natii atua;

¹⁵kake ore eyia, etonyorra Olaitoriani to ltau lenye loo papaai linyi negelu ninye eishoi enye te siadi ninche, aitulus too loreren pooki, anaa enatiu ena olong.

¹⁶Entumurat naa isuaten oo ltauja linyi, nimintokiki aagolong'u.

¹⁷Amu ore Olaitoriani Enkai ino naa Enkai oo nkaitin naa Olaitoriani loo laitoriak. Ina Ai kitok magilani naitureisho, nemeeta olkep nemeropayu.

¹⁸Keiguanare ninye te sipata olokishi o enkoliai, nenyor ninye ilo omoni, neisho ninye endaa o nkilani.

¹⁹Tonyorra naa ilo ora omoni; amu irarara sii apa intae omon te nkop e Misiri.

²⁰Shomo turia Olaitoriani Enkai ino, shomo isiayia ninye nimbung'are ninye, naa te nkarna enye inyanya olmumai.

²¹Ninye enkisisa inyi, ninye Enkai inyi, ina nataasa kuna baa kituaak naaitureisho naatoduaa inkonyek inyi.

²²Eshomo apa iloo papaai linyi Misiri aa iltung'ana ntomoni naapishana; ore taata neitotiuo intae Olaitoriani Enkai inyi anaa ilakir le shumata te nkumoi.