Read MAASAI REVISED PROTESTANT Enkigilata oo Nkitanapat 11 Bible Online

Enkigilata oo Nkitanapat 11 - MAASAI REVISED PROTESTANT bible

Enkigilata oo Nkitanapat 11

¹“Shomo tonyorra Olaitoriani Enkai ino, nimbung enkitanapata enye o nkikoot enyena o nkiguanat enyena o nkitanapat enyena anaake.

²Naa entadamu ena olong, nchere, mme nkera inyi nanu airorie neitu eyiolou aashu edol. Entadamu nkitamiot o Laitoriani Enkai inyi, enkitoo enye, o enkaina enye magilani o enkaina enye naitoriori.

³Nena kitoduaat enyena o nkiaasin enyena apa naataasa ninye te Misiri, naitaasa Farao olaiguanani le Misiri; o enkop enye pooki,

⁴o ina apa naitaasa ninye enjore e Misiri, nena bartan enye o nena garrin enye oo mbartan; ina naikuna ninye pee eitaya ninche enkare e Naiposha Nanyokie ina kata esujita ninche intae o ina naikuna Olaitoriani pee eidaikie ninche o taata;

⁵o ina naitaasa intae ti ong'ata ometaba anaa nipuonunu ene wueji

⁶o ina naitaasa ninye Datan o Abiram lelo ayiok le Aliab, olayioni le Ruben, ina natabolo enkop enkutuk neijoo ninche tenebo ilmareita lenye o lng'oborri lenye o pooki toki naishu apa nasujita ninche, te mpolos e Israel pooki;

⁷Amu etoduaa inkonyek inyi ina siaai pooki kitok nataasa Olaitoriani.

⁸“Enchom naa embung'a kuna kitanapat pooki naitanapa nanu intae ena olong, pee itumutumu aatagol, nipuopuo aaya ina kop nilang'akiki aapuo aaya.

⁹Nibikoo sii teinakop nainosie Olaitoriani olmumai too loo papaai linyi pee eisho ninche o eishoi enye, ina kop naruko kule o naishi.

¹⁰Amu ore ine nijing'itata aaya nemetiu anaa enkop e Misiri ning'uaa, ina kop nituunie intae ilanterera linyi nipikipiki enkare too nkejek inyi, anaa olchampa loo mpuka;

¹¹kake ore ina kop nilang'itata aapuo aaya naa enkop oo ldoinyo o nong'ot ine neshaiki ninche enchan naing'uaa keper.

¹²Enkop ina nagolie Olaitoriani te nkaraki intae; eing'orita inkonyek o Laitoriani Enkai inyi shumata ninye anaake, ebaiki enkiterunoto o lari o metabaiki enkiting'oto o lari.

¹³“Naa tenimbung'ubung'u intae kuna kitanapat aainei naitanap nanu intae ena olong, aanyorru Olaitoriani Enkai inyi, nisiayiayia ninye too ltauja linyi pooki o te nkishui inyi pooki,

¹⁴naa keishoru ninye enchan te nkop inyi too nkatitin enyena, ina shan o ltumuret naituruku o ina shan oo nkokua, pee itumutumu aaiturrurro tiatua enkurma inyi o sabibu linyi o eilata inyi.

¹⁵Naa keishoru ninye inkujit te nkop inyi te nkaraki inkishu inyi, nidaa intae aaraposho.

¹⁶Entodol ate emileja too ltauja linyi, nimbelekenyanya aaisiaai kulie aitin niserememe ninche.

¹⁷Ore engoro o Laitoriani neyupuyup tialo intae, neiken ninye shumata, ometaa meetae enchan, nemeiu enkop ilng'anayio, nindaayaya nabo kata aaishunye teinakop naisho intae Olaitoriani.

¹⁸“Entushum naa kulo rorei laainei too ltauja linyi, o te nkishui inyi; nieniene ninche metaa olmonekie too nkaik inyi, netiu ninche anaa enkishili too nkomomi inyi.

¹⁹Ninteng'ening'ene ninche inkera inyi, niimakiki ninche itonini too nkajijik inyi o ipuopuo too nkoitoi o irurara o itonini.

²⁰Ningerigere ninche too molinkaishi oo nkutukie oo nkajijik inyi o too nchomito inyi.

²¹Pee etumi aatoponai inkolong'i inyi o nkolong'i oo nkera inyi teinakop apa nainosie Olaitoriani olmumai too loo papaai linyi pee eisho ninche, anaa enatii oloing'ang'e shumata enkop.

²²Amu tenigolie kewan aas ena kitanapata naaitanap nanu iyie taasa, anyorru Olaitoriani Enkai ino, nilo too nkoitoi enyena pooki, nimbung'are ninye,

²³nearaa Olaitoriani kulo oshon pooki ootii dukuya ino, niyaya iloshon kituaak naa magil aalang intae.

²⁴Ore pooki wueji neroro inkejek inyi naa keaku eninyi; ore enkop inyi naa keiteru ebaiki ong'ata o Lebanon o ebaiki olkeju le Frati o metabaiki enaiposha enkalo oloo ntoluo.

²⁵Meetae oltung'ani ooidim ashomo airisha ntae, kelo Olaitoriani Enkai apik enkuretisho o loputukunyi te nkaraki intae shumata ina kop pooki niimiimi, anaa enaisiligie ninye intae.

²⁶“Idolidolo ajo kapik nanu dukuya intae ena olong emayianata o ldeket:

²⁷emayianata tenimbung'ubung'u nena kitanapat o Laitoriani Enkai inyi, naitanapa apa nanu intae ena olong,

²⁸oldeket, tenimibung'ubung'u intae nena kitanapat o Laitoriani Enkai inyi, nimbelekenyanya aaing'uaa ina oitoi naitanapa nanu intae ena olong, nipuopuo aasujaa kulie aitin apa neitu intae iyiolouu.

²⁹Naa teneyau intae Olaitoriani Enkai inyi atua ina kop nijing'itata aapuo aaya, enchom entamayianisho to ldoinyo le Gerisim nidekishosho to ldoinyo le Ebal.

³⁰Aimetii ninche lido kekun le Yordan, enkalo o loo ntoluo enkoitoi dapash e ndoyioroto e nkolong, tiatua enkop oo Lkanaani apa laa ninche emanya Araba, eipirakinore Gilgal embata oo lkeek le More?

³¹Amu ipuopuo intae aalang Yordan, nipuopuo aaya ina kop naisho intae Olaitoriani Enkai inyi; naa tenindipidipi aawaita nimanyimanya,

³²enchom entodol ate entabaraki pee iasiasa nena kikoot pooki o nkiguanat naitanapa nanu intae ena olong.