Read MAASAI REVISED PROTESTANT Enkigilata oo Nkitanapat 12 Bible Online

Enkigilata oo Nkitanapat 12 - MAASAI REVISED PROTESTANT bible

Enkigilata oo Nkitanapat 12

¹“Kuna ninche nkikoot o nkiguanat nilo iyie aing'or teina kop nikichoo iyie Olaitoriani, Enkai oo loo papaai linyi pee iya, too nkolong'i pooki ninchu tioriong enkop.

²Shomo tukul indaikie nena wuejitin pooki apa neeisiayie lelo oshon litimira inkaitin enye, too nchumat oo ldoinyo o too nchumat oo ndoinyo kutiti o tiabori pooki shani onyori.

³Tusulai ilpereren lenye loo lasarri; nintaa irrarrat ing'apeta enye, nipejoo Asherim enye te nkima; nisulaki iyie enkop nena kitanyaanyukot enye naaitaa nkaitin, nindaikiekie enkarna enye aaishie teine wueji.

⁴Milo iyie aiko neijia teniserem Olaitoriani Enkai ino,

⁵kake ilo iyie aing'oru ine wueji negelu Olaitoriani Enkai ino tiatua iloshon linyi pooki pee ipikipiki enkarna enye nintaa ine emanyisho enye; naa ine ipuopuo,

⁶naa nejia enkuna eyau ilasarri linyi oopejori o nkishoorot inyi o ematua e tomon o lasarri ooitarasari o lasarri to lmumai o nkishoorot o lpela o lkikaunot linyi loo nkishu o loo ntare.

⁷Ore teine nipuopuo aadaa te dukuya Olaitoriani Enkai inyi, nipuopuo aang'ida, intae o lmareita linyi, teina pooki nipuopuo aas aa te ninye emayian intae Olaitoriani Enkai inyi.

⁸Miasiasa intae te risioroto e kuna pooki nikiaasita iyiook tene taata, easita ake pooki tung'ani enaba anaa enaishiakino too nkonyek enyena makewan,

⁹amu eton intae eitu ipuonunu ina kiyeng'iyeng'ata o ina jung'ore naisho intae Olaitoriani Enkai inyi.

¹⁰Kake tenilang'ilang'a intae aapuo lido kekun le Yordan, nitonini teinakop naisho intae Olaitoriani Enkai inyi entujung, naa teneisho ninye intae enkiyeng'iyeng te lelo mang'ati linyi pooki oomanita intae, metaa itonini te seriani,

¹¹ore teine wueji nelo agelu Olaitoriani Enkai inyi, pee epik enkarna enye metobiko teine, ine eyau nena pooki naitanap intae; ilasarri linyi oopejori o nkishoorot inyi o ematua inyi e tomon o nena kishoorot nintarasaa, o nena ninosie olmumai pee inchosho Olaitoriani.

¹²Ning'idayuyu intae te dukuya Olaitoriani Enkai inyi o layiok linyi o ntoyie inyi o sinkan lewa o sinkan inyi ng'oruo o lawi ootii atua nkang'itie inyi te nkaraki nemeeta ninye erubata aashu enjung'ore tiatua intae.

¹³Toduaa naa pee mintayu olasar lino opejori te pooki wueji nidol;

¹⁴kake teine negelu Olaitoriani ti obo loo loshon linyi, teine iyie shomo intayu olasarr lino oopejori naa teine shomo taasa kuna pooki, naaitanap iyie.

¹⁵“Ore tenebo nena, indimidimi aateyieng eng'ues ninyanya tiatua inkang'itie inyi, anaa eniyieuu, te risioroto e mayianata o laitoriani Enkai inyi naishoo ninye intae; ore ilo osinya o lemesinya keidim ainosa, anaa naaji enkolii anaa empanas;

¹⁶osarge ake minya; tubukoki ninye enkop anaa enkare.

¹⁷Mindimidimi aainosa tiatua nkang'itie ina rubata O Laitoriani e ntapa inyi aashu enoo sabibu aashu eneilata, aashu iloo ntare, aashu pooki ake ninye asar linchorutua te nkinosata olmumai, aashu lelo asarri linyi le nyorrata, aashu lelo asarri lintarasaa,

¹⁸kake indimidimi intae aainosa te dukuya Olaitoriani Enkai inyi, teine wueji nelo Olaitoriani Enkai ino agelu, ninya iyie o layioni lino o entito ino o sinka lino lee o esinka ino ng'oruoi oilo tung'ani loo Lawi otii atua inkang'itie inyi, nilo iyie ang'ida te dukuya Olaitoriani Enkai ino teina pooki nilo aas.

¹⁹Toduaa naa kewan minturraa ilo tung'ani loo Lawi otii atua te nkata pooki naba anaa enitii atua enkop ino.

²⁰“Teneponaa Olaitoriani Enkai ino enkop ino, anaa enikisiligie ninye, nijo iyie, ‘Kanya nanu nkiri,’ amu itang'uarra nkiri, indim ainosa nkiri naaba anaa iniyieu.

²¹Tenaa kelakua ine wueji nategelua Olaitoriani Enkai ino pee epik enkarna enye nindim naa ateyiang'a enkiteng ino nabo aashu ina ker ino nabo nikinchoo iyie Olaitoriani Enkai ino, anaa enaaitanapa nanu iyie; nindim iyie ainosa tiatua nkang'itie inyi anaa eniyieu.

²²Ore anaa enainosi enkolii o empanas, neaku indim sii iyie ainosa; ore ilo osinya o lemesinya neidim ainosa.

²³Tayiolo ntisipa pee minya osarge, amu ore osarge naa enkishui, niminya iyie enkishui tenebo nkiri.

²⁴Minya iyie osarge, naa tubukoki enkop anaa enkare.

²⁵Minya iyie osarge pee eitobirari mbaa inono pooki o noo nkera inono itulusoyie amu keaku itaasa iyie esidai too nkonyek o Laitoriani.

²⁶Kake ore nena tokitin sinyat naatabaitie te iyie o lasarri linono, shomo iyie iwa, nilo ine wueji negelu Olaitoriani,

²⁷nilo aitayu lelo asarri linono oopejori, nkiri o sarge, te nchumata olperere lo lasar lo Laitoriani Enkai ino; ore ilo sarge loo lasarri linono nepuoi aabukoki enchumata olperere lo lasar lo laitoriani Enkai ino, kake indim ainosa nkiri.

²⁸Toduaa kewan pee imbung kulo rorei pooki laaitanapa nanu pee iserianu iyie o nkera inono itulusoyie ntarasi, te nias iyie ina sidai neishiakino too nkonyek o Laitoriani Enkai ino.

²⁹“Tenelo kenya neiwuang'ie Olaitoriani Enkai inyi te dukuya intae lelo oshon lipuopuo intae aaya enkop enye, niwuang'ieng'ie intae ninche nimanyimanya enkop enye,

³⁰entodol ate mijing'ijing'i ake orreshet aasujaa ninche, eidipaki aaidaikie ninche te dukuya inkonyek inyi, niminkilikuanunu nkaitin enye, ijojo, ‘Kaji apa eiko kulo oshon teneisiai inkaitin enye pee aiko sii nanu neijia?’

³¹Mias iyie ina to Laitoriani Enkai ino; amu ore pooki toki nara olminong naiba Olaitoriani eitaasa apa ninche inkaitin enye; amu kepejoo doi ninye ilayiok o ntoyie enye te nkima aapejoki inkaitin enye.

³²“Ore ina toki ake ninye pooki naaitanapa nanu entisipu pee iasiasa; miponikiki intae toki aashu intong'or toki.