Read MAASAI REVISED PROTESTANT Enkigilata oo Nkitanapat 13 Bible Online

Enkigilata oo Nkitanapat 13 - MAASAI REVISED PROTESTANT bible

Enkigilata oo Nkitanapat 13

¹“Tenedumunye oloiboni tiatua intae, aashu olaidetidetani loo nkidetidetat, neisho intae enkitoduaata aashu embae e nking'asia,

²nelotu ina kitoduaata aashu ina bae e nking'asia natiaka ninye intae aaku, naa tenejo ninye, ‘Maape iyiook aasujaa kulie aitin apa neitu intae iyiolouu, naa maisiaayia iyiook ninche.’

³Emining'ining'i intae lelo rorei leilo oiboni aashu ilo aidetidetani loo nkidetidetat; amu ketem, intae Olaitoriani Enkai inyi, pee eyiolou tenaa inyorrinyorro intae Olaitoriani Enkai inyi to ltauja linyi pooki o te nkishui inyi pooki.

⁴Shomo iyie tudumunye tusujai Olaitoriani Enkai ino niureyu ninye, nimbung inkitanapat enyena nining oltoilo lenye, nisiai ninye nimbung'are ninye.

⁵Kake ore ilo oiboni aashu ilo aidetidetani loo nkidetidetat neari metua, amu eiteng'enishe ninye engolong'akinoto tialo Olaitoriani Enkai ino, ilo laa ninye likiyaua iyie aitupuku tiatua enkop e Misiri, nikikordu ninye iyie aitung'uaa enkop esinkaisho, pee kitum aitung'uai ina oitoi nikintanapa Olaitoriani Enkai ino pee iim. Neaku iwuang'ie iyie entorroni te mpolos ino.

⁶Tenikilej aitapong'oo olalashe lino ling'arie kina, aashu olayioni lino, aashu entito ino, aashu ina kitok ino ninyor, aashu ilo shore lino linyor anaa kewan ino, nejo, ‘Maape iyiook aaisiaai kulie aitin; neitu aekata iyiolouu intae aashu iloo papaai linyi,

⁷ore embata e nena aitin e lelo tung'ana oomanita intae, etaaniki intae aashu elamita intae, ebaiki eluboto nabo enkop o metabaiki enkae luboto,

⁸misujaa iyie ninye nimimbung ninye, nimincho meing'urrie ninye, nimipal iyie ninye nimimitu iyie ninye

⁹kake taara iyie ninye metua, inchoo eaku enkaina ino naituruk near ninye metua, ore te siadi naa nkaik oo ltung'ana pooki.

¹⁰Tanang'a iyie ninye too soito metua, te nkaraki niking'orua ninye aitapong'oo to Laitoriani Enkai ino, laa ninye likiyaua aitupuku te nkop e Misiri aitupuku tiatua enkop e sinkaisho.

¹¹Pee ening Iltung'ana pooki le Israel, neureishoyu, nemeigil aekata aas entorroni naikununo nji tiatua intae.

¹²“Tenining iyie te nabo e nena anas nikincho iyie Olaitoriani Enkai tobikie teine,

¹³nchere eshomo kulikae tung'ana le pesho tiatua intae neitapong'oitie lelo oomanya ina anasa, ejo, ‘Maape iyiook aaisiaai kulie aitin,’ neitu apa iyiolouu,

¹⁴nitumokiki taa aaikilikuanu te ambarakinoto aitirishaki; naa ng'ura tenaa kesipa neibale nchere etaasaki ena toki nadiaa tiatua intae.

¹⁵Niariara naa aamut lelo oomanya ina anasa to lalem, nindaikiekie katukul lelo pooki ootii atua o nchoorei enye, te nepi olalem.

¹⁶Nisotisoto nena masaa pooki aapik empolos e boo[1] nipejoo ina anasa o nena yarunot enyena pooki te nkima, anaa olasar olulung'a opejokini Olaitoriani Enkai inyi, neaku osototi ntarasi, meigili aekata aashet ina anasa.

¹⁷Mintinyikaki ake enkaina ino nena tokitin nemenyikakini pee etum Olaitoriani aibelekenyayu teina goro enye napi, neisho intae olng'ur neitanana oshoke tialo intae, anaa apa enainosie ninye olmumai too loo papaai linyi.

¹⁸Tenining'ining'i intae oltoilo lo Laitoriani Enkai inyi, aaibung nena kitanapat pooki naitanap nanu intae ena olong, niasiasa ina sidai naishiakino too nkonyek o Laitoriani Enkai inyi.”