Read MAASAI REVISED PROTESTANT Enkigilata oo Nkitanapat 14 Bible Online

Enkigilata oo Nkitanapat 14 - MAASAI REVISED PROTESTANT bible

Enkigilata oo Nkitanapat 14

¹“Irara intae inkera o Laitoriani Enkai inyi; midung'udung'u ate nimibarnibarna inkomomi inyi teninchirakiki ilmeneng'a, ootuata.

²Amu irara intae iltung'ana oosinya to laitoriani Enkai inyi netegelua intae Olaitoriani pee iakuku olorere lenye makewan, agelu intae te lelo tung'ana pooki ootii oriong enkop.

³“Minyanya intae pooki toki ake ninye nadiaa.

⁴Kuna ng'uesi indimidimi aainosa: olkiteng, enker o enkine,

⁵o empanas o entarakuet o olkondi, enkine oo soito, aashu osirua o eng'ues nanyaanyukie olkibulekeny o enker-oo ldoinyo.

⁶Ore pooki ng'ues narisha iloisotok anaa neiperra iloisotok kat are, neinyaku ng'amura tiatua ng'uesi indimdimi aainosa.

⁷Ore ake eyia te nena naainyiaku ing'amura aashu nemerisha iloisotok minya: entames, enkitejo o esuni, amu keinyaku ninche ing'amura kake merisha iloisotok, naa olminong ina te intae.

⁸Ore olbitir te nkaraki narisha iloisotok kake meinyaku ing'amura, naa olminong te intae. Eminyanya intae inkiri enye, ore impopoki enye emiseyie.

⁹“Ore nena pooki naatii atua enkare indimidimi aainosa; ore impukunot pooki oo sinkir indimidimi aainosa. Ore pooki toki naata inaipuko neeta ilpala nindimidimi aainosa.

¹⁰Ore pooki nemeeta inaipuko anaa ilpala niminyanya, mesinya nena te ntae.

¹¹“Indimidimi aainosa imotonyi pooki nemeiduruk,

¹²kake mindimidimi ainosa kuna: olkurragos, olmotonyi loo lmurran o mpukunot oo sidan,

¹³olkurruk o olkupelia o mpukunot enye pooki;

¹⁴o lkurruk o mpukunot e pooki toki naata naipuko o mpukunot enyena pooki,

¹⁵o esidai o lmuntut o motonyi e naiposha o lenkalem o mpukunot enye pooki.

¹⁶O enkiti motonyi oo nkiyiaa o emotonyi oo nkiyiaa sapuk, o emotoroki e nkare

¹⁷o enkakaya o sakeri o lmagero,

¹⁸o entilagos o empukunoto e motoroki o lanke o enagor kewan.

¹⁹Ore ntokitin pooki naapuo too naipuko naa olminong te intae, meidimi aainosa ninche.

²⁰Ore nena tokitin pooki naasinyari naapuo too naipuko indimidimi aainosa.

²¹“Minyanya pooki toki ake ninye naye openy. Indimidimi intae aaishoo oltung'ani omoni ootii atua inkang'itie inyi, pee enya ninche, aashu indimidimi aatimiraki oltung'ani loo loreren; amu intae iltung'ana oosinya to Laitoriani Enkai inyi. “Miyierie olkuoo kule e ng'otonye.

²²“Ntayu erubata e lelo anterera linono ooing'uaa enkurma to lari ake ninye pooki.

²³Ore te dukuya Olaitoriani Enkai ino, teine wueji negelu ninye, pee eitamany enkarna enye, nilo iyie anya ina rubata e nkurma ino; o enoo sabibu linono o eneilata ino o enoo lkikaunot loo nkishu inono o ntare; pee iyiolou iyie aturia Olaitoriani Enkai ino anaake.

²⁴Naa tenaa keado enkoitoi te iyie, neaku mindim ayau ina rubata tenikimayian Olaitoriani Enkai ino te nkaraki kelakua oleng te iyie ine wueji negelu Olaitoriani Enkai ino pee epik enkarna enye ine,

²⁵mbelekenya naa metaa mpisai, nieniki nena pisai enkaina ino, nilo ine wueji negelu Olaitoriani Enkai ino.

²⁶Ninyang'unye nena pisai entoki pooki naba anaa eniyieu, olkiteng aashu enker, enaisho oo sabibu aashu enaisho napi, entoki ake ninye naba anaa eniyieu; nilo iyie anya teine te dukuya Olaitoriani Enkai ino ning'ida, iyie o lmarei lino.

²⁷Niminturaa iyie ilo tung'ani loo Lawi otii atua inkang'itie inyi, amu meeta ninye erubata aashu enjung'ore tenebo iyie.

²⁸“Ore te nkiting'oto, e pooki ari liokuni nkatitin pooki niyauu intae ematua ina rubata pooki e tomon e nkikesare inyi to lari obo, aairragie aashum too nkang'itie inyi;

²⁹ore Ilawi te nkaraki nemeeta ninche erubata aashu enjung'ore tenebo iyie, oilo omoni, o lokishi, o enkoliai natii atua inkang'itie inyi, nepuonu aanya neraposho; pee kitum Olaitoriani Enkai ino atamayiana teina siaai pooki oo nkaik inono nias.