Read MAASAI REVISED PROTESTANT Enkigilata oo Nkitanapat 16 Bible Online

Enkigilata oo Nkitanapat 16 - MAASAI REVISED PROTESTANT bible

Enkigilata oo Nkitanapat 16

¹“Mbung'a olapa le Abibu nimbung Sabato o Laitoriani Enkai ino; amu to lapa le Abibu apa kintayio Olaitoriani Enkai ino aitung'uaa enkop e Misiri kewarie.

²Nipolosaki iyie olasar le Pasaka Olaitoriani Enkai ino, too ntare aashu too nkishu, teine wueji negelu Olaitoriani pee eitamany enkarna enye ine.

³Minya iyie imukateni naaisuishieki, ore too nkolong'i naapishana inosa tenebo imukateni neitu eisuishieki ina mukate o sina - amu itupukutuo apa intae te nkop e Misiri te nkisikata e nkisarrisar - pee itumutumu aatayiolo too nkolong'i pooki e nkishui inyi ina olong apa nitupukutuo aaing'uaa enkop e Misiri.

⁴Emincho edoli emukate naisuishieki tiatua enkop inyi too nkolong'i naapishana; niminchosho nena kiri o lasar le teipa teina olong e dukuya ekenyiki.

⁵Mindimidimi aatopolos olasar le Pasaka tiatua pooki ake ninye ang inyi naisho intae Olaitoriani Enkai inyi;

⁶kake teine wueji negelu Olaitoriani Enkai inyi pee eitamany enkarna enye ine, teine iyie shomo intayu olasar le Pasaka, teipa edoyio enkolong, teina kata apa nitupukutuo aaing'uaa Misiri.

⁷Niyier aitokitokie ninya teine wueji negelu Olaitoriani Enkai ino; ore tadekenya nimbelekenyanya aapuo ilng'oborri linyi.

⁸Ore too nkolong'i ile ninyanya imukateni neitu eisuishieki ore te nkolong e naapishana naa keaku eneumata o Laitoriani Enkai inyi; miasiasa esiaai teina olong.

⁹“Nteru nkena iwikii naapishana; ntera nkenu nena wikii naapishana ebaiki ina kata ninkesu ina kurma nauno.

¹⁰Nintoki aibung ina wiki oo wikii to Laitoriani Enkai, too nkishoorot o lpela naaing'uaa enkaina ino, ninchooyo iyie anaa enikitamayiana Olaitoriani Enkai ino.

¹¹Ning'ida iyie te dukuya Olaitoriani Enkai ino o sinka lino lee o esinka ino ng'oruoi, oilo tung'ani loo Lawi otii atua inkang'itie inono o lomoni o lokishi o enkoliai natii atua intae, teine wueji negelu Olaitoriani Enkai ino, pee eitamany enkarna enye ine.

¹²Tadamu nchere ira apa orrindik te Misiri ning'or pee imbung kuna kitanapat.

¹³“Imbung'a osirua loo lng'oborri nkolong'i naapishana, ina kata itasoto enkurma ino te wueji neidong'ishoreki o te wueji ino neironyishoreki;

¹⁴ning'ida iyie to sirua lino; iyie o layioni lino o entito ino o sinka lino o esinka ino o ilo tung'ani loo Lawi o lomoni o Lokishi o enkoliai natii atua nkang'itie inyi.

¹⁵Too nkolong'i naapishana iyie mbung'a osirua lo Laitoriani Enkai ino, teine wueji negelu Olaitoriani Enkai ino; amu eikimayian Olaitoriani Enkai ino te pooki nintayu o te siaai pooki oo nkaik inono, pee itumoki ating'idayu tukul.

¹⁶“Katitin uni to lari nepuonu ilewa linyi pooki dukuya Olaitoriani Enkai inyi teine wueji negelu ninye; teilo sirua loo mukateni neitu eisuishieki o to sirua loo wikii o to sirua loo lng'oborri. Mepuonu ninche dukuya Olaitoriani too nkaik naarook;

¹⁷nchoo ake oltung'ani pooki eishooyo anaa enaidim, te risioroto e mayianata o Laitoriani Enkai ino nikinchoo ninye iyie.

¹⁸“Tegelu ilarishak o lkituaak too nkang'itie inyi pooki nikincho iyie Olaitoriani Enkai ino, te risioroto oo loshon linyi; neiguanaki ninche iltung'ana te sipata.

¹⁹Mimbelekeny iyie esipata, mintodolu iyie olkep, ming'amu ntokitin e ropare, amu keitamodok eropare inkonyek o ltung'ani ng'en. Neibelekeny olkuaak lo lasipani.

²⁰Esipata ake tusuja, pee itum atopuaa nijing ina kop nikincho iyie Olaitoriani Enkai ino.

²¹“Miun ake ninye likae shani metaa enkitanyaanyukoto enkai naji Ashera te mbata olperere lo lasar lo Laitoriani Enkai ino nilo iyie aitobir.

²²Mipikipiki intae eng'ape naiba Olaitoriani Enkai ino.