Read MAASAI REVISED PROTESTANT Enkigilata oo Nkitanapat 17 Bible Online

Enkigilata oo Nkitanapat 17 - MAASAI REVISED PROTESTANT bible

Enkigilata oo Nkitanapat 17

¹“Mipolosaki Olaitoriani Enkai ino olkiteng aashu enker naata entioto, aashu entibili ake ninye; amu olminong ilo to Laitoriani Enkai ino.

²“Tenetumi tiatua intae, tiatua ae nabo oo nkang'itie inyi naaishoo intae Olaitoriani Enkai ino olee aashu enkitok naas entorroni te dukuya Olaitoriani Enkai ino, agil olning'o lenye lo sotua,

³nelo ninye aisiaai kulie aitin neserem ninche, aashu enkolong aashu olapa aashu ae ake ninye o lorora le shumata, apa natanya nanu,

⁴nikilikini iyie, nining iyie; ninkilikuanu taa aitisip, naa tenesipa nchere etaasaki olminong oikununo nji te Israel,

⁵niyau auluo ino ilo lee aashu ina kitok nataasa ena bae torrono, ninang too sooito ilo lee aashu enkitok ometua.

⁶Te shakenisho oo lchakenini oaare aashu ilchakenini okuni eari ilo metua; meari oltung'ani metua te shakenisho oltung'ani obo.

⁷Enkaina e lelo shakenini naiter aar ninye metua, ore adake near enkaina oo ltung'ana pooki. Metaa ewuang'ie entorroni tiatua intae.

⁸“Tenelotu enkiguana nayieu erishare tialo iloikop o loikop, imasaa o masaa, aashu eoshoto o eoshoto o enkiguana ake ninye pooki nagolu nayieu erishare oleng te iyie tiatua nkang'itie inono, tudumunye shomo ine wueji negelu Olaitoriani Enkai ino,

⁹nintarasaki ilapolosak le Lawi, oilo arishani otii olorika nena olong'i nkilikuanishore ninche, amu eikimbalakinye ninche endung'oto e nkiguana.

¹⁰Nilo taa aas anaa enikimbalakinye ninche teine wueji negelu Olaitoriani; ning'or pee ias nena pooki nikiutaki ninche.

¹¹Ore te risioroto eina dung'oto e nkiguana nalimu ninche, nena shomo taasa; mimbelekenya teina dung'oto e nkiguana nikimbalakinye ninche, alo enkalo e tatene aashu enkalo e kedianye.

¹²Ore ilo tung'ani oas to lwuasa, lemening olapolosani oitashe aisiaaisho teine te dukuya Olaitoriani Enkai ino, aashu olarishani nchoo eari ilo tung'ani metua; pee itum aiwuang'ie entorroni tiatua Israel.

¹³Nening iltung'ana pooki neureishoyu nemeitoki aas to lwuasa.

¹⁴“Tenilotu kenya ina kop nikincho Olaitoriani Enkai ino, niya aitaa enino, nimany ninye, nintoki ajo, ‘Kapik olaiguanani shumata nanu, anaa kulo oshon pooki laamanita;’

¹⁵indim iyie tukul atipika ilo aiguanani shumata iyie ogelu Olaitoriani Enkai ino. Obo loo lalashera linono indim ategelu metaa olaiguanani te shumata intae; mipikipiki oltung'ani loo loreren shumata intae leme olalashe linyi.

¹⁶Nchoo olaiguanani eaku meitaa imbartan enyena kumok, nemeisho iltung'ana metorrinyoto aapuo Misiri ejo pee etum atopona imbartan enyena, amu kitiaka iyie Olaitoriani, ‘Mingil aekata aim ina oitoi.’

¹⁷Nemeponiki sii kewan inkituaak, pee meibelekenya ake oltau lenye; nemeponiki sii kewan oleng enkosholai o saabu.

¹⁸“Naa teneton ninye to lorika lenye le nkitoo, neigeroki kewan tiatua embuku ena kitanapata, teina naitore ilapolosak le Lawi,

¹⁹neaku ina kitanapata tenebo ninye, neisum ninye inkolong'i pooki enkishui enye, pee eyiolou aturia Olaitoriani Enkai enye, te nkibung'ata oo rorei pooki lena kitanapata, o kuna kiguanat, neas ninche;

²⁰pee medumunye oltau lenye arupayu alang ilalashera lenyena, nemeibelekenya apaash ena kitanapata, alo enkalo e tatene aashu enkalo e kedianye; pee etum ninye atobikoi te nkitoria enye, ninye o nkera enyena tiatua Israel.