Read MAASAI REVISED PROTESTANT Enkigilata oo Nkitanapat 19 Bible Online

Enkigilata oo Nkitanapat 19 - MAASAI REVISED PROTESTANT bible

Enkigilata oo Nkitanapat 19

¹“Teneiwuang'ie Olaitoriani Enkai ino lelo oreren likilo iyie Olaitoriani Enkai ino aisho enkop enye, niwuang'ie iyie ninche, nimany nkanas enye o nkajijik enye,

²nteng'ela iyie nkanas uni te nkaraki ntae teinakop nikincho iyie Olaitoriani Enkai ino metaa enino.

³Ntobira nkoitoi nior aitaa irubat uni ina kop nikinchoo iyie Olaitoriani Enkai ino metaa enino, pee etum pooki tung'ani oitayu iloikop akuetiki.

⁴“Ena ninye naishoruno teilo oar olikae te sesekuan, tenesaru ninye ine neidim aitopuaa enkishui enye. Tenear oltung'ani olelatia enye eitu eotiki meetakinore

⁵anaa naaji tenelo oltung'ani entim tenebo olelatia enye adung'u ilkeek, neyuk te nkaina enye entolu adung'u olchata, neshurtunye endukuya e ntolu near ilo le latia enye metua, keidim ninye atasaru nabo e kuna anas neitajeu enkishui enye;

⁶meinepu ake ilo tung'ani oitalaku elap o sarge etagore near ninye, hoo nemeishiaakino ilo tung'ani keeya, amu meetakinore duoo ilo le latia enye.

⁷Metaa kaaitanap iyie, nteng'ela nkanas uni.

⁸Naa tenikiponiki Olaitoriani Enkai ino enkop, anaa apa enainosa ninye olmumai too loo papaai linyi, neisho ninye intae ina kop pooki apa naisiligie loo papaai linyi

⁹tening'oru aibung nena kitanapat pooki, naaitanap nanu iyie ena olong, pee ing'oru Olaitoriani Enkai ino nilo anaake too nkoitoi enyena - niponaa naa kulie anas uni te kuna uni.

¹⁰Meibukori ake osarge lemeeta entioto tiatua ina kop ino nikincho iyie Olaitoriani Enkai ino metaa enjung'ore ino, nelotu oldeket le ntorroni e nkibukoroto o sarge shumata ino.

¹¹“Kake teneiba ake ninye oltung'ani olelatia enye, neirrag arreshu ninye, neibung ninye, nesesekuan ninye neaku etua, nekuetiki ilo tung'ani nabo e kuna anas,

¹²nchoo ilpayiani leina anasa eirriwaa olkilikuai meyauni ninye teine, neitarasakini ninye ilo oata e lap osarge, pee etum ninye atua.

¹³Mincho enkong'u ino meing'urrie ninye, kake iwuang'ie ena torroni e nkibukoroto osarge tiatua Israel, pee itum ataseriana.

¹⁴“Ore teina jung'ore nilo aibung teinakop nikincho Olaitoriani Enkai ino metaa enino, miwuang'ie olpolosie lo le latia ino, apa otipika iltung'ana le dukuya.

¹⁵“Meidip olchakeni obo aitang'oro oltung'ani entorroni ake ninye pooki, aashu tiae ake ninye kitapong'oto naitapong'o ninye. Too lchakenini oaare ake aashu okuni eidimi aaitisipa endung'oto e nkiguana.

¹⁶Tenedumunye olchakeni te ntorroni enye aitang'or likae tung'ani te nkitarruoroto,

¹⁷nepuonu nena aloli naaitarrikinote dukuya Olaitoriani, dukuya ilapolosak o larishak laa ninche ootii ilorikan te nena olong'i.

¹⁸Neikilikuanishore ilarishak aabaraki naa tenaa olelejare ilo shakeni, neitang'oro olalashe lenye te lejare,

¹⁹nintaasiasa ninye ina duoo nayieu ninye neitaas olalashe lenye, pee itum aaibooi entorroni te mpolos inyi,

²⁰Nening lelo kulikae, neureyu, nemeigil aekata entorroni natiu nji apuku tiatua intae.

²¹Mincho enkong'u meing'urrie ninye; kelo aaku enkishui te nkishui, enkong'u te nkong'u, olalae to lalae, enkaina te nkaina o enkeju te nkeju.