Read MAASAI REVISED PROTESTANT Enkigilata oo Nkitanapat 2 Bible Online

Enkigilata oo Nkitanapat 2 - MAASAI REVISED PROTESTANT bible

Enkigilata oo Nkitanapat 2

¹“Nikintoki aaibelekenya nikipuo ong'ata, enkalo Enaiposha Nanyokie, anaa apa enaatiaka Olaitoriani; ore too nkolong'i kumok nikipuo aamanaa te Seir.

²Naaitoki Olaitoriani ajoki nanu,

³‘Itamanaitie intae tele doinyo te nkata naado; embelekenyata enchom enkalo e moikuape.

⁴Naa ntanapa lelo tung'ana tiaaki, Etaa ijojo pee iimiimi olpolosie loo lalashera linyi, lelo ayiok le Esau, oomanya Seir; keureishoyu ninche te nkaraki intae metaa eng'ura ate oleng;

⁵emiarare ninche, amu maisho nanu intae hoo enkop enye, maisho ntae hoo ninye eneba anaa endap e nkeju amu aishoo nanu Esau Oldoinyo le Seir metaa olenye.

⁶Ipuopuo intae aainyiang'u endaa te ninche too mpisai, pee itumutumu aainosa, naa inyang'ung'u sii enkare te ninche too mpisai, pee itumutumu aatook.

⁷Amu etamayiana intae Olaitoriani Enkai inyi te siaai pooki oo nkaik inyi; keyiolo ninye enkiimata inyi ena ong'ata sapuk. Ore te kulo arin artam etaa Olaitoriani Enkai inyi tenebo intae; eitu eng'oriki intae toki.’

⁸Neaku kishomo apa iyiook, nikigiroo ilalashera lang lelo ayiok le Esau, oomanya Seir, nikigiroo enkoitoi e Araba ebaiki Elat o Esiong'eber. “Nikimbelekenya aaing'or enkalo olpurkel le Moab.

⁹Naajoki nanu Olaitoriani, ‘Mintanyamal iltung'ana le Moab aashu intayunye ninche olarrabal, amu maisho nanu intae erubata ninye nabo enkop enye metaa eninyi, amu aishoo nanu ilayiok le Lutu enkop e Ari meitaa enenye.’

¹⁰Iltung'ana le Emim apa oomanya ine.

¹¹Olosho kitok naa kumok naa adoru anaa iltung'ana le Anaki; neishooki sii ninche enkarna anaa ile Anak naji Refaim, kake keipot iltung'ana le Moab ninche aajo Emim.

¹²Kemanya sii apa ile Hori Seir, kake etaraitie ilayiok le Esau ninche, neidaikie ninche te dukuya ninche, nemanyisho ninche te rishata enye; anaa apa enaikuna Israel teinakop enye, apa naishoo ninche Olaitoriani.

¹³Entudumunye naa taata, nipuopuo aalang olkeju le Seredi. Neaku kishomo iyiook aalang olkeju le Seredi.

¹⁴Ore ebaiki pee kipuo iyiook te Kadesh-Barnea omatalang olkeju le Seredi naa ilarin tomoni uni o isiet, o metaba anaa neaku ore eishoi pooki, aa taa lelo tung'ana lo larrabal neidaaya ninche too lng'oborri, anaa apa enainosie Olaitoriani ninche olmumai.

¹⁵Amu kesipa enkaina o Laitoriani apa naarare ninche, pee eidaikie ninche te lelo ng'oborri, o metaba anaa neidaaya ninche.

¹⁶“Neaku ore ake pee eidaaya lelo tung'ana pooki ooidim aashom olarrabal,

¹⁷naajoki nanu Olaitoriani,

¹⁸‘Ore ena olong, ilo iyie adung olpolosie le Moab te Ari.

¹⁹Ore ake pee itaaniki enkop oo layiok le Amon, nimintanyamal ninche aashu iarare ninche, amu maaisho nanu iyie erubata ninye nabo enkop oo layiok le Amon metaa enino, amu aishoo nanu ilayiok le Lutu meitaa enenye.’

²⁰(Ore sii ine naa keyioloi nchere enkop e Refaim; ile Refaim apa oomanya ine, kake kejo ile Amoni ninche Samsumim,

²¹olorere kitok naa kumok, naa adoru anaa ile Anakim, kake eidakie Olaitoriani ninche te dukuya ninche, neoruni ninche ina kop nemanyi te rishata enye:

²²anaa apa enaitaasa ninye ilayiok le Esau oomanya Seir ina kata apa pee eidaikie ninye ile Hori te dukuya ninche, neoruni enkop enye nemanyi te rishata enye o tene.

²³Ore ile Afim, lelo oomanya inkang'itie kutiti ometabaiki Gasa, ore lelo le Kaftorim apa ooing'ua Kafta neidaikie ninche nemany enkop enye te rishata enye.)

²⁴Naajoki Olaitoriani entudumunye enteru elototo inyi, nipuopuo lido kekun lo erata le Arnon amu aishorua nanu apik atua enkaina ino Sihon ilo Amori, aiguanani le Heshbon o enkop enye; nteru iwa niarare ninye to larrabal.

²⁵Ore ena olong kaiteru nanu apik enkiputukuny o lkirutoto te nkaraki iyie shumata kulo ootii abori pooki, pee epuo ninche aaning ilomon likimpirta iyie neikirikira neirut te nkaraki iyie.

²⁶“Nairriwaa apa nanu ilkiliku teina ong'ata e Kedemot airriwaki Sihon olaiguanani le Heshbon, too rorei le seriani, ajoki,

²⁷‘Nchooki nanu maimai atua enkop ino; enkoitoi ake aim nanu, nemaiwuang nanu alo enkaina e tatene aashu ene kedianye.

²⁸Eikimiraki iyie nanu endaa too mpisai, pee atum ainosa, nikincho nanu enkare too ropiyiani, pee atum atooko; nchooki ake duoo iyie enaimaa too nkejek,

²⁹anaa apa enaitaasa nanu ilayiok le Esau oomanya Seir o Lmoabu oomanya Ari o metaba anaa nalang alo lido kekun le Yordan ajing atua ina kop naishoo iyiook Olaitoriani Enkai ang.’

³⁰Kake eitu eisho iyiook Sihon olaiguanani le Heshbon matogiroi ninye, amu eitagolo Olaitoriani Enkai inyi oltau lenye pee etum ninye aishoru atipika enkaina inyi anaa ena olong.

³¹Naajoki nanu Olaitoriani, ‘Ng'ura ajo aiterua nanu aisho intae Sihon o enkop enye; enteru ewaita, pee itumutumu aatamany ena kop.’

³²Nelotu Sihon aarare iyiook, ninye o ltung'ana lenyena pooki, neitayu olarrabal te Yahas.

³³Neishoru Olaitoriani Enkai ang ninye, nikimir iyiook ninye o layiok lenyena o ltung'ana lenyena pooki.

³⁴Nikimbung iyiook inkanas enyena teina kata nikindaikie tukul pooki anasa, ilewa o nkituaak o nkera; meetae hoo obo otung'uayioki eishu.

³⁵Nikiya inkishu aaraya tenebo o iyarunot e nena anas nikimbung'a.

³⁶Ore ebaiki Aroer naa ninye natii embata o erata le Arnon, o ebaiki ina anasa natii oerata ometabaiki Gilead meetae enkanasa nalusoo te iyiook; eishorua Olaitoriani Enkai ang pooki apik atua inkaik ang.

³⁷Ina kop pooki ake oo layiok le Amon eitu kinyikaki, aa taa, inkiyopat o lkeju le Yaboko o nkanas eina kop oo ldoinyo o pooki wueji neitanapa iyiook Olaitoriani Enkai ang ajoki emipuo.