Read MAASAI REVISED PROTESTANT Enkigilata oo Nkitanapat 21 Bible Online

Enkigilata oo Nkitanapat 21 - MAASAI REVISED PROTESTANT bible

Enkigilata oo Nkitanapat 21

¹“Tenelo netumi teinakop naisho intae Olaitoriani Enkai inyi metaa eninyi, oltung'ani otaraki metua, eirrag tiong'ata, nemeyioloi aajo kaing'ae natara ninye,

²nepuonu naa ilpayiani linyi o larishak linyi, netem erishata e nena anas naamanita ilo otasesekuanaki

³neya enkashe neitu aekata eitaasi esiaai neitu aekata epiki enchata emurt.

⁴Neyau lelo payiani leina anasa ina ashe aaitadou oerata onang'ari enkare, leitu aekata eturi aashu euni, negili emurt eina ashe teine to erata.

⁵Ore ilapolosak lelo ayiok le Lawi nepuonu dukuya, amu etegelua Olaitoriani Enkai inyi ninche pee eisiaai ninye nemayianisho te nkarna o Laitoriani, naa ore to rorei lenye ore pooki shankar o pooki oshoto neitobiri.

⁶Ore lelo payiani pooki leina anasa nataaniki ilo tung'ani otasesekuanaki neituku inkaik enye te nchumata eina ashe natigilaki emurt to erata;

⁷neishakenoki ninche aajo, ‘Eitu eibukoo inkaik ang ele sarge, neitu edol inkonyek ang ele sarge, neitu edol inkonyek ang eibukori.

⁸Tapalaki Olaitoriani iltung'ana linono Israel, linyang'ua iyie, nimipik entorroni o sarge lemeeta entioto atua iltung'ana linono Israel; kake nchoo ena torroni o sarge metapalakini ninche.’

⁹Neaku inji nkuna teniwuang'ie entorroni o sarge tiatua intae, tenias enaishiakino too nkonyek o Laitoriani.

¹⁰“Tenilo iyie olarrabal aarare ilmang'ati linono, neishoru Olaitoriani Enkai ino ninche apik inkaik inono, nimbung iyie ninche araya,

¹¹nidol tiatua ninche lelo yarunot enkitok sidai, ning'uar iyie ninye, niya iyie aitaa enkitok ino,

¹²niyau naa iyie ang arik enkaji ino, nebarn ninye endukuya nedung iloisotok.

¹³Neitoki ninye aitayu ilkilani lenyena ooishopito pee eyaruni neton tiatua enkaji ino neishiraki menye o ng'otonye olapa olulung'a; ore te siadi naa indim ashomo atayiolo ninye, niaku olpayian lenye neaku ninye enkitok ino.

¹⁴Naa teneitu ishipakino ninye, nincho meshomo eneyieu; kake mimir ninye too mpisai, minko ninye anaa errindik, amu indipa atayiolo ninye.

¹⁵“Teneeta oltung'ani inkituaak are, enkirotet o entinki, netoikitio ninche ninye inkera, ina kirotet o entinki; naa tenaa ore olkikau naa oleina tinki,

¹⁶ore kenya teina olong naor ninye imasaa enyena aitujung ilayiok lenyena nemeiko ninye olayioni le nkirotet anaa olkikau aitulus to layioni le ntinki, laa ninye olkikau,

¹⁷kake kelo ninye aitulus olkikau lenye ilo ayioni le ntinki, neisho ninye ninye erubata napuda te nena pooki naata ninye, amu ninye enkiterunoto engolon enye; enenye esipata e kikausho.

¹⁸“Teneeta oltung'ani olayioni ogolong'u marmali, lemening menye aashu ng'otonye, naa, ore hoo near ninche ninye, mening ninye ninche,

¹⁹nchoo eibung menye o ng'otonye neyaki ninye ilpayiani leina anasa te kishomi eine wueji nemanya ninye.

²⁰Nejoki ninche lelo payiani leina anasa enye, ‘Ore ele ayioni lang kegolong'u naa marmali, mening iyiook, olalotoni naa olamerani.’

²¹Ore lelo tung'ana pooki leina anasa nenang ninye too soito ometua; pee itum aaibooi entorroni tiatua intae; nening Israel pooki neureishoyu.

²²“Naa teneas oltung'ani embae torrono naishiakino neye, nepiki ninye olchani aailili.

²³Nemeton osesen lenye enkewarie pooki te nchumata olchani; kake tunukai ninye ina olong ake, amu ore oltung'ani oililioki naa kediaa te Nkai; misarkionie ina kop ino nikinchoo Olaitoriani Enkai ino metaa enjung'ore.