Read MAASAI REVISED PROTESTANT Enkigilata oo Nkitanapat 25 Bible Online

Enkigilata oo Nkitanapat 25 - MAASAI REVISED PROTESTANT bible

Enkigilata oo Nkitanapat 25

¹“Teneishankarra iltung'ana, nepuonu kotini, nedung ilarishak enkiguana te ninche, nepali ilo asipani neiguanareki ilo arruoni.

²Tenelo neaku eoshoto naishiakino ilo tung'ani, neisho oladung'oni le nkiguana ilo tung'ani meirraga te nkop neari te dukuya ninye ioshot naairirikino enkitarruoroto enye.

³Amu keidimi aishoo ninye ioshot artam kake meitulusi; amu tenelo likae tung'ani aponiki ninye ioshot naalang kuna, netemenayioki naa ilo alashe lino too nkonyek inono.

⁴“Mien olkiteng enkutuk eidong'ito entapa.

⁵“Tenetoni ilalashera tenebo, neye obo lenye meeta olayioni, ore ina kitok eilo otua, meyami te boo ilo marei oltung'ani leeiking'a; ore olalashe olmoruo lenye nchoo elo ayiolou, neya ninye aitaa enkitok enye, neitaas ninye enaishiakino neitaas enkitok olalashe lenye.

⁶Ore olayioni ong'as ina kitok aiu neipotieki enkarna eilo alashe lenye otua, pee meiwuang'ieki enkarna enye tiatua Israel.

⁷Naa tenemeyieu ilo lee neyam enkitok o lalashe lenye, nelo ina kitok o lalashe lenye auluo enetii ilpayiani, nejoki, ‘Etanya olalashe lo lmoruo lai eun enkarna o lalashe lenye te Israel; meas ninye esiaai o lalashe lenye te nanu.’

⁸Ore lelo payiani leina anasa enye, neipotu ninye, neirorie ninye: naa teneuno, ajo, ‘Mayieu nanu naya ninye’,

⁹nelo naa ina kitok o lalashe lenye enetii ninye teine netii lelo payiani, neitayu enamuke enye te nkeju enye, nenotaki enkomom enye; newaliki ajoki, ‘Ena emookini aaitaas olee le meshet enkaji o lalashe lenye.’

¹⁰Ore enkarna e nkaji enye kemookini aajo te Israel, enkaji e ilo oitayioki enamuke te nkeju enye.

¹¹“Teneara ilewa maate, nelotu enkitok e obo amitu olmoruo teilo oarita ninye, neitorioo enkaina enye aibung elewaisho,

¹²tudung'oi enkaina enye; ming'urrie ninye.

¹³“Mipik olbene lino mpukunot are oo soito ootemieki enkiroishi, osapuk o lkiti.

¹⁴Mipik enkaji ino mpukunot are e ntemeta enalala o enkiti.

¹⁵Entemet nabore nesipa ninye taasishore naa entemet nalulung'a ninye taasishore; pee etum inkolong'i inono aatoponari teinakop nikincho Olaitoriani Enkai ino.

¹⁶Amu ore lelo pooki oas mbaa naijo kuna, lelo pooki oasisho te lejare naa entoki olminong to Laitoriani Enkai ino.

¹⁷“Tadamu ina apa nikintaasa Amaleki te nkoitoi, ina kata ipuonunu aaing'uaa Misiri,

¹⁸ina kata apa pee kirasaki te nkoitoi inaure nitashala, nedung'oo to lkidong'oe linyi lelo pooki apa ooyietunye te siadi intae; neitu ninye eureyu Enkai.

¹⁹Metaa tenikincho Olaitoriani Enkai ino enkiyeng'iyeng too lmang'ati linono pooki likimanita, tiatua ina kop nikincho iyie Olaitoriani Enkai ino metaa enjung'ore ino niya; nilo aiwuang'ie Amaleki tioriong enkop; mincho ake kirikino.