Read MAASAI REVISED PROTESTANT Enkigilata oo Nkitanapat 27 Bible Online

Enkigilata oo Nkitanapat 27 - MAASAI REVISED PROTESTANT bible

Enkigilata oo Nkitanapat 27

¹Ore Musa o lpayiani loo Siraeli neitanap olorere aajoki, “Embung'a kuna kitanapat pooki naitanap nanu intae ena olong,

²naa ore kenya ina olong nilang'ilang'a olkeju le Yordan aapuo ina kop naisho Olaitoriani Enkai inyi, intae, nintasheyieyie isoito sapuki nimurumuru ninche te nturoto.

³Ninger te shumata ninche lelo rorei lena kitanapata, tenindip atalang'a ashomo ina kop, nikincho iyie Olaitoriani Enkai ino, ina kop naruko naishi o kule, anaa apa enaisiligie intae Olaitoriani, Enkai oo loo papaai linyi.

⁴Naa ore ake pee indipidipi aatalang olkeju le Yordan, nintasheyieyie kulo soito laa ninche nanu aitanapa intae ena olong te nchumata oldoinyo le Ebal, nimurumuru ninche te nturoto.

⁵Ore teine nishetutu olperere lo lasar lo Laitoriani Enkai inyi, olperere lo lasar loo soito, neminteleiki ninche esekenkei.

⁶Nishetu olperere lo lasar lo Laitoriani Enkai inyi too soito le megueta; ninchooyo olasar opejori te nchumata enye, aitaiki Olaitoriani Enkai inyi;

⁷nipolos olasar le seriani, ninyanya ntae teine, ning'idada te dukuya Olaitoriani Enkai inyi.

⁸Ninger te nchumata e lelo soito lelo rorei pooki lena kitanapata meibalata.”

⁹Nejoki Musa o lelo apolosak le Lawi Israel pooki, “Entigirata entoning, intae Israel: ore ena Olong itaa intae olorere lo Laitoriani Enkai inyi.

¹⁰Toning'o naa oltoilo lo Laitoriani Enkai ino, mbung'a kuna kitanapat enyena o nkiguanat enyena naaitanapa nanu iyie ena olong.”

¹¹Neitoki Musa airorie ilo orere ina olong ake, nejoki,

¹²“Tenindipidipi aatalang olkeju le Yordan nchoo kulo eitashe to ldoinyo le Gerisim, pee emayian olorere: Simion o Lawi o Yuda o Isaakar o Yosef o Benchamen.

¹³Naa nchoo kulo eitashe te nchumata oldoinyo le Ebal teina siaai: Ruben o Gad o Asheri o Sebulon o Dan o Naftali.

¹⁴Neibalunye Ilawi too ltung'ana pooki le Israel to ltoilo sapuk aajo.

¹⁵“ ‘Etediaaki iltung'ana ooitobiru enkitanyaanyukoto nagueta aashu enamuruni, olminong to Laitoriani, entoki naaitobiruni too nkaik o ltung'ani arriyia, neirragieki aaisudoo.’ Newal iltung'ana pooki aajo, ‘Eesai.’

¹⁶“ ‘Etediaaki ilo lemeyanyit menye aashu ng'otonye.’ Newal iltung'ana pooki aajo, ‘Eesai.’

¹⁷“ ‘Etediaaki ilo oiwuang'ie olpolosie leilo le latia enye.’ Newal iltung'ana pooki aajo ‘Eesai.’

¹⁸“ ‘Etediaaki ilo oitapong'oo oltung'ani modooni te nkoitoi.’ Newal iltung'ana pooki aajo, ‘Eesai.’

¹⁹“ ‘Etediaaki ilo oibelekeny esipata tialo oltung'ani omoni o lokishi o enkoliai.’ Newal iltung'ana pooki aajo, ‘Eesai.’

²⁰“ ‘Etediaaki ilo oboitare enkitok e menye te nkaraki etaboluo ninye ilkilani leina nara ene papaai lenye.’ Newal iltung'ana pooki aajo, ‘Eesai.’

²¹“ ‘Etediaaki olololoitore empukunoto ake ninye eng'ues.’ Newal iltung'ana pooki aajo ‘Eesai.’

²²“ ‘Etediaaki ilo oboitare enkanashe enye, aa entito e menye aashu enang'arie kina.’ Newal iltung'ana pooki aajo, ‘Eesai.’

²³“ ‘Etediaaki ilo oboitare enkaputani.’ Newal iltung'ana pooki aajo ‘Eesai.’

²⁴“ ‘Etediaaki ilo oar metua ole latia enye.’ Newal iltung'ana pooki aajo ‘Eesai.’

²⁵“ ‘Etediaaki ilo oropi metaara metua oltung'ani lemeeta entioto.’ Newal iltung'ana pooki aajo ‘Eesai.’

²⁶“ ‘Etediaaki ilo lemeitabaya irorei lena kitanapata aas ninche.’ Newal iltung'ana pooki aajo ‘Eesai.’