Read MAASAI REVISED PROTESTANT Enkigilata oo Nkitanapat 29 Bible Online

Enkigilata oo Nkitanapat 29 - MAASAI REVISED PROTESTANT bible

Enkigilata oo Nkitanapat 29

¹Kulo ninche irorei leilo ning'o lo sotua oitanapa Olaitoriani Musa pee eitobir iltung'ana le Israel te nkop e Moab, tenebo ilo ning'o lo sotua apa oitobira ninye tenebo ninche te nkop e Horeb.

²Neipotu Musa iltung'ana pooki le Israel nejoki ninche, “Itoduaa intae ina pooki nataasa Olaitoriani too nkonyek inyi te nkop e Misiri, ina naitaasa Farao o sinkan lenyena pooki o enkop enye pooki,

³nena temat sapuki nitoduaa too nkonyek inyi, nena kitoduaat o nena baa sapuki e nking'asia;

⁴kake ore ebaiki ena olong eitu eisho intae Olaitoriani eng'eno niyiolounyenye, aashu inkonyek nidolielie aashu inkiyiaa nining'ieng'ie.

⁵Atorikoyie nanu intae ilarin artam ti ong'ata neitu emuta ilkilani linyi linchopitoto neitu emuta inamuka too nkejek inyi.

⁶Eitu intae inyanya imukateni neitu intae iokioko enaisho aashu enaitemerisho; pee itumutumu aatayiolo nchere kara nanu Olaitoriani Enkai inyi.

⁷Ore apa pee ipuonunu intae ene wueji, neetuo aarare intae, Shilo olaiguanani le Heshbon o Oog ilo aiguanani le Bashan, kake kitimira iyiook ninche;

⁸nikiya iyiook enkop enye, nikincho metaa enjung'ore too ltung'ana le Ruben o le Gad o lpisiai loo ltung'ana le Manase.

⁹Metaa eng'ura naa pee imbung'ubung'u irorei lele ning'o lo sotua, pee itumutumu aatubul te nena pooki niasiasa.

¹⁰“Intasheshe taata intae ena olong te dukuya Olaitoriani Enkai inyi, ilkituaak loo loshon linyi o lpayiani linyi o larikok linyi o lewa pooki le Israel,

¹¹o nkera inyi o nkituaak inyi o lomon ootii atua ilng'oborri linyi oilo obarn ilpapit loo nkerra o ilo likiokoki enkare,

¹²pee itum atijing'a ilo ning'o le nkinosata o lmumai lo Laitoriani Enkai ino, oitobir Olaitoriani Enkai ino tenebo iyie ena olong;

¹³pee etum ninye aitubula intae ena olong anaa iltung'ana lenyena, pee etum sii ninye ataa Enkai inyi, anaa apa enaisiligie intae, anaa sii apa enainosa ninye olmumai too loo papaai linyi, te Abraham o te Isaak o te Yakobo.

¹⁴Neme te intae ake aitobir ele ning'o lo lmumai,

¹⁵kake tenebo sii o ilo lemetii ene tenebo iyiook ena olong tenebo ilo oitashe tenebo iyiook ena olong te dukuya Olaitoriani Enkai ang.

¹⁶“Iyiololo apa intae kimanya enkop e Misiri, o ina kata kipuonu aaimu empolos e lelo oshon apa likitopolosutua;

¹⁷nitoduaa intae nena tokitin enye naaitagorisho, nena kitanyaanyukot enye oo nkaitin oo nkeek o noo soito o ne nkosholai o ne saabu, apa naatii atua ninche.

¹⁸Entodol naa melo ake oltung'ani tiatua intae, olee aashu enkitok aashu olmarei aashu olosho, oibelekeny oltau lenye ena olong aing'uaa Olaitoriani Enkai ang alo aisiaai inkaitin e kulo oshon; mejing ake atua intae entonai naata esayiet o lng'anayio losotua oodua.

¹⁹Ilo tung'ani laa tenening kulo rorei lele ning'o lo lmumai, nemayian kewan to ltau, ejo, ‘Kaserianu nanu hoo tenaa kalo te ngolon oltau lai.’ Ore ena naa keidim ataa keyau enkidaata e ntoki nashal o enatoyio.

²⁰Mepalaki ninye Olaitoriani, kake ore engoro o Laitoriani o lom lenye naa keidim atupuru teilo tung'ani. Ore ildeketa ooigero tiatua ena buku netonie ninye, neiwuang'ie Olaitoriani enkarna enye tiabori keper.

²¹Nekepu Olaitoriani ninye tiatua iloshon pooki le Israel te ntorroni, te risioroto oo ldeketa pooki lele ning'o lo sotua ooigero tiatua ena buku oo nkitanapat.

²²Ore too ishoritin naapuonu, ore inkera inyi naabulu te siadi intae o ltung'ani olotu eing'uaa enkop nalakua, nejo, ina kata tenedol ioshot eina kop o nena muoyiaritin naaitamuoyia Olaitoriani

²³ina kop pooki naitaa Olaitoriani enkima o emunyan o enkop natumuta enkima nemeunishoreki nemebulaki toki; ina kop nemebulaki nkujit, ewueji netaaraki aaiko anaa Sodom o Gomora o Adam o Seboim, nena apa naatanang'ayie Olaitoriani te ngoro enye napi.

²⁴Ee keyooki iloshon pooki aajo, ‘Kainyoo pee eitaas Olaitoriani ena kop nji. Kainyoo eutu ena kirouaj e ngoro enye kitok?’

²⁵Neitoki iltung'ana aajo, ‘Te nkaraki natung'uaitie ninche olning'o lo sotua lo Laitoriani, Enkai oo loo menye, apa oitobira ninye tenebo ninche ina kata apa pee eitupuku ninche te nkop e Misiri,

²⁶nepuo ninche aaisiai kulie aitin neserem ninche, nkaitin apa neitu eyiolou ninche neitu egelaki Olaitoriani ninche;

²⁷neaku einuakaki engoro o Laitoriani te nkaraki ena kop, neyau shumata ninye ildeketa pooki ooigero tena buku.

²⁸Nedotu Olaitoriani ninche aitung'uaa enkop enye te ngoro o te mpijan o te ngoro sapuk, nenang'aki ninche atua ae kop, anaa enatiu ena olong.’

²⁹“Ore nena tokitin naaisudoro naa ino Laitoriani Enkai ang; kake ore nena naaibalunyeki naa nkunaang o noo nkera ang ntarasi, pee kitum aataas irorei pooki lena kitanapata.