Read MAASAI REVISED PROTESTANT Enkigilata oo Nkitanapat 3 Bible Online

Enkigilata oo Nkitanapat 3 - MAASAI REVISED PROTESTANT bible

Enkigilata oo Nkitanapat 3

¹“Nikintoki iyiook aaibelekenya nikipuo aaim enkoitoi e Bashan; neipang'u Oog ilo aiguanani le Bashan alotu aarare iyiook, ninye o ltung'ana lenyena pooki, nearare iyiook te Edrei.

²Kake aatiaka nanu Olaitoriani, ‘Miureyu ninye; amu aishorua nanu ninye o ltung'ana lenyena pooki o enkop enye apik atua enkaina ino, naa ilo iyie aitaas ninye anaa enintaasa Sihon ilo aiguanani le Amori, apa omanya Heshbon.’

³Neaku eishorua sii Olaitoriani Enkai ang apik atua enkaina ang Oog, ilo aiguanani le Bashan o ltung'ana lenyena pooki, nikiosh iyiook ninye o metaba anaa neaku meeta ninye olaishirani otelekakaki ninye.

⁴Nikiya iyiook nena anas enyena pooki teina kata meetae hoo enkanasa neitu iyiook kiya te ninche inkanas ntomoni ile, enkop pooki e Argob, ina kitoria e Oog tiatua Bashan.

⁵Ore kuna pooki naa nkanas apa naasheta isunta adoru, o nchomito oo sekenke, ore tenebo nena netii inkang'itie kutiti kumok oleng nemesheta sunta.

⁶Nikindaikie iyiook ninche katukul anaa apa enikinkuna Sihon, ilo aiguanani le Heshbon, aaidaikie pooki anasa, ilewa o nkituaak o nkera.

⁷Kake ore inkishu pooki o nena masaa naatii nkang'itie kiwaita aaraya.

⁸Neaku kiwaita iyiook ina kop teina kata too nkaik e lelo aiguanak oaare le Amori ootii lido kekun le Yordan, ebaiki oerata le Arnon o metabaiki Oldoinyo le Harmon.

⁹(Kejo apa lelo le Sidon Oldoinyo le Harmon Sirioni, nejo ile Amori Senir).

¹⁰Nikiya nena anas pooki eina kop naisiasha o Gilead pooki o Bashan pooki, ebaiki Saleka o Adrei, nkanas e nkitoria e Oog tiatua Bashan.

¹¹Amu Oog ake ilo aiguanani le Bashan etung'ueikiaki olpisiai le Refaim naa ore endapash enye naa ene sekenkei; aimetii ninye atua Raba o lelo Amoni? Ore enkadoro enye naa intemat naaudo ore endapasho naa intemat ong'uan te ntemata e nkaina o ltung'ani.

¹²“Ore apa pee kiya iyiook ina kop teina kata, naisho nanu ile Ruben o le Gad ina kop eiteru te Aroer, natii olkirine lo oerata le Afnon o lpisiai oitorit ina kop oo ldoinyo e Gilead tenebo nkanas enyena.

¹³Ore ina ae kop pooki e Gilead o Bashan pooki, ina kitoria e Oog, aa taa, ina kop pooki e Argob aishoo nanu olpisiai oitorit Manase. Ore ina Bashan pooki naa keji enkop e Refaim.

¹⁴Ore Yair ilo le Manase neya ina kop pooki e Argob, aa taa Bashan o metabaiki olpolosie loo Lgeshuri - oloo Lmakaati neipotie nena ang'itie kutiti kewan ajo, Hofot-Yair, anaa enatiu o taata.

¹⁵Ore Hakir naisho nanu Gilead,

¹⁶ore ile Ruben o le Gad naishoo nanu ina kop ebaiki Gilead o metabaiki oerata le Arnon, tenebo empolos o erata metaa olpolosie o metabaiki olkeju le Yabok, ilo polosie loo Lamori;

¹⁷o Araban sii tenebo Yordan pee eaku olpolosie, ebaiki Kineret o metabaiki enaiposha e Araba, ina aiposha naisukut, tiabori nena kishong'ishong'at e Pisga te nkalo o loosaen.

¹⁸“Naitanap apa nanu intae teina kata, ajoki, ‘Eishoo intae Olaitoriani Enkai inyi ena kop pee eaku eninyi; ore lelo lewa linyi ootanapate, keeim ninche ene eeta iruparen te dukuya ilalashera linyi, lelo tung'ana loo Siraeli.

¹⁹Kake ore nkituaak inyi o nkera inyi kutiti o nkishu inyi (kayiolo nanu ajo iatata inkishu kumok) netoni ninche te nena anas naishoo nanu intae,

²⁰ometaba anaa neisho Olaitoriani enkiyeng'iyeng ilalashera linyi, anaa enaishoo intae, nemany sii ninche ina kop naisho Olaitoriani Enkai inyi ninche te lido kekun le Yordan; nitumutumu taa aatorrinyoto, oltung'ani ake, ashomo ine wueji enye naishoo nanu intae.’

²¹Naitanapa apa nanu Yoshua ina kata ajoki, “Etoduaa inkonyek inono nena pooki naataasa Olaitoriani Enkai ino te kulo aiguanak pokira aare; neijia elo aiko Olaitoriani too nkitoriat pooki nilo iyie aimaa,

²²miureyu ninche amu Olaitoriani Enkai ino oarisho te nkaraki iyie.”

²³“Nasai nanu Olaitoriani ina kata, ajoki,

²⁴‘Olaitoriani Enkai, interua iyie aitodol osinka lino enkitoo ino o emagilanisho e nkaina ino; amu kaa ai naatae te keper aashu te nkop naaidim ataasa siaaitin naaijo kuna o nkiaasin magil naaijo ininono?

²⁵Nchooki nanu matalang'a alo, aatoomono, pee alo adol ina kop sidai te lido kekun le Yordan, idia kop sidai oo ldoinyo, o Lebanon!’

²⁶Kake aatagorokine apa nanu Olaitoriani te nkaraki intae, neitu ninye aaning nanu; naajoki nanu Olaitoriani, ‘Tabaiki iyie ine; mikingil iyie airorie nanu tialo ena bae.

²⁷Ilepa shomo enchumata e Pisga; nishumu inkonyek inono aing'or enkalo oloo ntoluo, naa ng'ura ina kop too nkonyek inono, amu milo iyie alang ele keju le Yordan.

²⁸Kake ntanapa Yoshua, nintagol ninye oshoke nintipij ninye, amu kelang ninye aimu te dukuya kulo tung'ana, naa kelo ninye aitujung ninche ina kop nilo iyie adol.’

²⁹Neaku kitobiko apa iyiook tiatua ilo erata otalakinore Betpeor.