Read MAASAI REVISED PROTESTANT Enkigilata oo Nkitanapat 30 Bible Online

Enkigilata oo Nkitanapat 30 - MAASAI REVISED PROTESTANT bible

Enkigilata oo Nkitanapat 30

¹“Naa tenepuonu kuna tokitin pooki shumata iyie, emayianata o ldeket, kuna nairragie nanu te dukuya iyie nidamu iyie ninche tiatua lelo oshon likiterewa Olaitoriani Enkai ino.

²Nirrinyokino Olaitoriani Enkai ino, iyie o nkera inono, nining oltoilo lenye te kuna pooki naaitanap nanu iyie ena olong, to ltau lino pooki o te nkishui ino,

³nikitum naa Olaitoriani Enkai ino aing'urrie iyie, nikingil aiturrur iyie aitung'uaa lelo oreren pooki apa likindapashaka Olaitoriani Enkai ino.

⁴Tenaa duoo ninye kelakua oleng eneidapashakaki intae te nkop naa teine kirrinyu Olaitoriani Enkai ino, naa teine king'amu ninye iyie.

⁵Nikiyau iyie Olaitoriani Enkai ino atua ina kop apa oo loo papaai linyi, pee itum aitaa enino; nikintubul ninye iyie niakuku kumok aalang iloo papaai linyi.

⁶Nemurat Olaitoriani Enkai ino oltau lino o ltau le ishoi ino, pee itum atonyorra Olaitoriani Enkai ino to ltau lino pooki o te nkishui ino pooki; pee itum atopuaa.

⁷Nepik Olaitoriani Enkai ino kulo deketa pooki shumata ilmang'ati linono o lelo apa likisilisilo.

⁸Ning'il iyie aning irorei lo Laitoriani nimbung nena kitanapat enyena pooki naaitanap nanu iyie ena olong.

⁹Eikincho iyie Olaitoriani Enkai ino tubula oleng, te siaai oo nkaik inono o too lng'anayio lo sesen lino o too lng'anayio loo nkishu inono o too lng'anayio le nkop ino; amu keitoki Olaitoriani ashipakino pee kintubul iyie, anaa apa enatishipakine loo papaai lino.

¹⁰Tenining iyie oltoilo lo Laitoriani Enkai ino, aibung inkitanapat enyena o nkikoot enyena naaigero tena buku oo nkitanapat, tenirrinyokino iyie Olaitoriani Enkai ino to ltau lino pooki o te nkishui ino pooki.

¹¹“Amu ore ena kitanapata naitanap nanu intae ena olong megol oleng te intae, nemelakua.

¹²Mme shumata etii, metaa ijo, ‘Kalo ailep alo shumata te nkaraki iyiook, pee eyaki iyiook, pee kitum iyiook aatoning nikiaas.

¹³Neme lido kekun le naiposha etii, metaa ijo iyie, kalo olo alang enaiposha te nkaraki iyiook, pee elo ayaki iyiook, pee kitum aatoning nikiaas?’

¹⁴Kake eikitaaniki iyie ele rorei oleng; enkutuk ino etii o atua oltau lino, pee itum ataasa.

¹⁵“Ng'ura ajo airragie nanu ena olong te dukuya iyie puaan o mbaa sidain, keeya o entorroni.

¹⁶Tenining iyie kuna kitanapat o Laitoriani Enkai ino naaitanap nanu ena olong, anyorru Olaitoriani Enkai ino, alo too nkoitoi enyena, nimbung inkitanapat enyena o nkikoot o nkiguanat nitum taa atopuaa nibul, nikimayian Olaitoriani Enkai ino tiatua ina kop nijing'ita alo aya.

¹⁷Kake teneibelekenya oltau lino niany ining, nikiyae shomo teserema kulie aitin nisiaai ninche.

¹⁸Kaaibalakinye nanu iyie ena olong nchere, ilo aidaaya; milo abik tiatua ina kop nilang'aki to lkeju le Yordan alo aya.

¹⁹Kaipotu nanu keper o enkop nikinchakenoki iyie ena olong, nchere airragie nanu te dukuya iyie puaan o keeya, emayianata o ldeket, ore naa tegelu puaan, pee itum iyie o eishoi ino atobikoi.

²⁰Ninyorru Olaitoriani Enkai ino, nining oltoilo lenye, nisuj ninye; amu enkishui ina te iyie o emponaroto oo nkolong'i, pee itum atobiko tiatua ina kop apa nainosie Olaitoriani olmumai too loo papaai linyi, te Abraham o te Isaak o te Yakobo pee eisho ninche.”